Ձեր վստահելի աղբյուրը

 Ադրբեջանի նախագահ Իլհամ Ալիևը հայտարարել է, որ ղարաբաղյան խնդիրն ունի կարգավորման երկու տարբերակ՝ ռազմական կամ խաղաղ. «Մենք երկու տարբերակին էլ պատրաստ ենք և երբեք չենք բացառում խնդրի կարգավորման ռազմական ճանապարհը»:

Այն, որ Ադրբեջանում հոկտեմբերին սպասվող նախագահական ընտրություններին ընդառաջ Ադրբեջանի նախագահի հռետորաբանությունը կտրուկ կոշտանալու էր՝ սպասելի էր: Սակայն մյուս կողմից տարօրինակ իրավիճակ է ստեղծվում, քանզի ընդամենը օր առաջ Ադրբեջանի ԱԳՆ-ն, տարբեր ձևաչափերով հանդիպումների ժամանակ, ընդգծում էր իր երկրի նվիրվածությունը խնդրի խաղաղ կարգավորմանը:

Վերջին ժամանակներս, Ադրբեջանը ԱԳ նախարարի մակարդակով առիթ է ունեցել հայտարարելու, թե պատրաստ է Խաղաղության մեծ համաձայնագրի մշակման աշխատանքների մեկնարկին՝ «մոռացության տալով» բանակցությունների առաջին փուլի՝ հիմնարար սկզբունքների համաձայնեցման բանակցություններում դրսևորած իր մոտեցումը: Դեռ 2011 թվականին, Կազանում կայացած հանդիպման ժամանակ թվում էր, թե կողմերը մոտ են Հիմնարար սկզբունքների փաստաթղթի հարցում համաձայնությանը, երբ Ադրբեջանը բոլորի համար անսպասելի հանդես եկավ 10 նոր առաջարկներով՝ տապալելով հանդիպումը:

Չնայած այն հանգամանքին, որ և՛ համանախագահ երկրների ղեկավարները, և՛ միջազգային շահագրգիռ կառույցներն իրենց հայտարարություններում մշտապես շեշտում են ԼՂ հինախնդրի կարգավորման խաղաղ ճանապարհը և կոչ անում կողմերին զերծ մնալ այնպիսի քայլերից կամ հռետորաբանությունից, ինչը կարող է սրել տարածաշրջանում առանց այդ էլ լարված իրավիճակը, Ադրբեջանի նախագահը բավականին կտրուկ հայտարարություն է անում, շեշտելով, որ իրենք «երբեք չենք բացառում խնդրի կարգավորման ռազմական ճանապարհը»:

Հեղինակ` Քաղաքական հարցերով փորձագետ Տիգրան Աբրահամյան