Ձեր վստահելի աղբյուրը

Ընտրություններից հետո գների բարձրացումն անխուսափելի է: Այս մասին այսօր լրագրողների հետ հանդիպման ժամանակ ասաց ՀՀ սպառողների ասոցիացիայի նախագահ Արմեն Պողոսյանը: Նրա խոսքերով՝ փորձը ցույց է տալիս, որ ընտրությունների և գների բարձրացման միջև ուղիղ կորելյացիոն կապ գոյություն ունի: «Ամեն ընտրությունից առաջ գները որոշ չափով  սառեցվում են, իսկ ընտրություններից հետո գների բարձրացման նոր ալիք է սկսվում»,- ասաց Ա.Պողոսյանը:

Նա ընդգծեց, որ գները վերջին 3 ամսում բարձրացել են 7-10%-ով: Ա. Պողոսյանը նկատեց նաև, որ գազի գինն արդեն բարձրացել է, պարզապես թանկացումը զսպվել է ընտրությունների պատճառով: «Իսկ ո՞վ չգիտի, որ գազը թանկանալու է: Մենք առայժմ վճարում ենք նախկին գնով, բայց մեր միջպետական հաշվարկներում արդեն այն թանկացել է: 180 դոլար արժողությամբ գազն արդեն ներկրվում է 245 դոլարով: Ամեն տարի գազի գինը բարձրանում էր ապրիլին, իսկ այս տարի ընտրությունների և այլ հանգամանքերի պատճառով գործընթացը սառեցվել է: Կարծում եմ, որ գազից հետո կբարձրանա նաև էլեկտրաէներգիայի գինը»,- ասաց նա:

Ըստ Ա.Պողոսյանի՝ կա գների նոմինալ և կրիմինալ բարձրացում: «Նոմինալի դեմ պայքարում ենք այնքանով, որքանով կարողանում ենք, իսկ կրիմինալի դեմ պայքարելն այդքան էլ հեշտ չէ: Օրինակ՝ հացը, շաքարավազը վաճառվում են որակական չափանիշներին ոչ համապատասխան: Բացի գնի նոմինալ բարձրացումից կա կեղծ բարձրացում. վաճառվում է խոնավ շաքարավազ և թեթև քաշով հաց: Այսինքն՝ գինը մնում է նույնը, սակայն նվազում է քաշը կամ որակը»,- նշեց Ա.Պողոսյանը:

Նա հայտնեց, որ Սպառողների ասոցիացիան այս տարվա հունվարին դիմել է ՀՀ նախագահի վերահսկողության ծառայությանը, իսկ ապրիլին՝ Սերժ Սարգսյանին, սակայն պատասխան չի ստացվել, միայն տեղեկացել են, որ նամակները հասցեագրվել են Սննդամթերքի անվտանգության պետական ծառայությանը: «Պահանջը հետևյալն է՝ առաջարկում ենք անցկացնել ստուգայց, որպեսզի պարզեն հացի և շաքարավազի քաշի որակական հատկանիշները, ինչպես նաև բացահայտեն, թե դրա հետևանքով որքան է կեղծվում գինը»,- ասաց Ա.Պողոսյանը՝ հավելելով, որ իրենք այդուհանդերձ դեռևս սպասում են Նախագահի պատասխանին: