Ձեր վստահելի աղբյուրը

 Իրանի հայկական պատմական եկեղեցիները պատկանում են ոչ միայն հայերին, այլև ողջ աշխարհի մարդկությանը:
Այդ մասին իրանական «ԻՍՆԱ» լրատվական գործակալության հաղորդմամբ՝ հայտարարել է Ատրպատականի հայոց թեմի առաջնորդ Գրիգոր Չիֆթչյանը:

Համաձայն տեղեկատվության՝ բարձրաստիճան հայ հոգևորականը Արևելյան Ատրպատական (Արևելյան Ազարբայջան) նահանգի զբոսաշրջության և ձեռքի աշխատանքների կազմակերպության ղեկավարի հետ հանդիպման ժամանակ, բարձր գնահատելով Իրանում հայկական եկեղեցիների վերականգնման և պահպանության հարցում նահանգային իշխանությունների կողմից կատարված աշխատանքները, նշել է, որ հայկական եկեղեցիների նկատմամբ Իրանի իշխանությունների նման հոգատարությունը բոլոր կրոնների նկատմամբ դրսևորվող հարգանքի նշան է:

«Իրանում գտնվող հայկական պատմական եկեղեցիները առաջին հայացքից թվում է, թե պատկանում են հայերին, սակայն իրականում դրանք պատկանում են Իրանի բնակչությանը և ողջ աշխարհի մարդկությանը»,-հավելել է Ատրպատականի հայոց թեմի առաջնորդ Գրիգոր Չիֆթչյանը:

Հիշեցնենք, որ վերջերս ԻԻՀ Մշակութային ժառանգության կազմակերպության փոխնախագահ Մասուդ Ալավիան Սադրը իրանական «ՖԱՐՍ» լրատվական գործակալությանը տված հարցազրույցում, խոսելով Իրանում գտնվող հայկական մշակութային կոթողների մասին, մասնավորապես նշել էր. «Իրանի Արևմտյան Ատրպատական (Արևմտյան Ազարբայջան) նահանգում գտնվող հայկական Ղարաքիլսա եկեղեցին Իրանի 9 պատմամշակութային կառույցների թվում արդեն ընդգրկվել է ՅՈՒՆԵՍԿՕ-ի մշակութային ժառանգության ցուցակում: Արևմտյան Ատրպատականում՝ Մակուում, է գտնվում հայկական մյուս եկեղեցին՝ Սուրբ Մարիամը: Իրանում գտնվող մյուս կարևոր վանական համալիրը՝ դա Սուրբ Ստեփանոս (10-12-րդ դ.) հայկական եկեղեցին է, որը գտնվում է Արևելյան Ատրպատականում, Ջուլֆայում՝ Արաքս գետի ափին»:

Նախորդող հրապարակումներ՝
Ատրպատականի հայոց թեմի առաջնորդ. Իրանահայերն օժտված են բավականաչափ ազատությամբ

Ատրպատականի հայոց թեմի առաջնորդ. Իրանի հոգևոր առաջնորդն աստվածային կրոնների միջև երկխոսության ջատագովն է