Ձեր վստահելի աղբյուրը

Երևանում անձրևաջրերի հեռացման համակարգը կառուցվել է դեռևս 1970-80-ական թվականներին ու նախատեսված չի եղել նման մակերեսով ասֆալտապատ, բարեկարգ քաղաքի համար: Անձրևաջուրը մտնում է խողովակի մեջ, սակայն խողովակների տրամագծերը չեն բավարարում այդ քանակությամբ ջրին: Ասուլիսում այս մասին ասաց «Երևան ջուր» ընկերության «Արևելք» շահագործման գրասենյակի տնօրեն Կարապետ Օհանյանը:
Նշենք, որ 2006 թ. «Երևան ջուր» ընկերությունը ստանձնել է նաև անձրևատար համակարգի սպասարկման ու պահպանման պարտավորությունը:

Կ. Օհանյանը մանրամասն ներկայացրեց, թե 2011-12 թթ. ինչ աշխատանքներ են կատարել, որ փողոցներում են անձրևաջրերի համակարգերը բարեկարգել, փոխել:

Երևանի քաղաքապետարանի աշխատակազմի կոմունալ տնտեսության վարչության պետ Կառլեն Ղազարյանի խոսքով, Երևանում 250 կմ անձրևատար ցանց է գործում: Ըստ նրա, քաղաքապետարանը «Երևան ջուր» ընկերության հետ 2011-12 թվականներին աշխատանքներ են իրականացրել այն փողոցներում, որտեղ անձրևաջրերի կուտակումը քրոնիկ բնույթ էր կրում՝ Ռուբինյան, Լենինգրադյան, Խորենացի, Սևանի և այլն:

«Այժմ ունենք երեսուն հաշվառված փողոց, որտեղ պետք է փոխվի, բարեկարգվի անձրևաջրերի հեռացման համակարգը: Քաղաքապետի հանձնարարության համաձայն, այն փողոցներում, որտեղ կապիտալ ասֆալտապատման աշխատանքներ են ընթանում, փոխվում է ջրահեռացման համակարգը»,- ասաց Կ. Ղազարյանը:

Ինչ վերաբերում է վերջին շաբաթների ընթացքում տեղացած հորդառատ անձրևներին ու դրանց հետևանքով քաղաքում ստեղծված վիճակին, նա նշեց, որ որևէ դժվարանցանելի փողոց չի եղել, գիշեր-ցերեկ աշխատել են, հնարավոր ամեն ինչ արել են, որպեսզի ջրակուտակումներն արագ վերացվեն:

Կ. Օհանյանն ասաց, որ իրենց ընկերությունը քաղաքապետարանի հետ քննարկումներ է ծավալել՝ առաջացած խնդիրները լուծելու ուղղությամբ քայլեր ձեռնարկելու վերաբերյալ: «Իհարկե, մեկ վայրկյանում հնարավոր չէ լուծել խնդիրը: Մեկ ամսից կունենանք ռազմավարական ծրագիր: Խնդրահարույց բոլոր փողոցներն արդեն հաշվառված են: Սկսվել ենք նախագծային-նախահաշվարկային աշխատանքները»,- նշեց «Երևան ջուր» ընկերության «Արևելք» շահագործման գրասենյակի տնօրենը:

Կ. Օհանյանը տեղեկացրեց, որ քաղաքի անձրևաջրերի հեռացման ամբողջ համակարգը կատարյալ դարձնելու համար անհրաժեշտ է 18 միլիարդ դրամ: Ըստ նրա, իհարկե այդ գումարը չունեն ոչ իրենք, ոչ էլ կառավարությունը, այդ իսկ պատճառով առաջ են գնում քայլ առ քայլ՝ նախ և առաջ լուծում տալով ամենաառաջնային խնդիրներին:
Ի դեպ, նա նկատեց, որ անձրևաջրերի կուտակումների հարցում մեղքի որոշակի մասնաբաժին ունեն բնակիչները, ովքեր կամայական, անթույլատրելի շինարարական աշխատանքներ են կատարում՝ հաշվի չառնելով կարևոր հանգամանքներ: Կ. Օհանյանն ընդգծեց, որ կառուցման ժամանակ պետք է կառուցապատողը հոգ տանի, որպեսզի նմանատիպ խնդիրներ չառաջանան:

Պատասխանելով այն հարցին, թե երբևէ եղե՞լ է, որ ընկերությունը դիմի Երևանի քաղաքապետարանին՝ արգելելու տվյալ վայրում ընթացող շինարարական աշխատանքները, քանի որ խանգարում է ջրահեռացման համակարգին, նա ասաց, որ 10-12 դեպքով դիմել են քաղաքապետարանին որպես վարձատու՝ շինարարությունն արգելելու համար, սակայն դրանք չեն վերաբերել կոնկրետ հենց անձրևատար համակարգին, այլ ջրագծերի ու կոյուղաջրերի հարցով է եղել: Նա վստահեցրեց, որ բոլոր դեպքերում էլ կասեցվել են շինաշխատանքները:

Երևանի քաղաքապետարանի աշխատակազմի կոմունալ տնտեսության վարչության պետ Կառլեն Ղազարյանը վստահեցրեց, որ քաղաքապետարանն ու «Երևան ջուր» ընկերությունն անում են ամեն ինչ, որպեսզի հորդառատ անձրևների ժամանակ քաղաքացիները որևէ խնդրի չհանդիպեն, որպեսզի անձրևաջրերի հեռացումը կազմակերպվի ըստ պատշաճի: