Փաստաբանների թիրախը պետք է լինի Վերաքննիչ դատարանը. Դիտարկումներ երկօրյա դատադուլից առաջ
«Առաջին ատյանի դատարանը չի կալանավորել անձին, մերժել է նախաքննական մարմնի միջնորդությունը, իսկ Վերաքննիչ դատարանը որոշել է կալանավորել նույն անձին, բողոք է ներկայացվել Վճռաբեկ դատարան, սակայն այստեղ բողոքը վարույթ չեն ընդունել», - այսօր հունիսի 10-11-ին անցկացվելիք դատադուլին ընդառաջ փաստաբանների դժգոհությունը փաստով հիմնավորեց Փաստաբանների պալատի փաստաբան Սամվել Ջաղինյանը:
Նրա խոսքով, կալանավորված անձը չի կարող այս պարագայում ստուգել իրեն կալանքի վերցնելու հիմքերը, իսկ երբ Վճռաբեկը մերժում է բողոքը ու վարույթ չի ընդունում, ապա կալանավորված անձը որտե՞ղ ստանա իր հարցերի պատասխանները: «Սպասենք, որ օրենսդրական փոփոխություններն ինչ-որ խնդիր կլուծեն, չի լինի: Շատ դժվար է, երբ անձին բացատրում ես որպես իրավաբան և երբ դա վարույթ չի ընդունվում ու խնդիրը լուծում չի ստանում, շատ դժվար է», բացատրեց Սամվել Ջաղինյանը:
Մյուս խնդիրը, որը ներկայացրեց Ջաղինյանը դատարանում նիստերը չձայնագրելն էր: «Միտումնավոր չեն ձայնագրվում խուզարկությունների, օպերատիվ-հետախուզական դատական նիստերը: Այդ հարցը բարձրացրել եմ շուրջ մեկ տարի, բայց` անօգուտ, լուծում չի տրվում», -նկատեց Ջաղինյանը:
Փաստաբանների բողոքի ակցիային միացած Հայկ Ալումյանը նշեց, որ Վճռաբեկ դատարանը շարունակում է չպատճառաբանված որոշումներ կայացնել` մերժելով քաղաքացիների բողոքները վարույթ ընդունել ու այդպիսով մեծացնում է չպատճառաբանված որոշումների քանակը: Փաստաբանը համեմատություն անցկացրեց Վճռաբեկ և Սահմանադրական դատարանների միջև ու ասաց, որ ՍԴ-ին ուղղված դիմումը, երբ չի ընդունվում, իրեն հստակորեն տեղեկանում են, թե ինչու այն չի ընդունվում: «Մենք հո չենք ասում, թե ինչու է Վճռաբեկ դատարանը իրավունքի ատյանի դեր ստանձնել, մենք դեմ չենք: Սահմանադրական դատարանը նախատեսված է կոնկրետ գործառույթներ ապահովելու համար և ունի ընդունելության կոնկրետ չափանիշներ: Եթե ՍԴ-ն դիմումը չի ընդունում քննության, մենք հասկանում ենք, թե ինչու չընդունեց: Իսկ Վճռաբեկ դատարանի կամայականությունների անթույլատրելիությունը կայանում է նրանում, որ չես հասկանում` ինչու ընդունեց վարույթ կամ ինչու վերադարձրեց: Պղտոր ջրի մեջ ձուկ որսալը շատ հեշտ է», -նկատեց Հայկ Ալումյանը:
«Փաստաբանները լինելով իրավաբաններ ու իրավապաշտպաններ, բացի օրենքով շարժվելուց ու օրենսդրությամբ իրենց ընձեռված հանրավորություններն օգտագործելուց, այլ ճանապարհ չպետք է ունենան», իր կարծիքն հայտնեց ՀՀ Դատական դեպարտամենտի միջազգային և հասարակայնության հետ կապերի բաժնի պետ Արսեն Բաբայանը:
Պաշտոնյայի խոսքով, կարելի է բողոքարկել, և եթե Հայաստանի դատական ատյաններում հարցը չի լուծվում, ապա կարելի է դիմել Մարդու իրավունքների եվրոպական դատարան: «Այս պարագայում փաստաբանների գործադուլը նույնն է, ինչ բժիշկները գնան գործադուլի, երբ ծանր հիվանդներ կան, որոնք բուժման կարիք ունեն», -հավելեց Բաբայանը: Նրա խոսքով, փաստաբանները գործադուլ-դատադուլ հայտարարելով չեն լուծում իրենց պաշտպանյալի խնդիրը:
«Ինչ վերաբերում է վճռաբեկ բողոքները վերադարձնելու մասին որոշումների բավարար պատճառաբանված չլինելու թյուր կարծիքին, ապա ներկայացնում եմ Եվրոպական դատարանի դիրքորոշումն այս հարցի վերաբերյալ:
Ուշագրավ է, որ այն վերաբերում է հենց ՀՀ վճռաբեկ դատարանի կողմից վճռաբեկ բողոքը վերադարձնելու որոշման պատճառաբանությանը: Եվրոպական դատարանը մասնավորապես գտել է, որ այնտեղ, որտեղ գերագույն դատարանը մերժում է գործը քննության ընդունելը այն հիմնավորմամբ, որ նման գործերի ընդունելության համար իրավական հիմքեր չկան, շատ սահմանափակ հիմնավորումը կարող է բավարարել Կոնվենցիայի 6-րդ հոդվածի պահանջները: Ստացվում է, որ անգամ Եվրադատարանն է իրավաչափ գնահատում այն գործողությունը, որի դեմ որոշ փաստաբաններ բողոքում են»,- նկատեց Բաբայանը:
Իրավաբան Արա Ղազարյանի պնդմամբ, Վճռաբեկ, Սահմանադրական և Մարդու իրավունքների եվրոպական դատարանները կոչված չեն լուծել վեճը կամ վերականգնել մարդկանց իրավունքները: «Դրանք հատուկ առաքելություն ունեն և որպեսզի կարողանան դա իրագործել, պետք է հայեցողություն», նկատեց Արա Ղազարյանը` ընդգծելով, որ փաստաբանները պետք է վեճը, խախտված իրավունքները փորձեն լուծել առաջին ատյանի դատարանում կամ Վերաքննիչ դատարանում ու չհասնել Վճռաբեկ դատարան: «Վճռաբեկ դատարան դիմելը չպետք է փաստաբանի օրակարգում լինի, քանի որ դա հատուկ դատարան է, հատուկ նպատակով: Ամենալավագույն ցանկության դեպքում էլ Վճռաբեկ դատարանը չի կարող անել ավելին, քան դուք պահանջում եք, որովհետև դա օբյեկտիվ իրականությունն է», հավելեց իրավաբանը: Ղազարյանի խոսքով, փաստաբանների թիրախը պետք է լինի Վերաքննիչ դատարանը
Ի տարբերություն նախորդ տարվա գործադուլի, երբ փաստաբանների բողոքը կազմակերպում էր Փաստաբանների պալատում ձևավորված 5 հոգուց կազմված Հանձնախումբը, ապա այս ակցիային կողմ է այդ հանձնախմբից միայն մեկ անդամը` Հայկ Ալումյանը: Panorama.am-ը հետաքրքրվեց, թե ինչով է պայմանավորված այդ հանգամանքը, արդյո՞ք կան հակասություններ: Ալումյանն ի պատասխան նշեց, որ Փաստաբանների պալատի ղեկավարի ու շատ փաստաբանների կարծիքները Վճռաբեկ դատարանի հետ կապված հարցում համընկնում են: «Հարցը եղել է մոտեցումների մեջ. 5 հոգանոց փաստաբանների հանձնախմբի մեջ եղել են մասնագետներ, ովքեր առաջարկել են գործադուլ անցկացնել սեպտեմբերին, եղել են մասնագետներ, որոնք առաջարկել են սպասել օրենսդրական փոփոխություններին` հույսով, որ իրավիճակ կփոխվի և եղել եմ ես, որն այստեղ նստած է», -նկատեց փաստաբան Ալումյանը:
Այս պահին, ինչպես տեղեկացրեց փաստաբաններից Գևորգ Դավթյանը, շուրջ 200 փաստաբան է միացել բողոքի ակցիային:
Թեմային առնչվող. Հունիսի 10-ին նոր գործադուլ. Փաստաբանները դարձյալ ոտքի են կանգնում
Երկու օրով գործադուլ հայտարարած փաստաբանների թիվն անցել է 100-ից
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
