Ադրբեջանի արտաքին գործերի նախարարի այցն ԱՄՆ որևէ դրական արդյունք չի տա
Ադրբեջանի իշխանությունների նախընտրական խուճապը սկսել է օրեցօր ավելի շատ զգացվել, ինչը վկայում են աշխարհի տարբեր երկրներ կատարած պաշտոնական այցերը, Արևմտյան «ուղեղային կենտրոններում» անցկացվող հանդիպումները, հրապուրիչ առաջարկները: Սակայն, ինչպես նշում է ադրբեջանական «Ազադլիգ» թերթը, իրականությունը ցույց է տալիս, որ այդ հանդիպումներում Ադրբեջանի իշխանությունները չեն հասել ցանկալի արդյունքների:
Թերթը գրում է, որ Ադրբեջանի իշխանությունների այդ մտահոգության ցուցանիշն է նաև ԱՄՆ պատվիրակությանը Ադրբեջան հրավիրելը, ինչպես նաև Ադրբեջանի արտգործնախարար Էլմար Մամեդյարովի՝ ԱՄՆ կատարած վերջին այցը: «Ազադլիգ»-ը նշում է, որ փորձագետների կարծիքով, մոտ ապագայում հնարավոր չի լինելու ԱՄՆ-Ադրբեջան հարաբերություններում լուրջ առաջընթաց ձեռք բերել, քանի որ Ադրբեջան կատարած այցի ժամանակ ԱՄՆ պետքարտուղարի ժողովրդավարության, մարդու իրավունքների և աշխատանքի հարցերով փոխտեղակալ Թոմաս Մելիան հայտնել էր, որ երկու երկրների հարաբերություններում ԱՄՆ-ի համար կանխորոշիչ տեղ է գրավում ժողովրդավարական ընտրությունների անցկացումն ու երկրում ազատությունների ապահովումը: Առանց այդ ոլորտում բարեփոխումներ անցկացնելու, հարաբերություններում սառնություն է դիտվելու:
Հակառակը` ընտրական տարում իշխանությունների կողմից բռնաճնշումների մեծացումը, ձերբակալություններն ու մամուլի նկատմամբ ճնշումների աճը բացասական ազդեցություն են ունենալու միջազգային հանրության հետ հարաբերություններում:
Ըստ փորձագետների՝ որոշակի աշխարհաքաղաքական զիջումների շնորհիվ ԱՄՆ-ի դիրքորոշման մեջ լոյալություն ստեղծելու միջոցով Ադրբեջանի իշխանությունները ցանկանում են ժողովրդավարությունը հետին պլան մղել: Սակայն ԱՄՆ-ը հայտարարել է, որ ժողովրդավարությունը այլևս չի կարող սակարկության առարկա լինել: Փորձագետները գտնում են, որ Ադրբեջանի իշխանությունները միջազգային հանրության առջև բոլոր «խաղաքարտերն» օգտագործել են: Այժմ էլ ԱՄՆ-Ադրբեջան ֆորումի անցկացումը, Էլմար Մամեդյարովի՝ ԱՄՆ կատարած այցը ոչ միայն չեն կարող արդյունավետ լինել, այլ հակառակը, իշխանությունների նկատմամբ կարող են լուրջ ճնշումներ իրականացվել:
Ադրբեջանցի քաղաքագետ Վաֆա Գուլուզադեն իր հերթին հայտնել է, որ այս ընտրական տարում իշխանության ամբողջ գործունեությունը, արտասահմանյան բոլոր այցերը և պաշտոնական հանդիպումները ընտրությունների համար են հաշվարկված: «Իրականում ԱՄՆ-ի, Եվրամիության, Եվրոպայի խորհրդի դիրքորոշումը հայտնի է. ժողովրդավարական բարեփոխումներ, ազատությունների ապահովում, մարդու իրավունքներ: Իսկ իշխանություններն այդ այցերը գնահատում են որպես սեփական հաջողություն: Արդյունքի մասին խոսելը վաղաժամ է: Մոտ ապագայում ամեն բան հայտնի կդառնա»-ասել է քաղաքագետը:
Լրահոս
Տեսանյութեր
Սուրեն Գրիգորյան, դու փայ ունե՞ս, թե՞ չունես, հարց եմ տալիս. Մ. Մանուկյան
