Ձեր վստահելի աղբյուրը

Հանրային ծառայությունները կարգավորող հանձնաժողովի կազմակերպած քննարկումը տապալվեց, քանի որ հասարակական կազմակերպությունների ներկայացուցիչները պահանջում էին հասարակական լայն շրջանակների համար համապատասխան պայմաններ ստեղծել նորմալ հանրային լսումներ անցկացնելու համար: Այս մասին այսօր լրագրողների հետ հանդիպման ժամանակ ասաց «Կանխենք գազի թանկացումը» նախաձեռնության անդամ Արամ Գրիգորյանը:

«Հանձնաժողովը կոչվում է հանրային ծառայությունները կարգավորող, բայց հանրության հետ աշխատելու որևէ ձև չգիտի: Մինչդեռ նրա գործառույթը մարդկանց հետ աշխատելն է, նրանց լսելն է, իսկ երեկ պարզ դարձավ, որ այդ հանձնաժողովը բացարձակ չի էլ ուզում լսել հանրությանը, այսինքն` կատարում է քաղաքական պատվեր»,- ասաց Ա.Գրիգորյանը:

Հիշեցնենք, որ երեկ ՀԾԿՀ-ում նախատեսված էր սպառողներին վաճառվող գազի և էլեկտրաէներգիայի սակագների վերանայման վերաբերյալ աշխատանքային քննարկում, որին խոչընդոտեցին հասարակական կազմակերպությունների ներկայացուցիչներն ու ակտիվիստները` բողոքելով, որ դրսում հավաքված մարդկանց, ովքեր քննարկմանը մասնակցելու համար գրանցվել են, թույլ չեն տալիս ներս մտնել և մասնակցել քննարկմանը, քանի որ ՀԾԿՀ-ի դահլիճը փոքր է:

Ա.Գրիգորյանի խոսքերով` ստացվեց այնպես, որ քաղաքացիների մի մասին թույլ տվեցին մասնակցել քննարկմանը, իսկ բազմաթիվ շահագրգիռ քաղաքացիների չթողեցին ներս մտնել, քանի որ Հանձնաժողովը լսումների համար նորմալ պայմաններ չէր ապահովել: Բացի այդ, ըստ նրա, դահլիճը պատրաստ չէր որևէ քննարկման` թե իր չափերով, թե տեխնիկական հնարավորություններով: «Չկար բարձախոս և դրա բացակայության պատճառով հարցերը գոռալով էին տալիս: Ի դեպ, այդ գոռգոռոցների պատճառով ևս վատ տպավորություն եմ ստացել երեկվա քննարկումից»,- ասաց Ա.Գրիգորյանը:

Նախաձեռնության անդամ Կարեն Վարդանյանը նշեց, որ Հանձնաժողովը իրեն հայտնի պատճառներով մերժեց քննարկումը ավելի տարողունակ դահլիճում անցկացնել` ասելով, թե «ունենք այն, ինչ ունենք»: «Ունենք այն, ինչ ունենքով հարցեր չեն լուծվում»,- ասաց նա:

«Կանխենք գազի թանկացումը» նախաձեռնության անդամները հայտնեցին, որ այսօր ՀՀ կառավարության աշխատակազմի ղեկավարին հանձնելու են դիմում` առաջարկելով, որ գազի թանկացման վերաբերյալ հասարակական քննարկում անցկացնելու համար տրամադրվի  կառավարության նիստերի դահլիճը:

Բացի այդ, նախատեսում են դիմել ՀՀ նախագահին, որպեսզի քննարկման դրվի Հանրային ծառայությունները կարգավորող հանձնաժողովի հետագա գործունեությունը:

Նախորդող` «Հանգիստ խոսա, քեզ ասում եմ». Ռոբերտ Նազարյանը` Արշակ Սադոյանին. գազի սակագնի վերաբերյալ հանրային լսումները հետաձգվեցին

«Հիմա ասեք կամ այո, կամ` ոչ: 15 րոպե խոսում ենք, վաայ». բուռն մթնոլորտ՝ գազի սակագնի քննարկմանն ընդառաջ

Գազը չպետք է թանկանա. Ակցիա հանձնաժողովի դիմաց (Լուսանկարներ)