Ձեր վստահելի աղբյուրը

Ամառը, թեև դժվարությամբ, բայց կամաց-կամաց մտնում է իր իրավունքների մեջ, իսկ դրան զուգահեռ շատերին սկսում է անհանգստացնել այն հարցը` որտեղ հանգստանալ և ինչպես կազմակերպել հանգիստը: Մարդկանց մեծ մասը նախընտրում է գնալ Վրաստան, Բուլղարիա, ոմանք, իհարկե, հնարավորության դեպքում մեկնում են Իտալիա, Իսպանիա, Ֆրանսիա և եվրոպական այլ երկրներ, իսկ ոմանք էլ նախընտրում են իրենց հանգիստն անցկացնել Հայաստանում:

Panorama.am-ը տուրիստական գործակալություններից փորձեց պարզել, թե որտե՞ղ են այս տարի նախընտրում հանգստանալ հայերը: Տուրիստական գործակալությունների ներկայացուցիչները տեղեկացրեցին, որ այս տարի եվրոպական երկրներում հանգստանալ ցանկացողների թիվը նվազել է: Պատճառը վիզաների հետ կապված խնդիրներն են: Հետևաբար` քաշքշուկից և թղթաբանությունից խուսափելու համար հայերը նախընտրում են գնալ Վրաստան, Արաբական Միացյալ էմիրություններ, որտեղ վիզաների ձեռք բերումն ավելի հեշտ է:

Տուրիստական գործակալություններից մեկի գործադիր տնօրեն Դիանա Երիցյանը Panorama.am-ի հետ զրույցում նշեց, որ Հայաստանում շարունակում է հանգիստը թանկ արժենալ: Այդ իսկ պատճառով մարդիկ նախընտրում են իրենց հանգիստը կազմակերպել արտերկրում, սակայն հիմա էլ ավիատոմսերի բարձր գներն են խոչընդոտ հանդիսանում: «Արտերկրում հյուրանոցներն ավելի մատչելի են, քան Հայաստանում: Մեր երկրում երկու հոգին միջինն օրական պետք է վճարի 30 հազար դրամ, իսկ օրինակ` Հունաստանում դա կարժենա 20 հազար դրամ: Պարզապես ավիատոմսերի բարձր գները թույլ չեն տալիս, որպեսզի մարդիկ մատչելի հանգիստ կազմակերպեն»,- ասաց Դ.Երիցյանը:
Նա նաև նշեց, որ այս տարի նվազել է հանգստացողների թիվը: «Մեր մշտական հաճախորդները, ովքեր տարին երկու անգամ էին հանգստանալու գնում, հիմա մեկնում են մեկ անգամ, այն էլ 7-10 օրով: Մարդկանց ֆինանսական վիճակը վատացել է», - ասաց Դ.Երիցյանը: Այդուհանդերձ, նա նկատեց, որ հայերը շարունակում են նախընտրել հանգստանալ արտերկրում, քանի որ այնտեղ գները մատչելի են, իսկ ծառայությունները` շատ:
Ըստ նրա` Իտալիայում մեկ անձի համար 7 օրյա հանգիստը միջինը արժե 800 եվրո, որի մեջ մտնում է ավիատոմսը, հյուրանոցը` մեկանգամյա սնունդով: Իսպանիսյում էլ գները գրեթե նույն են, հնարավոր է մի փոքր ավելի էժան:

Մեկ այլ ընկերության մենեջեր Մանուշ Քալանթարյանն էլ Panorama.am-ի հետ զրույցում փաստեց, որ այս տարի եվրոպական երկրներ գնացողների թիվը նվազել է` կապված վիզայի հետ: Սակայն հայերի նախընտրություններն ամառային արտերկրյա հանգստի դեպքում չեն փոխվում` Իտալիա, Իսպանիա, Վրաստան և այլն: Մեկ անձի համար 7-ից 10-օրյա հանգիստն առանց ավիատոմսի Իտալիայում արժե 330 եվրո, ավիատոմսով` 1400-1500 եվրո: Այս պահին ընկերությունն թեժ տուր ունի դեպի Վրաստան, որը սկսվում է 78 հազար դրամից, դրա մեջ մտնում են տրանսպորտի, հյուրանոցի ծախսերը, ինչպես նաև երեքանգամյա սնունդը:
Մ.Քալանթարյանը նշեց նաև, որ հայերը նախընտրում են գնալ Եգիպտոս, Շրի Լանկա: Թեև ամառը Դուբայում հանգստանալու համար նախընտրելի չէ, այդուհանդերձ, Դուբայում հանգստանալու պահանջարկը մեծ է. 1 անձի համար 7օրյա հանգիստը Դուբայ սկսվում է 870 դոլարից: Ըստ նրա` հայերը հիմնականում նախընտրում են ծովափնյա երկրներ, սակայն նրանք շատ պահանջկոտ են` ցանկանում են քիչ գումար վճարել, բայց օգտվել բարձրակարգ հյուրանոցների կողմից առաջարկվող բոլոր ծառայություններից:

Տուրիստական գործակալություններից մյուսի տնօրեն Ռուզաննա Ալոյանը հայտնեց, որ ամառվա սեզոնին հայերը նախընտրում են մեկնել եվրոպական երկրներ, իսկ ձմռանը Արաբական Միացյալ էմիրություններ: «Իսկ գները կախված են նրանից, թե ինչ հյուրանոցներ են նախընտրում հանգստացողները: Այսինքն` ամեն մեկն իր գրպանին համապատասխան հանգիստ է կազմակերպում»,- նշեց նա` հավելելով, որ երկու հոգու համար 7 օրյա հանգիստը եվրոպական երկրներ սկսվում է 1200 դոլարից: Ինչ վերաբերում է Վրաստանին, ապա այս տարի մեկնողների թիվը նվազել է:

Մի ուրիշ ընկերությունից էլ հաստատեցին, որ հայերը չեն փոփոխում հանգստի կազմակերպման նախընտրությունները` Վրաստան, Եգիպտոս, Դուբայ և այլն: Անթալիա մեկնում են հանգստի` 7 օրվա համար վճարելով միջինը 600 դոլար, իսկ ակցիաների ժամանակ` 300 դոլար, Վրաստանում` 42 հազար դրամ, իսկ Դուբայում 5 օրյա հանգիստը երկու հոգու համար արժե 400 հազար դրամ` ներառյալ ավիատոմսը, Եգիպտոսում 7 օրյա հանգիստը մեկ անձի համար սկսվում է 380 դոլարից: «Հայաստանում հանգստանալու համար մարդիկ վճարում են այնքան, որքան արտերկրում, ուստի հայերը հիմնականում նախընտրում են այդ գումարով հանգստանալ ոչ թե Հայաստանում, այլ արտերկրում»:

Եվս մեկ տուրիստական գործակալությունից հայտնեցին, որ հայերը հիմա նախընտրում են հանգստանալ ավելի մոտ երկրներում` Վրաստանում, Արաբական միացյալ էմիրություններում և Թուրքիայում: Այսպես, ըստ նրանց, եվրոպական երկրներում մեկ անձի համար 7օրյա հանգիստը սկսվում է 1300 եվրոյից, իսկ առանց ավիատոմսի` 460 եվրոյից, Վրաստանում կարելի է հանգստանալ` վճարելով 70- 100 հազար դրամ: