Մատենադարանում արքայազն Չարլզը նվեր է ստացել
Նորին Արքայական Մեծություն Ուելսի արքայազնը մայիսի 28-ին այցելել է Երևան՝ իր մասնավոր այցը սկսելով որպես «Երևան, իմ սեր» բարեգործական հիմնադրամի հյուր: Զվարթնոց օդանավակայանում արքայազնին դիմավորել է «Երևան, իմ սեր» բարեգործական ծրագրի հիմնադիր Արմեն Սարգսյանը, ում հրավերով է Հայաստանում գտնվում Ուելսի արքայազնը: Արմեն Սարգսյանն արքայազնին ուղեկցել է Մատենադարան, ուր նրանց դիմավորել է տնօրեն Հրաչյա Թամրազյանը:
Այդ մասին տեղեկացնում են «Երևան, իմ սեր» ծրագրի լրատվական ծառայությունից:
Ըստ աղբյուրի, արքայազնը ծանոթացել է Մատենադարանի բացառիկ հավաքածուի կարևորագույն նմուշներին, այդ թվում 13-րդ դարի Աստվածաշնչին: Մատենադարանի կողմից արքայազնին որպես նվեր մատուցվել է Գրիգոր Նարեկացու արծաթապատ «Մատյան ողբերգությունը»:
Արմեն Սարգսյանն արքայազնին է ներկայացրել «Երևան, իմ սեր» ծրագիրը, որը նման է «Դամֆրիների տուն» ճարտարապետական ժառանգականությանն ուղղված բարեգործական ծրագրին Շոտլանդիայում, որին անձամբ աջակցում է Ուելսի արքայազնը: Արմեն Սարգսյանը նշել է, որ Ուելսի արքայազնի օրինակը ոգեշնչել է իրեն աշխատելու Երևանի պատմական վայրերի պահպանման և վերկանգնման ուղղությամբ:
Արմեն Սարգսյանը ներկայացրել է Դիլիջանի միջազգային դպրոցի հոգաբարձուների խորհրդի նախագահ Ռուբեն Վարդանյանին, ով իր հերթին ներկայացրել է 150 միլիոն դոլար արժողությամբ ծրագրի մանրամասները: Ռուբեն Վարդանյանը և վերջինիս տիկինը ներկայացրել են Դիլիջանի դպրոցում արքայազնի պատվին 65 ծառ տնկելու նախաձեռնությունը:
Արմեն Սարգսյանը շնորհակալություն է հայտնել «Երևան, իմ սեր» ծրագրի բոլոր աջակիցներին: Նա նշել է, որ իր երազանքներից մեկն է տեսնել Դիլիջանի դպրոցի աշակերտներին որպես «Դամֆրիների տուն» ծրագրի կրթական բաղկացուցիչի մասնակից:
Արմեն Սարգսյանը նկատել է, որ տարիներ առաջ նա ոգեշնչվել էր «Դամֆրիների տուն» ծրագրով և այսօր արդեն ավելի մեծ երազանք ունի՝ տեսնել «Երևան, իմ սեր» ծրագրի, Դիլիջանի միջազգային դպրոցի և «Դամֆրիների տուն» ծրագրի միջև ձևավորված համագործակցությունը: Բնատեսարանի ճարտարապետ լորդ Ռենդլ Սիդդելին ներկայացրել է Հայ այգի հիմնադրելու գաղափարը՝ որպես «Երևան, իմ սեր» ծրագրի բաղկացուցիչ:
«Երևան, իմ սեր» ծրագրի շրջանակում նախատեսվում է Երևանի Կոնդ համայնքում` Սբ. Հովհաննես եկեղեցու հարևանությանբ վերակառուցել պատմական 3 շենք, որոնք Մոր և Մանկան ապաստան կլինեն անապահով ընտանիքների համար, նաև մսուր առողջական խնդիրներ ունեցող երեխաների համար և համայնքային գործունեության կենտրոն:
Ավելի վաղ Panorama.am-ը տեղեկացրել էր, որ Մատենադրանի դիմաց մի խումբ բնապահպաններ բողոքի ակցիա էին կազմակերպել՝ իրենց բողոքն արտահայտելով Ամուլսարի ոսկու հանքավայրի շահագործման դեմ, որի մեջ բրիտանական ներդրումներ կան: Արքայազն Չարլզը սակայն Մատենադարան մուտք էր գործել հետնամուտքով, և բնապահպանները, ինչպես նաև լրագրողները հնարավորություն չունեցան տեսնել նրան: Դրա փոխարեն ակցիայի մասնակիցները իրենց նամակը հանձնեցին Հայաստանում Մեծ Բրիտանիայի դեսպանին, ով իր հերթին խոստացավ փոխանցել այն Արքայազն Չարլզին:
«Արմեն Սարգսյանը, ում մասնավոր հրավերով գտնվում եք Հայաստանում, նորաստեղծ «Լիդիան Ինթերնեշընըլ» հանքարդյունաբերական ընկերության կառավարիչների խորհրդի անդամ է, նախկինում աշխատել է Վերակառուցման և զարգացման եվրոպական բանկում, որը ՀԲ Գրուպի անդամ Միջազգային ֆինանսական կորպորացիայի հետ համաֆինանսավորում է Լիդիան Ինթերնեշընըլը: Այս ընկերությունը նպատակ ունի Հայաստանի հարավում՝ առողջարանային հայտնի գոտու սահմանին շահագործել ոսկու հանքավայր: Թեև ոսկին շահագործելու թույլտվությունների հետ կապված ավարտվել է պաշտոնական գործընթացների ընդամենը մի մասը, Հայաստանի հանրությունը վիճարկում է դրանց արդյունքում ընդունված որոշումները և ծրագիրը համարում ապօրինի», -ասված էր բնապահպանների նամակում:
Նախորդող հրապարակումներ. Մենք գիտենք, որ դուք հանդես եք գալիս հանուն անտառների պահպանության. Բաց նամակ Արքայազն Չարլզին
Արքայազնն այցելեց Մատենադարան...հետնամուտքով
«Բնապահպան Չարլզ, միացեք Հայաստանի բնապահպաններին». Մատենադարանում սպասում են արքայազնին
Դեսպանը խոստացավ, որ բնապահպանների մտահոգությունները կփոխանցի արքայազնին
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
