Ձեր վստահելի աղբյուրը

«Հայ ազգային կոնգրես» կուսակցությունը, մյուս ոչ իշխանական ուժերը Երևանի ավագանու ընտրական պայքարում ռազմավարական կոպիտ սխալներ են թույլ տվել. նրանք քարոզարշավ են տարել, ոչ թե ընտրական կամպանիա: Ասուլիսում նման տեսակետ հայտնեց քաղաքական և ընտրական տեխնոլոգիայի փորձագետ Արմեն Բադալյանը: Նրա դիտարկմամբ, ոչ իշխանական քաղաքական ուժերը մրցունակ չէին, որովհետև նրանք ընտրական կամպանիայի ընթացքում մեխը դրեցին ՀՀԿ-ին քննադատելու վրա, մինչդեռ պետք է ներկայացնեին իրենց ծրագիրը, այսինքն պետք է այնպես անեին, որ ժողովուրդն ընտրեր այսօրվա ու վաղվա Երևանի միջև:

Մ. Բադալյանի խոսքով, այդ ոչ իշխանական ուժերին նույնիսկ չի հաջողվել ժողովրդի շրջանում հստակեցել, որ ՀՀԿ ցուցակը գլխավորող Տարոն Մարգարյանը ՀՀԿ-ական է: Նա նշեց, որ ընտրողներից մեկն ընտրել է Տարոն Մարգարյանին` չիմանալով, որ նա ՀՀԿ-ական է. «Ես դեմ եմ ՀՀԿ-ին, ես ընտրում եմ Տարոն Մարգարյանին»: Ըստ նրա, նման ընտրողները շատ են եղել:

Քաղաքագետ Մանվել Սարգսյանն էլ այն կարծիքին է, որ քարոզարշավն ընդհանրապես կապ չունի. «Եթե ազատ ընտրություններ անցկացնելու հնարավորություն չկա, ընտրողը ճնշված է կամ կաշառավում է, ինչ նշանակություն ունի այս կամ այն կապմանիան: Նշանակություն ունեն քաղաքական վերնախավում գոյություն ունեցող պայմանավորվածությունները»:

Ըստ Ա. Բադալյանի, Երևանի ավագանու ընտրություններից հետո Երևանում վերջնականապես ծնվեց «պետություն պետության մեջ, կրիմինալ բուրգ, որի անդամ են փողոցի կրիմնիալը, ոստիկանությունը, համատիրությունները, թաղապետարանները, փողատերերը»: «Հայաստանում ստեղծվել է կրիմինալ էրգենեկոն»,- նման դիտարկում արեց քաղտեխնոլոգը:

Նրա խոսքով, այս պայմաններում ընդհանրապես կապ չունի ավագանի անցած ԲՀԿ-ն ու «Բարև Երևանը» կվերցնեն իրենց մանդատները, թե ոչ: «Վերցնեն, թե չեն վերցնի, զրո է, քանի որ ավագանիում ոչինչ չի որոշվում, այլ այդ կրիմինալ բուրգն է որոշումներ ընդունում, ու եթե Տարոն Մարգարյանը չհաստատի այդ որոշումները:… Նրա գործը ՀՔԾ-ում է, դրա համար կենթարկվի»,-ասաց Ա. Բադալյանը: