Ձեր վստահելի աղբյուրը

«Շուշիի ազատագրումը ժողովրդի դափնիներն են, ղարաբաղյան պատերազմի հաղթանակը ժողովրդի պայքարի արդյունքն է», -այսօր լրագրողների հետ հանդիպման ժամանակ հայտարարեց արցախյան ազատամարտի հերոս, «Սասուն» ջոկատի հրամանատար Սասուն Միքայելյանը` պատասխանելով հարցին, թե ի վերջո ումն են Շուշիի ազատագրման դափնիները: Միքայելյանի պնդմամբ, հայ ժողովուրդն է ազատագրել Շուշին` «մեկը զենք ա վերցրել, մյուսը գրիչ, մեկի տունը ցուրտ ա մտել, մեկի տունը հաց չի եղել»:

«Մենք Շուշիի Քյոսալարի բարձունքն էինք վերցնում, բարձունքը վերցնելու հետ մի հայ արծիվ Շուշվա վրա սավառնեց: Ասի տղերք` հայոց արծիվ Շուշին բերեց, Շուշին ազատագրվեց: Դրանից մի ժամ հետո վիրավորվել եմ: Էդ կարճ ժամանակահատվածն ա եղել իմ ուրախության հատվածը»,- պատմեց Միքայելյանը: Նրա համար ցավալի է, որ հայոց պատմությունն այժմ սրբագրվում է ու հերոսները ճիշտ չեն ներկայացվում: «Նորմալ ա, որոշ մարդիկ են ազատագրել Ղարաբաղը, որոնք ընդհանրապես տեղյակ չեն ոչ մի բանից»,- հայտարարեց Սասուն Միքայելյանը:

Ավագանու ընտրություններ

Անդրադառնալով Երևանի ավագանու և 2009-ին, և 2013-ին տեղի ունեցած ընտրություններին, Միքայելյանն ասաց, որ տարբերություններ կան. «Որքան էլ իշխանությունները մասսայական խախտումներ են արել, բայց այն մարդիկ, ովքեր համախոհ են տվյալ կուսակցությանը, իրենց ձայնը տվել են»: Նշենք, որ Սասուն Միքայելյանը Հայ Ազգային կոնգրես դաշինքի նախկին անդամ է: Նրա կարծիքով, այսօր ժողովրդի շրջանում միասնականությունն է պակասում և այդ հարցում իշխանությունները մտածելու բան ունեն: «Իշխանությունները պետք է մտածեն երկիրը ոչ թե ի շահ անհատի ծառայեցնելու, այլ պետության շահերի հիման վրա առաջ տանելու մասին»,- նկատեց Միքայելյանը:

Սասուն Միքայելյանը երբեք չի դառնա ՀԱԿ անդամ 

Ազատամարտի հերոսը վստահ է, որ առաջիկա մեկ տարում նոր ընդդիմություն կձևավորվի, քանի որ «Հայաստանում կան առողջ ուժեր ու անհատներ, ովքեր այս տարիների ընթացքում չեն կորցրել իրենց «ես»-ը»: Ամենամեծ դժբախտությունն այն է, որ իշխանությունը ոչ թե պետականության հիմքերը ամրապնդելու համար է գործում, այլ որոշ անհատների շահերը կամ պաշտոնը պահելու համար»,- ասաց արցախյան ազատամարտի հերոսը: Լրագրողները հետաքրքրվեցին, թե ինչո՞ւ չի ստացվում, որ այսօր ընդդիմադիր դաշտը միավորվի, Միքայելյանն ի պատասխան արձագանքեց կարճ. «Որովհետև էդքան էլ ընդդիմադիր չեն»: Մյուս հարցին, թե հնարավո՞ր է, որ նոր ուժի լիդերը լինի Նիկոլ Փաշինյանը, Միքայելյանը պատասխանեց ռուսերեն. «Тонкий намек на толстых обстоятельтвах. Ժամանակը ցույց կտա»: 

Ինչ վերաբերում է նորաստեղծ ՀԱԿ կուսակցությանը, ապա Միքայելյանը հայտարարեց, որ ինքը երբեք չի անդամակցի այդ ուժին: Թեպետ իր խոսքով, ինքը ավագանու ընտրություններին սատարել է ՀԱԿ թեկնածու Վահագն Խաչատրյանին, բայց ինքն այլ կերպ է պատկերացնում ընդդիմադիր պայքարը: «Չեմ ուզում որևէ մեկին վարկաբեկել կամ Լևոն Տեր-Պետրոսյանի հասցեին վատ բան խոսեմ, բայց քանի որ էսօր Շուշիի ազատագրման օրն է, ուզում եմ զինվորական տերմինով բացատրեմ. ի՞նչ արեց Լևոն Տեր-Պետրոսյանը. Լևոն Տեր-Պետրոսյանը հզոր զորքը թողեց, գնաց… իմանո՞ւմ եք, չէ՞, որ 93 թվականին եռամսյա զորավարժությունների համար մարդ էին հավաքում: Այսինքն` զորքը թողեց հրապարակներում, նոր սկսել է եռամսյա վարժական հավաքներում մարդ հավաքել: Դրա համար էլ արդյունքն էս էր»,- ասաց Սասուն Միքայելյանը:

Կառավարության նոր կազմի մասին

«Գումարելիների տեղերը փոխելիս, գումարը չի փոխվում», -խոսելով կառավարության նոր, բայց գրեթե չփոփոխված կազմի մասին, ասաց Սասուն Միքայելյանը ու հավելեց. «Արտագաղթը դրանից չի կանգնելու; Իսկ ես տարիներ առաջ, դրա համար եմ զենք վերցրել»: