Հայաստանի հետ սահմանամերձ թուրքական երկաթուղին վերանորոգվում է

Տարածաշրջան 12:08 29/05/2013

Հայաստանի հետ սահմանամերձ թուրքական երկաթուղին վերանորոգվում է

«Ermenihaber.am» լրատվական գործակալության տեղեկացմամբ` վերանորոգվում է Կարսի Աքյաքա շրջանով անցնող Դողուքափը երկաթուղին, որը մինչև հայ-թուրքական սահմանի փակումը (1993թ.) գործել է Ախուրյանի հայկական երկաթուղու հետ միասին:
Երկու երկրների միջև կատարվում էին ուղևորափոխադրումներ և բեռնափոխադրումներ: Հայ-թուրքական արձանագրությունների ստորագրումից հետո Ռուսաստանի արտգործնախարար Սերգեյ Լավրովը նույնիսկ ասել էր, որ «Ռուսական երկաթուղի» ԲԲԸ-ն պատրաստ է ապահովվել Հայաստանի ու Թուրքիայի միջև երկաթուղային հաղորդակցության անխափան աշխատանքը` Դողուքափը-Ախուրյան սահմանային անցակետով:

Թուրքիայում իշխող «Արդարություն և զարգացում» (ԱԶԿ-AKP) կուսակցության` Կարսից առաջադրված պատգամավոր Ահմեթ Արսլանը մեկնել է Կարս` ծանոթանալու Հայաստանի հետ սահմանամերձ Աքյաքա շրջանով անցնող Դողուքափը երկաթգծի վերանորոգման աշխատանքներին:

Ըստ թուրքական լրատվամիջոցների` թուրք մեջլիսականը, նահանգային խորհրդի նախագահը, կայարանի պետը և արհմիությունների ներկայացուցիչները տեղում հետևել են երկաթուղում կատարվող վերանորոգման աշխատանքների ընթացքին: Հստակեցվել է, որ երկաթգծի վերանորոգման աշխատանքները տևելու են 6 ամիս: 44 տարվա շահագործումից հետո ռելսերը դարձել են լիակատար վերանորոգման ենթակա:

Թուրք պատգամավորը նշել է, որ Դողուքափը-Ախուրյան երկաթուղին կարող է վերագործակվել միայն այն ժամանակ, երբ Ղարաբաղը կհանձնվի Ադրբեջանին: Բացի այդ էլ Անկարան որպես այլընտրանք դիտում է Բաքու-Կարս-Թբիլիսի երկաթուղին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: