Ձեր վստահելի աղբյուրը

Հայ Ազգային կոնգրեսի ակտիվիստներ Արտակ Կարապետյանի, Դավիթ Քիրամիջյանի և Սարգիս Գևորգյանի պաշտպան Ստեփան Ոսկանյանի համար սպասելի էր, որ Վճռաբեկ դատարանը կորոշի վերադարձնել գործը Վերաքննիչ դատարան` նոր քննության: 

«Ես ակնկալում էի, որ եթե արդարացման ակտ չկայացնի, ամեն դեպքում պետք է հետ վերադարձվեր գործը նոր քննության: Դա էի ավելի շատ հնարավոր համարում», -Panorama.am-ի թղթակցի հետ զրույցում մեկնաբանելով այսօր Վճռաբեկ դատարանի կայացրած որոշումը ասաց տղաների փաստաբան Ստեփան Ոսկանյանը, որը ներկա չէր այսօրվա դատաքննությանը: Նշենք, որ այս գործով անազատության մեջ գտնվող Տիգրան Առաքելյանի փաստաբանը Վահե Գրիգորյանն է:

Նրա խոսքով, Վճռաբեկ դատարանի հիմքում Վերաքննիչ դատարանի կողմից թույլ տված քրեադատավարական նորմերի խախտումներն են եղել: «Չնայած էական այլ խախտումներ էլ կային, և ես այս պահին չգիտեմ, դրանց անդրադարձե՞լ է Վճռաբեկ դատըարանը, թե՞ ոչ», -հավելեց փաստաբանը` նկատելով, որ Վերաքննիչ դատարանում թույլ տված խախտումների համարում է այն, որ ամբաստանյալներին թույլ չի տրվել հանդես գալ ավարտական ելույթով նույն հնարավորությունից զրկվել են նաև պաշտպանները, ինչպես նաև այն, որ վկաները չեն կանչվել դատարան:

«Վճռաբեկ դատարանը կարող էր արդարացման վերաբերյալ դատական ակտ կայացնել: Պարզապես երևի ցանկացել են այդ բոլոր խախտումները վերացնել ու նոր հետո սկսել», -հավելեց փաստաբանը:

Նշենք, որ Վճռաբեկ դատարանն այսօր որոշել էր մասնակիորեն բավարարել փաստաբանների բողոքը և հետ ուղարկել գործը Վերաքննիչ քրեական դատարան` նոր քննության: Փաստաբանները իրենց Վճռաբկ բողոքում խնդրել էին բեկանել առաջին ատյանի դատարանի վճիռը, կարճել գործի քննությունը կամ կիրառված պատիժը մեղմացնել:

Հայաստանի Վերաքննիչ քրեական դատարանը՝ դատավոր Արմեն Դանիելյանի նախագահությամբ, 2012-ի նոյեմբերի 13-ին մերժել էր Հայ Ազգային Կոնգրեսի 4 երիտասարդ ակտիվիստներ Տիգրան Առաքելյանի, Արտակ Կարապետյանի, Սարգիս Գևորգյանի, Դավիթ Քիրամիջյանի բողոքները, որով պահանջվում էր բեկանել Կենտրոն և Նորք Մարաշ վարչական շրջանների ընդհանուր իրավասության դատարանի վճիռը և կայացնել արդարացման դատավճիռ: Սակայն Վերաքննիչ դատարանը օրինական ուժի մեջ էր թողել առաջին ատյանի վճիռը:

Նշենք, որ ըստ առաջին ատյանի դատարանի վճռի, ՀԱԿ ակտիվիստ Տիգրան Առաքելյանը դատապարտվել էր 6 տարվա, Արտակ Կարապետյանը՝ 3 տարվա, իսկ Սարգիս Գևորգյանն ու Դավիթ Քիրամիջյանը՝ 2-ական տարվա ազատազրկման:

Վճռաբեկ դատարանի որոշումն ուժի մեջ է մտնում հրապարակման պահից:

Նախորդող հրապարակումներ. ՀԱԿ ակտիվիստների գործը վերաքննիչը կքննի նորից

Վերաքննիչ դատարանը անփոփոխ թողեց ՀԱԿ ակտիվիստների նկատմամբ առաջին ատյանի դատարանի վճիռը (տեսանյութ)

«Հան-ցա-գործ-ներ, ա-մոթ». Վերաքննիչ դատարանում ՀԱԿ ակտվիստների դատն անցավ լարված մթնոլորտում