Ձեր վստահելի աղբյուրը

«Այցելել եմ Արտակ Բուդաղյանին: Երեկ եմ այցելել, որովհետև գտնվում էի Հայաստանից դուրս: Նրա առողջական վիճակը միջին ծանրության է, արդեն կայուն է: Խոսել եմ կարճ, չեմ ծանրաբեռնել, վատ վիճակում է»,-այսօր Նոյեմբերյանի զորամաս այցելության ժամանակ լրագրողների հետ ճեպազրույցում հայտնեց ՀՀ պաշտպանության նախարար Սեյրան Օհանյանը` անդրադառնալով հունիսի 1-ի Սյունիքի նախկին մարզպետի տան մոտ տեղի ունեցած դեպքին:

Հիշեցնենք, որ հնչած կրակոցների հետևանքով մահացել է Գորիսի քաղաքաապետի նախկին թեկնածու Ավետիք Բուդաղյանը, նրա եղբայր, Ասկերանի զորամասի հրամանտար, ՊՆ գնդապետ Արտակ Բուդաղյանը վիրավորվել է:

«Դատապարտում ենք ցանկացած միջանձնային այդպիսի դեպքեր, որոնց հետևանքով հատկապես մահվան ելքեր են գրանցվել: Ոչ միայն զինվորականի ու քաղաքացու միջև, այլև քաղաքացիների միջև մահվան ելքով նման դեպքերը դատապարտելի են»,-հավելեց Օհանյանը, նկատելով, որ այս պահին ավելի մեծ մարտահրավերներ կան դրսից, որոնց դիմակայելու համար ներսում պետք է միասնական լինել:

Միևնույն ժամանակ պաշտպանության նախարարը նշեց. «Դատապարտում ենք այն ոտնձգությունները, որոնք կատարվում են զինծառայողների` և զինվորի և բարձրաստիճան սպայի նկատմամբ: Գտնում եմ, որ այս դեպքը տեղի է ունեցել միջանձնային հարաբերությունների խախտման արդյունքում`պահի ընթացքում ծագած: Չեմ կարծում, որ այս դեպքը կարող է պատճառ լինել, որ զինվորական հագուստի կամ կեցվածքի անկում լինի: Այսօր մեր հայոց բանակի սպաներն այնպիսի խնդիրներ են կատարում, որ գնահատելի են: Վերջին տարիներին, վստահեցնում եմ, որ անպատժելիության մթնոլորտը կամաց-կամաց մոտենում է մինիմումի»:

Գլխավոր դատախազության հաղորդմամբ, 2013թ. հունիսի 1-ին՝ ժամը 23:00-ի սահմաններում, Գորիս քաղաքում, Սյունիքի մարզպետ Ս. Խաչատրյանին պատկանող առանձնատան դիմաց տեղի ունեցած վիճաբանության ընթացքում Ավետիք Բուդաղյանի սպանության դեպքի առթիվ հարուցված քրեական գործի շրջանականերում երկու անձի՝ Տիգրան Խաչատրյանին եւ Զարզանդ Նիկողոսյանին մեղադրանք է առաջադրվել։

Նախաքննության ընթացքում ձեռք բերված ապացույցների հիման վրա Տ.Խաչատրյանին եւ Զ.Նիկողոսյանին հունիսի 3-ին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 6-րդ կետով, 112-րդ եւ 235-րդ հոդվածնիերի 1-ին մասերով, համապատասխանաբար՝ շատերի կյանքի համար վտանգավոր եղանակով սպանության, դիտավորությամբ մեկ ուրիշի առողջությանը ծանր մարմնական վնասվածք պատճառելու եւ ապօրինի զենք-ռազմամթերք ձեռք բերելու եւ պահելու համար։

Նույն օրը Սյունիքի մարզի ընդհանուր իրավասության դատարանը բավարարել է Զ.Նիկողոսյանի և Տ.Խաչատրյանի նկատմամբ կալանավորումը որպես խափանման միջոց ընտրելու մասին նախաքննական մարմնի միջնորդությունը եւ նրանք տեղափոխվել են «Նուբարաշեն» քրեակատարողական հիմնարկ։

ՀՀ պաշտպանության նախարարության քննչական ծառայությունում նախաքննությունը շարունակվում է։