Սերժ Սարգսյան. «Այս կառավարությունից սպասելիքները շատ մեծ են և արդյունավետ աշխատելու համար որևէ խոչընդոտ չեմ տեսնում»
ՀՀ նախագահի մասնակցությամբ այսօր տեղի ունեցավ նոր ձևավորված կառավարության անդրանիկ նիստը, որը վարեց ՀՀ նախագահ Սերժ Սարգսյանը:
Նիստի բացմանը Նախագահ Սերժ Սարգսյանը շնորհավորելով կառավարության անդամներին գործադիրի կազմում ընդգրկվելու կապակցությամբ, նշեց, որ վերջին մեկ տարվա ընթացքում Հայաստանն անցել է երեք խոշոր ընտրական գործընթացների միջով. խորհրդարանական ընտրությունների արդյունքում ունեցել ենք քաղաքական դաշտի գրեթե ողջ ներկապնակը ներկայացնող խորհրդարան, որն արդեն իսկ իրեն դրսևորել է որպես ուժեղ և գործուն քաղաքական մարմին:
Ս.Սարգսյանի խոսքերով` Նախագահական ընտրությունների արդյունքում ունեցել ենք քաղաքական նոր մշակույթ, իսկ մի քանի օր առաջ տեղի ունեցած Երևանի ավագանու ընտրությունների ժամանակ քաղաքացիները մեկ անգամ ևս բարձրաձայնեցին, որ պահանջում են և պատրաստ են սատարելու այն պաշտոնյաներին, ովքեր օրնիբուն աշխատում են, ամեն օր մի բան են փոխում և պրակտիկ կոնկրետ աշխատանքը գերադասում են շոուներից:
«Յուրաքանչյուր ընտրություն և, հատկապես համապետական ընտրությունները փորձություն են մեր երկրի և մեր երիտասարդ ժողովրդավարության համար: Մենք անցանք այդ փորձությունների միջով բավականին վստահ, և դուրս եկանք որպես պետություն և հասարակություն ավելի ամրացած: Այժմ մեզ սպասում է 2008-ից ի վեր ամենաբարենպաստ ժամանակահատվածը` ամբողջովին նվիրվել մեր աշխատանքին, անմնացորդ և հետևողականորեն աշխատել, մարդկանց հոգսերը լուծելու և արդյունքում ավելի ապահով Հայաստան կերտելու համար»,- նշեց Ս.Սարգսյանը:
Ըստ Նախագահի` այս կառավարությունից սպասելիքները շատ մեծ են և արդյունավետ աշխատելու համար որևէ խոչընդոտ չի տեսնում, հակառակը կարծում է, որ ստեղծվել են նպաստավոր պայմաններ և իրենց աշխատանքով հիմքեր են նախապատրաստել լավ առաջընթաց ունենալու համար:
«Այս կառավարության աշխատանքը գնահատվելու է միայն արդյունքներով, խիստ որոշակի արդյունքներով: Անցած տարի կառավարության առջև խնդիր դրվեց ապահովել նվազագույնը 7% տնտեսական աճ. Այս խնդիրը լուծվեց: Այս տարի էլ նույն խնդիրն է դրված, բայց այսուհետ մենք ձեր գործունեությունից ակնկալելու ենք որակական ցուցանիշներ` կառավարության գործունեության արդյունավետության և սոցիալական խնդիրների լուծման կոնկրետ ցուցիչներ: Հարցնելու ենք` ոչ թե ի՞նչ է արվել, այլ արվածը ինչ արդյունքներ է տվել: Եւ այդ արդյունքները պետք է լինեն չափելի և տեսանելի»,- ընդգծեց ՀՀ նախագահը:
Նրա խոսքերով` չափելին աշխատավարձերի և թոշակների բարձրացումն է: Ս.Սարգսյանը նշեց, որ չափելին ոչ միայն պետական սեկտորի աշխատողների աշխատավարձերի բարձացումն է, այլ տարբեր գործիքների օգտագործմամբ նաև պետական հատվածում աշխատողների աշխատանքի բարձրացմանը նպաստելն է: Նշվեց նաև, որ չափելին նաև ուռճացված պետական համակարգի օպտիմալացումն է, ինչպես նաև մարդկանց սոցիալական խնդիրների լուծումը:
«Մենք շատ ու շատ խնդիրներ ունենք և այդ խնդիրների ու դրանց լուծման ճանապարհի մասին մենք հնարավորություն կունենանք տեսանելի ապագայում խոսել: Բոլորիդ հաջողություն եմ մաղթում և խնդրում եմ հստակորեն գիտակցել, որ Ձեր հաջողությունից շատ ու շատ բան է կախված: Միգուցե նույնիսկ առաջին հայացքից անտեսանելի, բայց իրոք շատ ու շատ բան է կախված, և ես հույս ունեմ, վստահ եմ, որ ոչ միայն կառավարության անդամները, այլ նաև մեր բոլոր գերատեսչությունների աշխատողները պատասխանատվության մեծ զգացումով կաշխատեն»,- ասաց ՀՀ նախագահը:
Վարչապետ Տիգրան Սարգսյանը շնորհակալություն հայտնեց ՀՀ նախագահին վստահության համար և հավաստիացրեց. «Կառավարությունը քաջ գիտակցում է, որ քաղաքացիների սպասումները բավականին բարձր են, մենք ամեն ինչ կանենք, որ արդարացնենք այդ սպասելիքները և մեր գործունեության արդյունքները լինեն տեսանելի և շոշափելի բոլոր քաղաքացիների համար»:
Լրահոս
Տեսանյութեր
ԱՄՆ-ում հրդեհների հետևանքով մոխրացել է Սահակ-Մեսրոպ հայ քրիստոնյա վարժարանը
