«Մատաղիս»-յան մղձավանջն ավարտվեց. Երեք տղաները վերջնականապես արդարացված են
Հայաստանի Վճռաբեկ դատարանի քրեական պալատը վերադարձրել է «Մատաղիսի» գործով արդարացվածներ Ռազմիկ Սարգսյանի, Մուսա Սերոբյանի, Արայիկ Զալյանի վերաբերյալ ՀՀ վերաքննիչ քրեական դատարանի որոշման դեմ ՀՀ զինվորական կենտրոնական դատախազության դատախազների վճռաբեկ բողոքը։
Panorama.am-ի թղթակցի հետ զրույցում արդարացվածներից Արայիկ Զալյանն ասաց, որ ուրախ է ու բողոքը վերադարձնելն իր համար սպասելի էր: «Գործն ուղարկվելու է փաստորեն, նոր քննության և քանի դեռ կան երկու տուժողներ (սպանված զինծառայողները-հեղ.) ու հանցագործություն կատարած անձը բացահայտված չէ, քննությունն ավարտված լինել չի կարող», -հավելեց Արայիկ Զալյանը:
Հիշեցնենք` Ռազմիկ Սարգսյանը, Մուսա Սերոբյանը, Արայիկ Զալյանը մեղադրվում էին ՀՀ քրեական օրենսգրքի 112-րդ հոդվածի 2-րդ մասի 1-ին, 6-րդ և 14-րդ կետերով՝ երկու կամ ավելի անձանց նկատմամբ դիտավորությամբ առողջությանը ծանր վնաս պատճառելը, որն անզգուշությամբ առաջացրել է մահ: 2013 թ. մարտի 26-ին ՀՀ վերաքննիչ քրեական դատարանը «Մատաղիսի» գործով Շիրակի մարզի ընդհանուր իրավասության դատարանի 2012 թ. դեկտեմբերի 18-ի արդարացման դատավճիռը թողեց օրինական ուժի մեջ: Վերաքննիչ դատարանը մերժեց արդարացման դատավճռի դեմ մեղադրող կողմի և տուժող Ռոման Եղիազարյանի իրավահաջորդի վերաքննիչ բողոքները: Դրանից հետո սակայն, զինվորական դատախազությունն ու Եղիազարյանների ընտանիքը Վճռաբեկ բողոք էին ներկայացրել` չհամաձայնելով Վերաքննիչ դատարանի որոշման հետ:
Հայաստանի Վճռաբեկ դատարանը փաստել է, որ բողոքաբերների փաստարկները բավարար չեն եզրահանգելու, որ բողոքում բարձրացված հարցի վերաբերյալ Վճռաբեկ դատարանի որոշումը կարող է էական նշանակություն ունենալ օրենքի միատեսակ կիրառության համար։ Բողոքաբերների փաստարկները բավարար չեն նաև եզրահանգելու, որ տվյալ գործով վերաքննիչ դատարանի կողմից թույլ է տրված առերևույթ դատական սխալ, որը կարող է առաջացնել կամ առաջացրել է ծանր հետևանքներ։
Արայիկ Զալյանն ասաց, որ այս գործով առնվազն երկու քննություն պետք է իրականացնել` նախ պարզել, թե ովքեր են իրական հանցագործները, այնուհետև գտնել ու պատասխանատվության ենթարկել հանցագործությունը բացահայտել չցանկացողներին ու այն թաքցնողներին: «Ինը տարի դաժան պայքարից հետո վերջապես արդարությունը հաստատվեց և սկսվելու է նոր քննություն: Այս անգամ ճիշտ է նորից մեղադրյալ չենք լինի, բայց ամեն ինչ անելու ենք, որպեսզի հսկենք այս քննության ընթացքը», -նկատեց Արայիկ Զալյանը:
Թեմային առնչվող. «Մատաղիսի գործ». Սպանված զինծառայողի մայրը պնդում է` մարդասպաններ են, իսկ պաշտպանը առարկում
Ոչ թե ամբաստանյալներ, այլ` արդարացվածներ. «Մատաղիսի գործ»-ով փաստաբանը ուղղում է դատավորին
«Ուղղակի ծիծաղելի է». Մատաղիսյան մղձավանջը շարունակվում է. Եղիազարյաններն ու զինդատախազությունը բողոքարկել են
Մատաղիսի գործով վերաքննիչը հրապարակեց վճիռը. Տղաներն արդար են
