Իրանի ԱԳՆ. Հուսով ենք, որ Թուրքիայում ստեղծված իրավիճակը կհանգուցալուծվի առանց բռնությունների

Քաղաքական 13:43 03/06/2013

Իրանի ԱԳՆ. Հուսով ենք, որ Թուրքիայում ստեղծված իրավիճակը կհանգուցալուծվի առանց բռնությունների

«Հուսով ենք, որ Թուրքիայում ստեղծված իրավիճակը կհանգուցալուծվի առանց բռնությունների»:
Այդ մասին իրանական «ՄԵՀՐ» լրատվական գործակալության հաղորդմամբ՝ հայտարարել է ԻԻՀ ԱԳՆ մամլո խոսնակ Սեյյեդ Աբբաս Արաղչին:

Իրանի ԱԳՆ պաշտոնական ներկայացուցիչը այսօր լրագրողների հետ հանդիպման ժամանակ, անդրադառնալով Թուրքիայում տեղի ունեցող բողոքի ցույցերին, մասնավորապես պատասխանել է. «Մեր կարծիքով, դա Թուրքիայի ներքին խնդիրն է, և հույս ունենք, որ Թուրքիայի իշխանությունների ուշիմության շնորհիվ խնդիրը կլուծվի խաղաղ պայմաններում՝ առանց բռնությունների»:

Լրագրողի այն հարցին, թե հնարավո՞ր է, որ Թուրքիայում ստեղծված իրավիճակի պատճառով Անկարան Սիրիայի հարցում փոխի իր դիրքորոշումը, Արաղչին պատասխանել է. «Ինչպես արդեն ասացի, դա Թուրքիայի ներքին խնդիրն է»:

Հիշեցնենք, արդեն 6-րդ օրը Թուրքիայում ընթացիկ ցույցերի և անվտանգության ուժերի հետ բախումների հետևանքով ավելի քան 1700 մարդ է ձերբակալվել: Թուրքիայի ներքին գործերի նախարար Մուամմեր Գյուլերի հաղորդմամբ, ձերբակալվածների մեծամասնությունն ազատ են արձակվել հարցաքննությունից հետո:

Բողոքի ակցիաներ են գրանցվել երկրի 67 քաղաքներում ու այլ բնակավայրերում, հիմնականում՝ Ստամբուլում և Անկարայում: Ոստիկանության հետ բախումների ընթացքում վիրավորվել է 58 քաղաքացի ու 115 իրավապահ: Ցուցարարների զանգվածային ակցիան, որն ի սկզբանե ծագել էր Ստամբուլի Թաքսիմ հրապարակում գտնվող Գեզի այգու վերակառուցման աշխատանքների դեմ, վերաճել է իշխող կուսակցության և վարչապետ Էրդողանի հրաժարականի պահանջի:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: