Ձեր վստահելի աղբյուրը

 Այսօր Սինոփսիս Արմենիայի գիտաարտադրական կենտրոնում Տեղեկատվական տեխնոլոգիաների ոլորտում ՀՀ Նախագահի ամենամյա կրթական պարգևի «Հաղթողների ակումբի» անդամները և Հայաստանի պետական ճարտարագիտական համալսարանի միկրոէլեկտրոնային սխեմաների ոլորտի ուսանողները հանդիպեցին Հայաստանում ԱՄՆ դեսպան Ջոն Հեֆֆերնի հետ: Հանդիպմանը ներկա էին ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, Հայաստանի արդյունաբերողների և գործարարների (գործատուների) միության նախագահ Արսեն Ղազարյանը, Վիասֆեր Ինթերնեյշնլ ընկերության գլխավոր գործադիր տնօրեն և համանախագահ Թոնի Մորոյանը և այլ հյուրեր:

Ինչպես հանդիպման բացմանը նշեց Նախագահական կրթական պարգևի մրցանակաբաշխության հանձնաժողովի նախագահ Հովիկ Մուսայելյանը, հեղինակավոր մարդկանց հետ նման հանդիպումները չափազանց կարևոր են ուսանողների և կրթական պարգևի հաղթողների համար:

«Նրանք անմիջական շփում են ունենում հետաքրքիր և հարուստ կենսափորձ ունեցող մարդկանց հետ և հնարավորություն են ունենում ստանալ իրենց հուզող հարցերի պատասխանները», - ասաց Հ. Մուսայելյանը ` հավելելով, որ այս հանդիպումները չափազանց կարևոր են նաև հյուրերի համար, ովքեր շփվելով երիտասարդների հետ` ստանում են նրանցից իրատեսական արձագանք երկրում տիրող իրավիճակի վերաբերյալ:

Նշենք, որ հանդիպումը տեղի ունեցավ «խարույկի շուրջ զրույցի» (fireside chat) ձևաչափով, որտեղ Հայաստանում ԱՄՆ դեսպան Ջոն Հեֆֆերնը և Սինոփսիս ընկերության մարքեթինգի գծով փոխնախագահ և Սինոփսիս Արմենիա ՓԲԸ-ի գործադիր տնօրեն Ռիչ Գոլդմանը ոչ ֆորմալ զրույց վարեցին տարբեր թեմաներով:

Ջ.Հեֆֆերնը նախ պատմեց, թե ինչպես է սկսել իր դիվանագիտական գործունեությունը: Անդրադառնալով Հայաստանին` դեսպանը նշեց` « Հայաստանը բարդ երկիր է` կապված 1915թ-ի իրադարձություններ հետ»: Դեսպանի խոսքերով` ինքն ուղղակի ենթարկվում է ԱՄՆ նախագահին, բայց նաև իր խողովակներով փորձում է ճնշում գործադրել ԱՄՆ նախագահի վրա` 1915 թ-ի իրադարձությունների ընդունման համար. «Իմ միջոցով որոշակի ճնշում է գործադրվում ԱՄՆ նախագահի վրա` 1915թ-ի իրադարձությունների ճանաչման հետ կապված»:

Նա նշեց, որ Հայաստան գալով` չգիտեր, թե ինչ պետք է ակնկալեր այս երկրից: «Ուսումնասիրելով Հայաստանը` ակնկալում էի այն տեսնել ավելի սովետական, ավելի փակ: Հայաստանը ավելի շատ մոխրագույն էի պատկերացնում, բայց տեսա, որ մարդիկ տաղանդավոր են, ջերմ, ինչն ինձ բավականին զարմացրեց», - ընդգծեց Ջ.Հեֆֆերնը:

Դեսպանին հատկապես զարմացրել է այն, որ չնայած փակ սահմաններին, հայերը գտնում են ուղիներ առավել զարգանալու և հաջողակ դառնալու համար: Խոսելով Հայաստանի տնտեսությունից, Ջ.Հեֆֆերնը նշեց, որ Հայաստանի ապագան կայանում է գիտությունների վրա հիմնված տնտեսության մեջ: Հայաստանը, ըստ նրա, հատկապես մեծ հաջողություններ կարող է ունենալ տեղեկատվական տեխնոլոգիաների ոլորտում: Ի դեպ, դեսպանը նկատեց, որ զարմացել է, երբ տեսել է, որ Հայաստանի ՏՏ ոլորտում մեծ թվով կանայք են ներգրավված: «ԱՄՆ-ում հիմնականում ՏՏ ոլորտում աշխատում են տղամարդիկ, գուցե 10 տոկոսը կանայք լինեն, բայց Հայաստանում այդպես չէ, այստեղ կանայք շատ տաղանդավոր են»,- նկատեց դեսպանը:

Նա միաժամանակ նշեց, որ տնտեսության զարգացման համար հարկավոր է, որպեսզի բիզնես միջավայրը լինի ավելի բաց և թափանցիկ: Ըստ Ջ.Հեֆֆերնի` պետք է արդար մրցակցություն լինի, որպեսզի փոքր և միջին բիզնեսը կարողանա աշխատել: Ըստ նրա` բիզնեսում պետք է լինի օրենքի գերակայություն, թափանցիկություն, ճիշտ մրցակցություն և կանխատեսելիություն:

«Մենք բաց ենք մեր հարաբերություններում Հայաստանի հետ և փորձում ենք օգնել Հայաստանին, որպեսզի այն ժողովրդավարական երկիր դառնալու գործում հաջողություններ ունենա: Մենք, բնականաբար, չենք փորձում փոխարինել Ռուսաստանին, բայց համոզված ենք, որ Հայաստանը օգուտ կունենա, եթե համագործակցի ԱՄՆ-ի և Արևմտյան Եվրոպայի հետ»,- ասաց դիվանագետը:

Հանդիպմանը հաջորդեցին հարցուպատասխանի ձևաչափով քննարկումներ: