Ձեր վստահելի աղբյուրը

ՀՀ առողջապահության նախարար Դերենիկ Դումանյանի գերմանական հանրահայտ «ՍՏԱԴԱ» դեղագործական կազմակերպության ղեկավարության հետ այսօր կայացած հանդիպումը նպատակ ուներ նպաստելու Հայաստանում դեղերի մատչելիության բարձրացմանը։ Հանդիպմանը մասնակցել է նաև «Էրեբունի» ԲԿ-ի տնօրեն Հարություն Քուշկյանը:

Ինչպես տեղեկացնում են ԱՆ-ից, հանդիպման ընթացքում կողմերը քննարկել են եվրոպական Պատշաճ արտադրական գործունեության կանոններին (GMP) համապատասխանող դեղերը մատչելի գներով Հայաստան ներմուծելու գործընթաց սկսելու հարցը: ՀՀ առողջապահության նախարար Դերենիկ Դումանյանը նշել է, որ այսօր հանրապետությունում շրջանառվող դեղերի միայն 7-8% է արտադրվում Հայաստանում, իսկ մնացած մասը ներմուծվում է այլ երկրներից: Կարևորելով բնակչության համար անհրաժեշտ դեղերով ապահովվածության խնդիրը` նախարարը ողջունել է «ՍՏԱԴԱ» կազմակերպության համագործակցության նախաձեռնությունը` դրանց մատչելիության ապահովման ուղղությամբ:

Նախարարը «ՍՏԱԴԱ» կազմակերպության խորհրդի անդամներին է ներկայացրել ուռուցքաբանության ոլորտում ՀՀ նախագահի հովանու ներքո իրականացվող մեծածավալ ծրագրերը։ Մասնավորապես` անդրադարձել երկրում ուռուցքաբանության և արյունաբանության զարգացման նպատակով նոր կենտրոնների ստեղծմանը` այդ ենթատեքստում առաջնահերթ խնդիրներից մեկը համարելով հակաուռուցքային դեղերի առավել մատչելի գներով ձեռքբերումը։

Նա նաև հույս է հայտնել, որ «ՍՏԱԴԱ» կազմակերպության հետ նոր սկսվող համագործակցության արդյունքները կզգացվեն մոտ ապագայում:

Միաժամանակ Դ.Դումանյանն իր գոհունակությունն է հայտնել Հեյդելբերգի համալսարանական կլինիկայի ղեկավար, պրոֆեսոր Քրիստոֆ Զոնի կողմից վերջին տարիներին Հայաստանում կրծքագեղձի քաղցկեղի բուժման գործում կատարված ներդրման և բազմաթիվ հայ կանանց կյանքի որակը բարելավելու կապակցությամբ:

Պրոֆեսոր Զոնն իր հերթին պատրաստակամություն է հայտնել այդ ծրագիրը շարունակելու, ինչպես նաև հայ-գերմանական ասոցիացիայի հիմնադրման շրջանակներում ուռուցքաբական կենտրոնի հետ համագործակցության նոր ծրագիր սկսելու առումով։
Աղբյուրը նշում է , որ «ՍՏԱԴԱ» կազմակերպությունը հիմնադրվել է 1895 թվականին Գերմանիայի Դաշնության Դրեզդեն քաղաքում: ՍՏԱԴԱ-յի ավելի քան 15 հազար արտադրատեսակները հիմնականում շրջանառվում են Գերմանիայի, Ռուսաստանի, Իտալիայի, Բելգիայի և Իսպանիայի շուկաներում: