Արագածոտնում հակակարկտային կայանների ավելացման խնդիր կա

Տնտեսություն 15:33 25/05/2013

Արագածոտնում հակակարկտային կայանների ավելացման խնդիր կա

Արագածոտնի մարզպետարանում անցկացվել է խորհրդակցություն, որի ընթացքում քննարկվել է մարզում ՀՀ արտակարգ իրավիճակների նախարարության համակարգին չպատկանող հակակարկտային կայաններն ընդհանուր համակարգին միացնելու նպատակահարմարության հարցը:

Տարածքային կառավարման նախարարության հասարակայնության հետ կապերի վարչության հաղորդմամբ, խորհրդակցությանը մասնակացում էին փոխվարչապետ Արմեն Գևորգյանը, մարզպետը, ՀՀ գյուղատնտեսության, արտակարգ իրավիճակների նախարարությունների ներկայացուցիչներ, պատասխանատու այլ անձինք:

Զեկուցվել է, որ մարզում առկա է ընդհանուր առմամբ 50 հակակարկտային կայան, որոնցից 30-ը տեղադրված է պետական ծրագրով, իսկ մյուս 20-ը` այլ հիմունքներով: Նշվել է, որ մարզի ցանքատարածություններն ու այգիները կարկուտից պաշտպանելու համար հակակարկտային կայանների թվի ավելացման անհրաժշտության կա: Քննարկվել են համայնքային ենթակայության կայանները միասնական ցանցին միացնելու, ինչպես նաև նոր կայաններ տեղադրելու հնարավորությունները:

Խորհրդակցությանը Կարբի և Օհանավան համայնքների ներկայացուցիչների մասնակցությամբ քննարկվել են նաև գյուղատնտեսական աշխատանքների ընթացքին և եղանակային անբարենպաստ պայմանների հետևանքով համայնքների գյուղատնտեսությանը հասցված վնասին վերաբերող հարցեր:

Ըստ աղբյուրի, ՀՀ արտակարգ իրավիճակների նախարարության համակարգին չպատկանող հակակարկտային կայաններն ընդհանուր համակարգին միացնելու նպատակահարմարության հարցն առաջիկայում կքննարկվի նաև Շիրակի մարզում, որից հետո փոխվարչապետի ղեկավարությամբ գործող աշխատանքային խումբն առաջարկություններ կներկայացնի կառավարությանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: