Ա.Աշոտյանն առաջարկում է հանել տարկետման իրավունքը. Դրա ժամանակն է
Կրթության և գիտության նախարար Արմեն Աշոտյանի կարծիքով` նրանում, որ դպրոցներում առկա է կոռուպցիա, մեղավոր են նաև ծնողները.
«Սա զավեշտ է, բայց որոշ ծնողներ շահագրգիռ են, որպեսզի իրենց երեխաները կրթություն չստանան: Իհարկե, կոռուպցիայի համար մեղավոր են նաև որոշ ուսուցիչներ, դպրոցի որոշ տնօրեններ և որոշ տնօրենների վերադասներ…»,- ԱԺ-ում լրագրողների հետ ճեպազրույցում հայտարարեց նախարարը անդրադառնալով այն հարցին, թե քանի՞ գլխանի է կաշառակերությունը դպրոցներում: Հարցը հնչեց հենց նախարար Աշոտյանի ավելի վաղ արած հայտարարության հիշեցմամբ, թե «կաշառակերությունը մի քանի գլխանի դև է և որքան կտրում ես` նոր գլուխներ են աճում»
«Շատ գլուխներ արդեն կտրված են»,- հավաստիացրեց Արմեն Աշոտյանը և տեղեկացրեց, որ այսօր դժգոհություններն այլ հարթությունից են. «Հայտնի է, որ դրամահավաքը դպրոցներում արգելել եմ, արդյունքում թե’ Երևանից, թե’ մարզերից դրամահավաքի վերաբերյալ ստացվող ահազանգերի թիվը կտրուկ նվազել է: Սա ևս մեկ անգամ գալիս է ապացուցելու, որ տոտալ արգելքն աշխատում է և արդյունավետ է, բայց դա լուծում չէ, որովհետև դրամահավաքն ամբողջությամբ արգելելով, մենք զրկում ենք երեխաներին պատմամշակութային վայրեր հաճախելուց և այլն»,- նշեց նա :
ԿԳ նախարարը անդրադարձավ նաև բուհերում տարկետման իրավունքին, որը, նրա խորին համոզմամբ, պետք է վերացվի բարձրագույն կրթության բոլոր մակարդակներում. «Ահազանգ է, որ այդ համակարգով միայն մեկ աղջիկ է ընդունվում մագիստրատուրա և 80 տեղ թափուր է մնում: Ակնհայտ է, որ ասպիրանտուրա գնում են ոչ միայն գիտությամբ զբաղվելու համար, այլև բանակից տարկետում ստանալու նպատակով: Իսկ բանակի տարկետման բեռն առկա է բարձրագույն կրթության բոլոր մակարդակներում` մագիստրատուրայում, բայց ամենասուրը ասպիրանտուրայում է»,- նշեց նախարարը:
Ա.Աշոտյանի խոսքով, տարկետման իրավունքը հանելով կվերացվեն նաև կոռուպցիոն բոլոր ռիսկերը այդ համակարգում, առավել ևս, որ այդ ռիսկերը իրենց հերթին խանգարում են կրթությանը ` բանակում ծառայել-չծառայելը դառնում է դոմինանտ: Ի դեպ, Աշոտյանը ասաց, որ գիտի` իր այս հայտարարությունից հետո հանրային արձագանքը բավականին մեծ է լինելու, բայց . «Ես չեմ վախենում դրանից ու ասում եմ, որ իմ` նախարարի կարծիքն է դա` ժամանակն եկել է»,- ընդգծեց Ա.Աշոտյանը:
Լրահոս
Տեսանյութեր
Թովմասյանը՝ Նանուշյանին. Նշել եք՝ ծրագրի իրականացումը պայմանավորված է օրենքով, բայց օրենքը չկա
