Արծվիկ Մինասյան. «Եթե իշխանությունը ականջալուր չլինի, ապա թանկացումները կբերեն զանգվածային բողոքի»
«Սա հասարակության ընդվզումն է այն քաղաքականության դեմ, որ իրականացվում է Հայաստանում», - այս մասին լրագրողների հետ զրույցում ասաց ՀՀ ԱԺ ՀՅԴ խմբակցության պատգամավոր Արծվիկ Մինասյանը` կառավարության շենքի առջև տեղի ունեցած բողոքի ակցիայի ժամանակ:
Հիշեցնենք, որ մի շարք քաղաքացիների նախաձեռնությամբ այսօր ՀՀ կառավարության շենքի առջև տեղի ունեցավ բողոքի ակցիա` գազի սակագնի թանկացման դեմ:
Ակցիային մասնակցում էին նաև ԱԺ պատգամավոր Արմեն Ռուստամյանը, «Բարև Երևան» դաշինքից՝ Արմեն Պողոսյանն ու Արթուր Իսպիրյանը:
Ա.Մինասյանը նշեց, որ այն ընկճվածությունը, որ ՀՀ իշխանությունները ցուցաբերում են անգամ գազի գնի հարցում, ցույց է տալիս, որ իշխանությունները ոչ միայն համարժեք քաղաքանություն չեն վարում երկրում ստեղծած իրավիճակի շուրջ, այլ նաև ունակ չեն գիտակցելու, հասկանալու, որ այս քաղաքականությամբ, այս մոտեցումներով պետությունը չի կարող զարգանալ:
«Ակցիայի նպատակն է իշխանություններին ստիպել, որպեսզի գիտակցեն իրենց պատասխանատվությունը, այլ ոչ թե նստեն աթոռներին և վայելեն իրենց ստացված ձայները»,- ասաց Ա.Մինասյանը:
Պատգամավորի խոսքերով` Հայաստանի տնտեսության բոլոր ոլոտներում այսօր ունենք լրջագույն խնդիրներ և պետք է դրանց լուծումները գտնել:
Պատասխանելով հարցին, թե շրջանառվող լուրերի համաձայն` գազի գինը բարձրանալու է ոչ թե 60, այլ 30 տոկոսով, Ա.Մինասյանը նշեց, որ դա հերթական մանիպուլյացիան է: «Նախ պետք է հարցադրում արվի` ինչո՞ւ է բարձրանում: Եթե Հայաստանի իշխանությունը այդքան կամք չունի դիմագրավելու Ռուսաստանի` մեր ռազմավարական գործընկերոջ կեցվածքին, ապա նշանակում է, որ այստեղ որևէ ռազմավարական գործընկերություն չկա, այլ կա ստրուկի և ստրկատիրոջ հարաբերություն»,- նշեց Ա.Մինասյանը:
Ըստ նրա` եթե իշխանությունը ականջալուր չլինի, ապա թանկացումները կբերեն զանգվածային բողոքի:
«Գազի բարձրացումը բերելու է հսկայածավալ գնաճի ձևավորման: Դրա համար նախ պետք է կասեցնել և չթողնել, որ գները բարձրանան: Նախ պետք է իրականացնել աշխատավարձերի և նպաստների բարձրացում, նոր անցում կատարել պլանավորված բարձրացման»,- ասաց Ա.Մինասյանը:
Նշենք, որ Կառավարության շենքի առջև տեղի է ունեցավ ստորագրահավաք՝ Հանրային ծառայությունները կարգավորող հանձնաժողովին հանձնելու համար, իսկ պատճենն ուղարկվելու է ՀՀ կառավարություն և Նախագահի աշխատակազմ:
ՀՀ կառավարության աշխատակազմի քաղաքացիների ընդունելության և դիմումների քննարկման վարչության պետ Ալեքսանդր Ղազարյանը ակցիայի մասնակիցներին ասաց, որ նրանց և կառավարության դիրքորոշումը համընկնում են. կառավարությունը ևս դեմ է գազի գնի բարձրացմանը:
Նշենք, որ կառավարության այսօրվա նիստում վարչապետ Տիգրան Սարգսյանը հայտարարեց, որ Կառավարությունը 30%-ով սուբսիդավորելու է գազի գինը:
Լրահոս
Տեսանյութեր
Թշնամnւ հրահանգները մեր կյանք տեղափոխողները Հայաստանի թշնամիներն են. Բագրատ Սրբազան
