Ձեր վստահելի աղբյուրը

ՀՀ կառավարությանն առընթեր պետական եկամուտների կոմիտեի տվյալներով` 2013 թ. առաջին եռամսյակում Հայաստանից արտահանվել է մոտ 19 հազ. գլուխ ոչխար: Նախորդ տարվա առաջին եռամսյակի համեմատ՝ ոչխարների արտահանումն ավելացել է մոտ 50 անգամ:

Panorama.am-ը ՀՀ գյուղատնտեսության նախարարությունից փորձեց պարզել, թե ինչով է պայմանավորված արտահանման ծավալների կտրուկ աճը:

ՀՀ գյուղատնտեսության նախարարության անասնաբուծության և անասնաբուժության վարչության պետ Աշոտ Հովհաննիսյանը մեզ հետ զրույցում նշեց, որ 2013թ-ի առաջին եռամսյակում հանրապետությունից ոչխարների արտահանման բարձր ցուցանիշը նախորդ տարվա նույն ժամանակահատվածի համեմատությամբ պայմանավորված է 2012 թվականին հանրապետությունից ոչխարների արտահանման ցածր ցուցանիշով:

Ներկայացնելով որոշ վիճակագրական տվյալներ, Ա.Հովհաննիսյանը հայտնեց, որ 2009 թվականին հանրապետությունից արտահանվել է 146.7 հազար գլուխ ոչխար, 2010 թ.-ին` 181.1 հազար, 2011 թ.-ին շուրջ 141 հազար, իսկ 2012 թվականին` ընդամենը 61 հազար գլուխ: Ընդ որում, 2012 թվականին ոչխարների արտահանումը հիմնականում իրականացվել է տարվա վերջին ամիսներին: Ա.Հովհաննիսյանի խոսքերով` նախորդ տարի ոչխարների արտահանման ցածր ծավալները պայմանավորված էին դոլարի նկատմամբ Իրանի Իսլամական Հանրապետության ազգային արժույթի արժեզրկմամբ:

Նշենք, որ երևանյան մի քանի խանութներում ու շուկաներում մեր հարցումները ցույց տվեցին, որ վերջին ամիսներին, մսամթերքի գինն աճել է: ՀՀ ազգային վիճակագրական ծառայության տվյալների համաձայն` մսամթերքի ապրանքախմբում 2013թ. մայիսին 2012թ. մայիսի համեմատ գրանցվել է 4.1% գնաճ: Ինչ վերաբերում է ոչխարի մսին, ապա այն, ըստ ԱՎԾ-ի, թանկացել է 1.7%-ով: Երևանյան շուկաներում մսավաճառները կարծում են, որ ոչխարի ու գառան մսի թանկացումը կապված է հենց արտահանման ծավալների մեծացման հետ:

Ա. Հովհաննիսյանն էլ նշեց, որ մսեղիքի գները հանրապետության ներքին շուկայում չեն աճել: Ավելին, խոզի մսի գները նվազել են շուրջ 30 %-ով (նախորդ տարում խոզի մսի 1 կգ-ի մանրածախ գինը տատանվում էր 3.5-4 հազար դրամի սահմաններում, մինչդեռ այս տարի այն կազմում է 2.3-2.7 հազար դրամ):

Ինչ վերաբերում է գառան մսի գներին, ապա վարչության պետի խոսքերով, դրա գներն ունեն սեզոնային բնույթ և պայմանավորված են գառների ծնի ժամանակահատվածով, քանի որ մեր հանրապետությունում գառների զանգվածային ծինը տեղի է ունենում դեկտեմբեր-մարտ ամիսներին և մսի համար իրացվում է հիմնականում 5-6 ամսականից սկսած: «Ուստի մայիս-հունիս ամիսներին մսի համար կարելի է իրացնել առավելապես դեկտեմբեր ամսին ծնված գառներին, որոնց տեսակարար կշիռը կազմում է մսի համար իրացվող գառների ընդամենը 20 %-ը: Դա է պատճառը, որ ներկայումս 1 կգ գառան մսի շուկայական գինը կազմում է 3-3.2 հազար դրամ»,- ասաց նա:

Հարցին` եթե արտահանման միտումները շարունակվեն նաև առաջիկայում, արդյոք դա չի բերի ավելի մեծ գնաճի Հայաստանում, Ա.Հովհաննիսյանը նշեց, որ թեև ընթացիկ տարում ակնկալվում է, որ գառների արտահանման ծավալները կկազմեն 100-150 հազար գլուխ, այնուամենայնիվ դրանից ոչխարի մսի գները չեն աճի: Ավելին, ընթացիկ տարում, նախորդ տարվա համեմատությամբ ոչխարների գլխաքանակն ավելացել է ավելի քան 80 հազար գլխով (ինչին նպաստել է ոչխարների արտահանման գործոնը), ինչը հիմք է հանդիսանում պնդելու, որ աշնան ամիսներին տեղի կունենա ոչխարի մսի գնանկում 8-10 %-ի սահմաններում:

Նշենք նաև, որ Հայաստանից ոչխար է արտահանվում հիմնականում Իրանի Իսլամական Հանրապետություն: Փոքր ծավալներով արտահանվում է նաև Արաբական Միացյալ Էմիրություններ, Իրաք, Քուվեյթ և Վրաստան: