Ձեր վստահելի աղբյուրը

 Ստամբուլի ցուցարարները Թուրքիայի կառավարությանը ներկայացրել են պահանջներ, որոնց կատարման դեպքում միայն կդադարեցնեն զանգվածային բողոքի ակցիաները: Այս մասին հայտնում է «Վզգլյադ» լրատվական գործակալությունը:

« Taksim platform նախաձեռնող խումբը, որը միավորում է Ստամբուլի կենտրոնում ցուցարարների առավել ակտիվ մասի ներկայացուցիչներին, ձևակերպել է Էրդողանի կառավարությանն ուղղված մի շարք պահանջներ: Որպեսզի ցուցարարները դադարեցնեն բողոքի գործողությունները, այդ պահանջները կառավարությունը պետք է անվերապահորեն կատարի»,- հայտարարել է նախաձեռնության անդամ Ահմեդ Բեզօղլուն:

Վերջինիս խոսքով, հիմնական պահանջներն են Գեզի պուրակի պահպանումը, ցուցարարների հետ բախումների ժամանակ ոստիկանության կողմից արցունքաբեր գազ կիրառելու լիակատար արգելքը, ժողովրդավարական ազատությունների, այդ թվում՝ խոսքի և արտահայտվելու ազատության ընդլայնումը:

Բացի այդ, ցուցարարները պահանջում են պաշտոններից հեռացնել բոլոր այն պաշտոնյաներին, որոնք պատասխանատու են խաղաղ ցուցարարների դեմ բռնությունների համար, ինչպես նաև ազատել Թաքսիմ հրապարակում բողոքի ակցիաների ժամանակ ձերբակալված բոլոր մասնակիցներին:

«Եթե Էրդողանի կառավարությունը չկատարի այդ պահանջները, ապա Ստամբուլի կենտրոնում ցույցերը կշարունակվեն: Մենք մտադիր ենք շարունակել մեր բողոքի ցույցերը մինչև կառավարության կողմից մեր բոլոր պահանջների բավարարումը»,- հավելել է Ա. Բեզօղլուն:

Հիշեցնենք, որ բողոքի զանգվածային ցույցերի առիթ է դարձել Ստամբուլի կենտրոնի Գեզի պուրակի տեղում առևտրի կենտրոն կառուցելու Թուրքիայի կառավարության որոշումը: Ցույցերի ընթացքում տուժողների թիվը գերազանցել է 3 հազարը և զոհվել է 2 մարդ: