Թ. Մանասերյան. «ՀայՌուսգազարդը» պետք է ներկայացնի թափանցիկ հաշվետվություն
«Հայաստանում գազի գնագոյացման հարցը երկու հարթության վրա կարելի է դիտարկել: Առաջինն այն գինն է, որը մեզ առաջարկում է Ռուսաստանի Դաշնությունը, և երկրորդն այն գինն է, որ «ՀայՌուսգազարդը» ներկայացնում է սպառողին: Առաջին դեպքում արվել է հնարավորը ավելի ցածր սակագին ձեռք բերելու համար, սակայն ստեղծվում է տպավորություն, որ այն համարժեք ձևով չի հասնում սպառողին»,- անդրադառնալով Հայաստանում գազի գնագոյացման վերաբերյալ հարցին, Panorama.am-ի հետ զրույցում նման տեսակետ հայտնեց «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանը:
Չմանրամասնելով, թե կոնկրետ ինչ է արվել Ռուսաստանից ավելի ցածր սակագին ձեռք բերելու առումով՝ նա կենտրոնացավ «ՀայՌուսգազարդի» կողմից սպառողին ներկայացվող վերջնական սակագնի ձևավորման խնդրի վրա և նշեց, որ վերջնական սակագնի և շահույթի նորմայի մեջ «ՀայՌուսգազարդը» ավելացնում է այնպիսի կոմպոնենտներ, որոնք վաղուց արդեն նվազման միտում ունեն: Տնտեսագետը, առանց թվեր մատնանշելու, ընդգծեց նվազող ներդրումների հարցը:
«Եթե նախկինում Հայաստանում լայնամասշտաբ ներդրումներ էին կատարվում և այդ ծախսերը, բնականաբար, մտնում էին շահույթի մեջ, ապա այսօր մենք շատ լավ գիտենք, որ ընդհանուր առմամբ Հայաստանի գազաֆիկացումը, ըստ էության, ավարտվել է: Սա նշանակում է, որ «ՀայՌուսգազարդը» պետք է վերանայի իր ֆինանսական քաղաքականությունը»,- ընդգծեց Թ. Մանասերյանը:
Տնտեսագետի դիտարկմամբ, «ՀայՌուսգազարդի» կողմից սահմանվող սակագնի ձևավորման առումով հստակություն մտցնելու համար Հանրային ծառայությունները կարգավորող հանձնաժողովը պետք է հրապարակային քննարկումներ կազմակերպի և հրավիրի «ՀայՌուսգազարդ» ընկերությանը՝ ներկայացնելու թափանցիկ հաշվետվություն առ այն, թե ինչի վրա են ծախսվում այն միջոցները, որոնք ներառվում են սակագնի մեջ, այն տարբերությունը, մարժան, որը կա սահմանից մինչև սպառողն ընկած հատվածում:
Ռուսաստանի կողմից գազի սակագնի բարձրացման պատճառների մասին խոսելիս՝ Թ. Մանասերյանը նկատեց, որ ռուսական կողմի հետ Հայաստանը չի կարող քննարկման առարկա դարձնել Ռուսաստանի այն քաղաքականությունը, որը տարածվում է բացառապես բոլոր երկրների նկատմամբ:
«Մենք կարող ենք որոշ առումով բանակցություններում հաշվի առնել ռազմավարական գործընկերության կարգավիճակը: Այնուամենայնիվ, ընդհանուր առմամբ Ռուսաստանի կողմից տարվում է նույն չափորոշիչներով քաղաքականություն արտաքին առևտրի ասպարեզում, և մենք չէ, որ պետք է ներազդենք դրա վրա»,- ասաց նա:
Ինչ վերաբերում է հարցին, թե այդ դեպքում ինչի՞ շուրջ է բանակցում Հայաստանի կառավարությունը Ռուսաստանի հետ, տնտեսագետը պատասխանեց, թե հայ-ռուսական բանակցությունները բաց չեն եղել, որպեսզի հնարավոր լինի քննարկել այդ հարցը՝ միաժամանակ ենթադրելով, որ բանակցությունների ընթացքում հանրապետության ղեկավարության կողմից արվել է հնարավոր ամեն ինչ, որպեսզի մեղմվի սակագինը:
«Եթե նայենք Ռուսաստանի կողմից տարբեր երկրներին առաջարկվող սակագնին, ինչպիսիք են Եվրամիության երկրները, Ուկրաինան, Թուրքիան և այլն, կտեսնենք, որ Հայաստանը համեմատաբար ավելի շահեկան վիճակում է: Ուրիշ բան, որ այդ սակագինը սահմանից մինչև սպառող համարժեք ձևով չի հասնում»,- նկատեց նա:
Վերջինս հավելեց, թե իր կարծիքով «ՀայՌուսգազարդի» ծախսային մոտեցումները, որոնք ներառվում են գազի սակագնի մեջ, հիմնավոր չեն, ինչի առնչությամբ նա կարևորեց ռեսուրսների օգտագործման նկատմամբ վերահսկողության ուժեղացումը:
Նախորդող՝ Հանձնաժողովի ներկայացուցիչ. Գազի գինը կսահմանվի 1խմ դիմաց՝ 156 դրամ
Հրանտ Բագրատյանը հաշվարկներ է կատարել ու եզրակացրել. Կարելի էր նույնիսկ գազի գին չբարձրացնել
Գազի գինը կդառնա՞ 221 հազար դրամ. «ՀայՌուսգազարդ»-ը բնական գազի գնի վերանայման հայտով դիմել է ՀԾԿՀ-ին
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
