Ձեր վստահելի աղբյուրը

Երևանի ավագանու ընտրություններից մեկ օր առաջ` «լռության օրը» և քվերակությանն անմիջապես հաջորդող գործընթացները բնութագրվում են այն բանով, որ դրանք կամ ընդհանրապես չեն կարգավորվում ընտրական օրենսդրությամբ, կամ էլ այդ կարգավորման մեջ մի քիչ կոնկրետություն չկա:

Լրագրողների հետ հանդիպման ժամանակ, ներկայացնելով Հայաստանի հեռարձակվող ԶԼՄ-ներում Երևանի ավագանու 2013թ. ընտրությունների և հետընտրական գործընթացների լուսաբանման մշտադիտարկման հաշվետվության (մայիսի 4-19) արդյունքները, ասաց Երևանի մամուլի ակումբի նախագահ Բորիս Նավասարդյանը:

Նշենք, որ մշտադիտարկումն իրականացնում է Երևանի մամուլի ակումբը` Հայաստանում միջազգային չափանիշներին համապատասխան ընտրական գործընթացների կատարելագործման ծրագրի շրջանակներում, որն իրականացվում է ԵԱՀԿ երևանյան գրասենյակի ու ԵՄ ֆինանսական օժանդակությամբ: Հետազոտության օբյեկտ են Հ1-ը, Հ2-ը, «Երկիր Մեդիան», «Կենտրոնը», «Արմնյուզը», Հանրային ռադիոն և «Արմռադիո FM 107» ռադիոալիքը:

Բ. Նավասարդյանը նշեց, որ, ի տարբերություն նախորդ դիտարկումների, այս անգամ «Արմենիա» և «Շանթ» հեռուստաալիքները չեն ընդգրկվել ուսումնասիրվածների ցանկում, քանի որ դրանք նախկին ընտրությունների ժամանակ ամենաքիչն էին ուշադրություն դարձնում նախընտրական քարոզարշավին ու ընդհանուր պատկերի վրա չէին ազդում:

«Լռության օրը» լուսաբանումը երևան է հանել հայկական ընտրահամակարգի համար ակնհայտ օրենսդրական-նորմատիվ բացերը: Բացակայում են այնպիսի հստակ սահմաններն ու սահմանումները, թե ինչն է քարոզչություն հանդիսանում: Տարբեր հաղորդումներում այնպիսի դրվագներ են հայտնվել, որոնք կարող էին անմիջական ազդեցություն ունենալ քաղաքացիների ընտրության վրա:

Մայիսի 4-5-ին արձանագրվել է ընտրողներին ուղղորդող 60 դեպք. Հանրային ռադիոյում (14 դրվագ), «Երկիր մեդիայում» (12), «Արմռադիոյում» (10), Հ1-ում և Արմնյուզում (8-ական), «Կենտրոնում» և Հ2-ում (4-ական): Բ. Նավասարդյանը նշեց, որ պայմանական քարոզչության տարրերից «լռության օրերին» առավել հաճախ հնչել են նախընտարական խոստումներ, հիմնականում դրանք հնչել են ԲՀԿ-ի ներկայացուցիչմերի շուրթերից: Հնչեցվել են նաև այլ քաղաքական ուժերի նախընտրական կարգախոսները:

Ընտրություններից հետո առաջին ժամերին և օրերին` մայիսի 5-7-ը, հիմնականում քննարկվում էր ՀՀԿ-ն, այնուհետև` ԲՀԿ-ն, «Բարև Երևան» դաշիքնը:

Քվեարկության արդյունքների ամփոփման ժամանակաշրջանում լուսաբանման ծավալով մյուս հեռարձակողների բազմակի առավելությամբ առաջատարի դիրքերում է հայտնվել «Արմնյուզը», այնուհետև` «Երկիր մեդիան»:
Նշանային բնութագրիչներով լուսաբնման առումով մայիսի 5-7-ին հետազոտված ԶԼՄ-ների համագումարային տվյալներով ծայրահեղ անբարենպաստ է եղել ՀՀԿ-ի ու ԲՀԿ-ի հակակշիռը` համապատասխանաբար 38 և 37 բացասական անդրադարձ, դրականների իսպառ բացակայությամբ:

Հարաբերական անբարանպաստ է եղել նաև ՀԱԿ-ի լուսաբանումը` 6 բացասական ու ոչ մի դրական անդրադարձ: Այս երեք քաղաքական ուժերի նկատմամբ բացասականը մեծամասամբ կապված է ընտրախախտումների մեջ նրանց հասցեին հնչած մեղադրանքների հետ:
ԲՀԿ-ի առնչությամբ տեղեկություններ են եղել նաև դրա առանձին անդամների անվայելուչ արարքների մասին (ոչ անպայման ընտրությունների հետ կապված):

Մայիսի 5-19 հետազոտված հեռարձակողների եթերում արտահայտվել են պետական պաշտոնական մարմինների ներկայացուցիչները, նաև քաղաքական ընդդիմությունը, տեղական դիտորդները:
Միջազգային դիտորդներն ու կազմակերպությունները սահմանափակվել են ընտրությունների մասին միանվագ կարծիք հայտնելով: Ըստ դիտարկումների, հետազոտված հեռարձակողների եթերում հայ հանրության տարբեր կատեգորիաների կողմից ընտրությունների գնահատականը հիմնականում բացասական էր:

«Ընտրություններն ինտենսիվորեն քննադատել է քաղաքական ընդդիմությունը, նույնիսկ պաշտոնական մարմինների ներկայացուցիչնմերի արտահայտություններում էլ ընտրությունների բացասական գնահատականը գերակշռում է դրականին: Դա ամենից առաջ բացատրվումէ այն հանգամանքով, որ պաշտոնատար անձինք ստիպված էին եթերում հայտարարել խախտումների վերաբերյալ ահազանգերի մասին»,-ասաց Բ. Նավասարդյանը:

Նախորդող նորություններ`

ԶԼՄ-ների մշտադիտարկում. Քաղաքական ուժերը անզիջում պայքար են մղել

Մշտադիտարկում. Նախընտրական շրջանում ԶԼՄ-ների կողմից որևէ քաղաքական ուժի նկատմամբ նպատակուղղված խտրականություն չի արձանագրվել