Ձեր վստահելի աղբյուրը

 Թուրքիայում ծայր առած բողոքի ալիքը ժողովրդի մոտ կուտակված հակաիշխանական տրամադրությունները արտահայտելու առիթ էր: Մեկնաբանելով Թուրքիայում վերջին օրերին տեղի ունեցող իրադարձությունները` panorama.am-ի թղթակցի հետ զրույցում նման տեսակետ հայտնեց թուրքագետ Անդրանիկ Իսպիրյանը:

«Հետաքրքիր այն է, որ գործընթացը սկսվեց ինչ-որ հասարակ, անմեղ թվացող այգու պահպանության ուղղված ակցիայից, սակայն արդյունքում վերածվեց հակաիշխանական համընդհանուր դիմակայության: Այգու ճակատագրով մտահոգ քաղաքացիների և բնապահպանների բողոքին ակցիան առիթ հանդիսացավ որպեսզի երևան գան հակաիշխանական բոլոր տրամադրությունները: Թուրքիայի համարյա թե 67 քաղաքում արդեն ծայր է առել այս դիմակայությունը: Հակաիշխանական բողոքի ակցիաներին մասնակցում են ընդդիմադիր գրեթե բոլոր թևերը`սակսած ձախերից և սոցիալիստներից, մինչև ծայրահեղ ազգայնականներ: Բնական է, որ ստեղծված իրավիճակում որոշ քաղաքական ուժեր և կազմակերպություններ կփորձեն այսպես ասած, պղտոր ջրում փնտրել իրենց շահը»,- նշեց Ա. Իսպիրյանը:

«Ներկա պահին մենք տեսնում ենք, որ հենց իշխանության ներսում սույն իրադարձությունների վերաբերյալ կան որոշակի հակասությոյուններ: Մի կողմից` երկրի նախագահ Աբդուլլահ Գյուլը փորձում է շտկել իրավիճակը` նշելով, որ ժողվրդավարությունը դա միայն ընտրությունները չեն, մյուս կողմից վարչապետ Ռեջեփ Թայիփ Էրդողանը, հակադրվելով ցուցարարների պահանջներին, պնդում է, որ այգին պետք է քանդվի և իշխանությունը տուրք չի տալու մի քանի թալանչիների ցանկությունների: Այս համատեստում իրավիճակը փոքր-ինչ բարդանում է, այն առումով, որ երկրի բարձաստիճան երկու քաղաքական դեմքերի մոտեցումներում առկա են որոշակի տարբերություններ: Սակայն կարծում եմ, այս ամենը լուրջ հետևանքներ, համենայն դեպս ներկա պահին, չի կարող ունենալ»,- հավելեց բանախոսը:

Ինչ վերաբերում է իշխանափոխությանը, ապա դեպքերի նման զարգացումը, ըստ թուրքագետի, քիչ հավանական է:

«Ներկա պահին ո՛չ փողոցում հայտնված ժողովուրդն և ո՛չ էլ գործընթացին մասնակցող քաղաքական ուժերը սույն նպատակին հասնելու համար բավարար ռեսուրսներ չունեն:Այս պահին դրությամբ ակնհայտ է միայն այն, որ Թուրքայիում թացը խառնվել է չորի հետ և նորմալ ազատության ձգտող մարդկանց հետ փողոց են դուրս եկել նաև ֆաշիստներ, ազգայնականներ, տարբեր ահաբեկչական ոչ լեգալ կազմակերությունների անդամներ: Ենթադրել, որ այս ամենը կարող է հանգեցնել ինչ-որ լուրջ քաղաքական տեղաշարժերի, չի կարելի: Պարզապես ստեղծվել է քաոսային իրավիճակ, որը մեծ հարված է հասցրել իշխող կուսակցության և հատկապես վարչապես Էրդողանի վարկանիշին»,- եզրափակեց Ա. Իսպիրյանը:

Հիշեցնենք, որ Թուրքիայում արդեն մի քանի օր մոլեգնող զանգվածային բողոքի ակցիաների մեկնարկի պատճառ էր հանդիսացել իշխանությունների` Ստամբուլի կենտրոնում գտնվող Գեզի այգու փոխարեն առևտրային կենտրոն կառուցելու որոշումը: Այն բանից հետո, երբ ոստիկանական ուժերը մայիսի 31-ին ուժով ցրեցին Ստամբուլում ընթացող բողոքի ակցիան, Թուրքիայի մի քանի քաղաքներում բռնկվեցին նոր բողոքի ակցիաներ և զանգվածային անհնազանդության գործողություններ և բողոքի ալիքը բնապահպանականից փոխակերպվեց քաղաքականի:
Նախօրեին Իզմիր քաղաքում հակակառավարական ցույցերի մասնակիցները այրել են երկրի իշխող «Արդարություն և զարգացում» կուսակցության գրասենյակը:
Ոստիկանության և ցուցարարների միջև ամենաթեժ մարտերը տեղի են ունեցել Ստամբուլի կենտրոնում գտնվող Բեշիքթաշ թաղամասում` Բոսֆորի ափին:
Ստամբուլում գտնվող Թուրքիայի վարչապետ Ռեջեփ Թայիփ Էրդողանի նստավայր տանող ճանապարհները փակվել են: Ցուցարարները փորձել են շարժվել դեպի վարչապետի գրասենյակը, սակայն ոստիկանությունը նրանց նկատմամբ արցունքաբեր գազ է կիրառել:

Նախորդիվ` Թուրքիայում ամառը թեժ է լինելու. քրիստոնյա բնակչության ջարդերի հավանականություն կա