ՊՆ քննչական ծառայության նկատմամբ վստահության մասին. Օհանյանի ու Հարությունյանի դիտարկումները
Հայաստանի պաշտպանության նախարար Սեյրան Օհանյանի համար ցավալի է, որ բանակում զինվորներ են զոհվում, որոնց մի խմբի մայրերը գրեթե ամեն շաբաթ ստիպված են կառավարության առաջ բարձրացնել իրենց բողոքը` նախաքննության ընթացքից:
«Վերջին ժամանակահատվածում մեր հրամանատարներին այսպիսի ցուցում եմ տվել, որ որքան կշտամբանք լինի, ֆիզիկական ուժ կիրառվի հրամանատարների, տարբեր զինծառայողների նկատմամբ, այնուամենայնիվ, դա շատ չնչին է մարդկային կորուստների նկատմամբ: Նույնիսկ քրեական գործի ընթացքը վերջնակետին հասցնելը, ազատազրկումը մինչև 10-15 տարի, դա չնչին է կորստի նկատմամբ»,- զինծառայողների մահվան կապակցությամբ հարուցված քրեական գործերի ընթացքի հետ կապված մայրերի դժգոհությունների մասին Panorama.am-ի հարցին ի պատասխան Նոյեմբերյանի N զորամաս կատարած այցից հետո ասաց Պաշտպանության նախարար Սեյրան Օհանյանը:
Նախարարը նկատեց, որ քրեական գործերն ավարտին հասցնելու համար ամեն ինչ է արվում, և ի վերջո, դրա համար անհրաժեշտ է հստակ քաղաքականություն, փորձաքննություններ անցկացնելու հերթականություն, օպերատիվ-հետախուզական աշխատանքներ: Ծնողների անհանգստությունն ու մտավախությունները, ըստ պաշտպանական գերատեսչության ղեկավարի, հասկանալի են, բայց նախաքննության ընթացքում գործողությունները ժամանակ են պահանջում:
«Այսօրվա զինվորական դատախազը և այսօրվա բանակի քննչական ծառայությունը, ռազմական ոստիկանության աշխատակիցները մաքսիմալն են անում: Եթե նույնիսկ որոշ բացթողումներ ընթացքում լինում են, եղել են դեպքեր, որ ծնողների հուշմամբ, տարբեր տեղեկություններով այդ քրեական գործի ըթնացքը լրացվել է և ինչ-որ մի վերջնական եզրի հասել են: Սա է իրականությունը»,- հավելեց Օհանյանը: Հետաքրքրվեցինք, թե եթե մաքսիմալն է արվում, ապա ինչո՞ւ են զոհված զինծառայողների մայրերը բողոքում, Պնախարարը պատասխանեց կարճ. «Իրենցից պետք է հարցնել, թե ինչու են բողոքում»:
ՊՆ քննչական ծառայության նկատմամբ վստահության մասին
Պաշտպանության նախարարության քննչական ծառայության պետ Արմեն Հարությունյանը դժվարանում է մատնանշել տվյալներ, թե տարեկան զինվորական գործերով որքան բացահայտում է կատարում իր ղեկավարած ծառայությունը: «Վիճակագրական տվյալներ չեմ կարող ներկայացնել: Իսկ ինչ վերաբերում է կոնկրետ քրեական գործերի շարժի դժգոհությանը, ապա հետաքննության և նախաքննության նկատմամբ հսկողություն իրականացնում է Զինվորական դատախազությունը: Եթե խախտումներ լինեն, որոնք էապես ազդել են գործի քննության վրա, քննությունը շեղելու, կոծկելու համար, ապա, զինվորական դատախազության այսօրվա բծախնդիր հսկողության պայմաններում դրանք անպայման կհայտնաբերվեին, իսկ խախտումներ թույլ տված անձինք առնվազն կարգապահական պատասխանատվության կենթարկվեին», -Panorama.am-ի թղթակցի հետ զրույցում ՊՆ քննչական ծառայության նկատմամբ վստահության մասին հարցին ի պատասխան ասաց ՊՆ քննչական ծառայության պետը:
Նրա խոսքով, դեպքեր են եղել, որ քրեական գործերով նախաքննության, այնուհետև դատաքննության ավարտից հետո տուժողների իրավահաջորդները թե նախարարին, թե նախագահին քննիչների ու դատախազների մասին գովաբանական ու շնորհակալական նամակներ են ուղարկել:
Միաժամանակ, կան քրեական գործեր էլ, մասնավորապես Տիգրան Օհանջանյանի, Վալերի Մուրադյանի գործերով նախաքննությունը դեռ չի ավարտվել: «Դեպքեր կան, որոնց վերաբերյալ նախաքննությունը կարող է երկար տևել և բացահայտման առումով դժվարություն են ներկայացնում: Պատմության մեջ գործեր ունենք, որոնք երկար տարիներ շարունակ չեն բացահայտվում, նույնիսկ կասեցվում են», -մեզ հետ զրույցում նկատեց Հարությունյանը:
Քննչական ծառայության պետի համար էլ է հասկանալի որդուն կորցրած ծնողների վիճակը, սակայն նրա խոսքով, քրեական գործեր կան, որոնց նախաքննության շրջանակներում ձեռք են բերվել տարբեր փորձաքննությունների եզրակացություններ, անհրաժեշտ փաստաթղթեր, սակայն որևէ մեկին քրեական պատասխանատվության ենթարկելու համար հիմք չի եղել:
«Այդ դեպքում էլ առաջանում է ծնողների դժգոհությունը, որը մենք շատ լավ ենք հասկանում», -նկատեց Արմեն Հարությունյանը:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
