«Ընթերցման օլիմպիադա»… Աշակերտ-հերոսներ

Կրթություն, գիտություն 15:52 14/05/2013

Հայաստանի գրողների միությունում ընթանում է «Ընթերցման օլիմպիադայի» եզրափակիչ փուլը, որի ընթացքում հայտնի կդառնա Հայաստանի լավագույն ընթերցողը: Օլիմպիադայի առաջին փուլը կայացել է նոյեմբերին: Եզրափակիչ փուլ է անցել 33 աշակերտ: Օլիմպիադան միայն 6-րդ դասարանցիների շրջանում է անցկացվել:

Նշենք, որ մրցույթը կազմակերպվել էր ՀՀ կրթության և գիտության, ՀՀ մշակույթի նախարարությունների և «Անտարես» հրատարակչության կողմից:

Երեխաները նախ ընթերցում են իրենց նախընտրած ստեղծագործությունը, այնուհետև արդեն ժյուրիի կողմից առաջարկված ստեղծագործությունը: Ժյուրիի կազմում ընդգրկված են գրականագետներ, ինչպես նաև մրցույթին աջակցություն ցուցաբերող ընկերություններից երկայացուցիչներ:

«Անտարես» հրատարակչության նախագահ Արմեն Մարտիրոսյանը Panorama.am-ի հետ զրույցում ասաց , որ իրենք կիրառել են գերմանական մոդելը: Ըստ նրա, առաջին երեք հաղթողները կստանան մրցանակներ, բոլոր մասնակիցները կստանան պատվոգրեր, աջակից ընկերությունները նույնպես մրցանակներ են պատրաստել. «Մեր խնդիրն էր ընթերցող աշակերտին դարձնել հերոս շրջապատի համար»: Այսինքն, հաղթողները այնպիսի մրցանականեր են ստանում, որ ոչ թե կոնկրետ իրենց անձին է վերաբերում, այլ ամբողջ շրջապատին: Օրինակ, մշակույթի նախարարությունը հաղթող երեխաների դպրոցների գրադարաններին գրքեր է նվիրաբերելու:

Ա. Մարտիրոսյանը հույս հայտնեց, որ «Ընթերցման օլիմպիադան» կլինի շարունակական:

Նշենք, որ ժամը 17:00-ին ՀՀ մշակույթի նախարար Հ. Պողոսյանի, կրթության և գիտության նախարար Ա. Աշոտյանի և ԱՄՆ դեսպանատան ներկայացուցչի մասնակցությամբ տեղի կունենա մրցանակների հանձնման հանդիսավոր արարողությունը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: