Ձեր վստահելի աղբյուրը

Հայաստանը, որպես Եվրոպայի խորհրդի Նախարարների կոմիտեում նախագահ, պատմական հնարավորություն ունի մեծ ներդրում անել Լեռնային Ղարաբաղի հակամարտության խաղաղ կարգավորման հարցում: Այդ մասին այսօր ԵԽԽՎ Մշտական հանձնաժողովի նիստից հետո լրագրողների հետ ճեպազրույցում հայտարարեց ԵԽԽՎ նախագահ Ժան Կլոդ Մինյոնը: 

«Այսօր պահը պատմական է Հայաստանի համար, վաղը պատմական կլինի Ադրբեջանի համար, քանի որ մյուս տարի մայիսին Ադրբեջանն է լինելու ԵԽ նախարարների կոմիտեի նախագահը: Ոչինչ անհնար չէ. եթե Գերմանիան ու Ֆրանսիան հաշտվեցին ու դա հնարավոր եղավ նրանց պարագայում, ապա այդպես կլինի նաև Հայաստանի ու Ադրբեջանի դեպքում», -հայտարարեց ԵԽԽՎ նախագահը` ասելով, որ Նախարարների կոմիտեի նախագահության ընթացքում Հայաստանը պետք է ակտիվ քայլեր ձեռնարկի խնդրի լուծման հարցում:

Նա ասաց, որ որպես Եվրոպայի խորհրդի պատգամավորներ, իրենք ամեն ինչ կանեն ԵԱՀԿ Մինսկի խմբի շրջանակներում հիմնախնդրի խաղաղ կարգավորման համար:

Ինչ վերաբերում է ԵԽԽՎ-ում ԼՂ հիմնահարցով նախկինում զբաղվող ենթահանձնաժողովի աշխատանքների վերականգնմանը, Մինյոնը ևս մեկ անգամ ընդգծեց, որ ինքը դեմ է այդ ենթահանձնաժողովի գործունեությանը: Հիշեցնենք` այդ ենթահանձնաժողովը, որի գործունեությունը դադարեցվել էր Ռասել Ջոնսթոնի մահից հետո, վերականգնվել էր ազգությամբ թուրք ԵԽԽՎ նախկին նախագահ Մևլութ Չավուշօղլուի ակտիվ ջանքերով:

«Ես ֆրանսիացի եմ, և Ֆրանսիան ԵԱՀԿ Մինսկի խմբի անդամ է և ես համարում եմ, որ այդ բանակցությունների շարժիչ ուժը ԵԱՀԿ Մինսկի խումբն է», -հավելեց Մինյոնը:

Նա ասաց, որ մի քանի օր առաջ Ադրբեջանում հանդիպել է այդ երկրի արտգործնախարարի հետ և «հետաքրքիր ու դրական զրույց» ունեցել Մամեդյարովի հետ: Իսկ արդեն վաղը առանձնազրույց կունենա Հայաստանի արտգործնախարարի հետ: «Իմ և Խորհրդարանական վեհաժողովի դերն այն է, որ հարգի յուրաքանչյուրի մոտեցումները: Դա բանակցությունների հաջողության գրավականն է: Չմոռանալով անցյալը, պետք է նայել դեպի ապագան», -նկատեց Մինյոնը:

Հարակից հրապարակումներ. Ընդդիմությունը բողոքում է` «Ա-զա-տու-թյուն», իսկ Ժան Կլոդ Մինյոնը դա նորմալ է համարում` «Ես էլ եմ ընդդիմություն» (լուսանկարներ)

Էլ ի՞նչ անենք, Ադրբեջանը բոլոր առաջարկները մերժում է. Նալբանդյանը բացահայտումներ է արել եվրոպացի պատգամավորների համար