Ձեր վստահելի աղբյուրը

Կաթնամթերքի արտադրությամբ զբաղվող ընկերությունները նվազեցրել են մթերվող կաթի գինը, ինչն առաջացրել է գյուղացիների դժգոհությունը:

«Իրազեկ և պաշտպանված սպառող» ՀԿ-ն պատրաստվում է հետազոտություն իրականացնել, պարզելու` թե ինչպես եղավ, որ կաթնամթերքի գինը բարձրացավ, իսկ մթերման գինը նվազեց:

«Համապատասխան նամակներով կդիմենք լիազոր մարմիններին, պատասխաններ ստանալուց հետո հանդես կգանք համապատասխան հայտարարությամբ»,-Panorama.am-ին ասաց ՀԿ նախագահ Բաբկեն Պիպոյանը:

«Գալա»-ն երեկ հայտնել էր, որ Շիրակի մարզի մի շարք գյուղերում կաթ մթերող ընկերությունները առանց որևէ մեկնաբանության իջեցրել են կաթի մթերման գինը. նախկին 150-ի փոխարեն գյուղացիներից կաթը գնում են 140 դրամով: Ըստ աղբյուրի, կաթի մթերման գինը իջեցրել են միաժամանակ բոլոր ընկերությունները՝ «Իգիթ»-ը, «Աշտարակ կաթ»-ը, «Թամարա»-ն և այլն:

Գյուղատնտեսության նախարարության համար, պարզվում է, մթերման գնի նվազումը սպասելի էր:
ԳՆ Անասնաբուծության և անասնաբուժության վարչության պետ Աշոտ Հովհաննիսյանը Panorama.am-ին հայտնեց, որ աշնան վերջին, ձմռան ու գարնան առաջին ամիսներին կաթի արտադրության ծավալները նվազում են, ինչի հետևանքով էլ կաթի մթերման գինը բարձրանում է:

«Ամսական արտադրվում է 25-30 հազար տոննա կաթ: Այդ ընթացքում մթերման ամենաբարձր գներն են սահմանվում` 170-200 դրամ: Ամեաբարձր գնով մթերում է Բոնիլատը, այն գնում է միայն ներկրված կովերի կաթը»,-ասաց Հովհաննիսյանը, ավելացնելով, որ կաթի արտադրության ծավալների աճին զուգահեռ մթերման գինը նվազում է:

Օրինակ, հունիսին արտադրվել է 80 հազար տոննա: Նախարարության պաշտոնյան նկատել է, որ մթերման գները նախորդ տարվա նույն ժամանակահտվածի համեմատ բավականին բարձր են, եթե անցյալ տարվա այս ամիսներին մթերվում էր 120-130 դրամով, ապա այսօր 150-160 դրամով:

«Դա պայմանավորված է վերամշակողների կողմից անարատ կաթի պահանջարկի կտրուկ ավելացմամբ և իհարկե հանրապետությունից կաթնամթերքի արտահանման ծավալների ավելացմամբ` հիմնականում պանրի տեսքով: Օրինակ 2012-ին 2011-ի համեմատ 2.5 անգամ պանրի արտահանման ծավալներն ավելացել են: Այս տարի միայն մայիսի ամսվա վերջին շաբաթում 42 տոննա պանիր է արտահանվել»,-ասաց Ա. Հովհաննիսյանը:

Մամուլում բարձրացված աղմուկից հետո Ա. Հովհաննիսյանը զրուցել է «Իգիթ» ընկերության տնօրինության հետ: «Նորից մթերման գինը կդարձնեն 150 դրամ»,-ասաց Ա. Հովհաննիսյանը:

Գյուղատնտեսության նախարարության պաշտոնյան այն համոզմանն է, որ մթերման գնի նվազմանը զուգահեռ կէժանանա նաև կաթնամթերքը:
«Դա մեր ասելու բանը չի, բայց կաթի մթերման գնի նվազումը պետք է տրամաբանորեն հանգեցնի վերամշակողների կողմից գնի համամասնորեն իջեցմանը»,-ասաց Ա. Հովհաննիսյանը:

Տնտեսական մրցակցության պաշտպանության պետական հանձնաժողովի ամենօրյա մոնիտորինգը 5 խոշոր սուպերմարկետներում` «Սաս», «Սթար», «Երևան Սիթի», «Նոր Զովք», «Մոսկվիչկա» ցույց է տվել, որ վերջին օրերին կաթնամթերքն էժանացել է 5-20 դրամով:
Օրինակ, «Մոսկվիչկա» սուպերմարկետում «Աշտարակ կաթ» ընկերության 200 գրամանոց 1.8 տոկոս յուղայնությամբ թթվասերը 250 դրամից դարձել է 240 դրամ: Նույն թթվասերը «Երևան սիթի»-ում վաճառվում է 230 դրամով` նվազել է 5 դրամով: «Սթար»-ում նույն թթվասերն էժանացել է 10 դրամով` վաճառվում է 230 դրամով: Մյուս սուպերմարկետներում ևս հանձնաժողովի աշխատակիցներ էժանացում արձանագրել են: «Մարիաննա» ընկերության պարագայում դեռ գների իջեցում չեն արձանագրել:

Եթե ընկերությունը չնվազեցնի գները, Հանձնաժողովը կարո՞ղ է ստիպել նրանց դա անել:

«Մենք չենք կարող գին կարգավորել, դա մեր գործառույթը չէ: Մենք կարող ենք չարաշահման հետ կապված քայլեր ձեռնարկել»,-ասաց հանձնաժողովի մամուլի քարտուղար Գայանե Սահակյանը, հիշեցնելով, որ ազատ շուկայական տնտեսությունում գինը որոշվում է առաջարկի և պահանջարկի հարաբերությամբ:
«Խոշորների դեպքում հանձնաժողովը նայում է, որ գների բարձրացումը լինի համահունչ` մթերված հումքը արտադրվածին, մենք նայում ենք գնագոյացման ողջ շղթան»,-ասաց նա:

«Աշտարակ Կաթ» ընկերությունից պատասխանեցին, որ կաթնամթերք արտադրող գործարանում կաթը գնվում էր միջինը 160 դրամով` նախորդ տարվա 130-ի փոխարեն: Արդյունքում կարելի է փաստել, որ կաթնամթերքի հումքի շուկայում, նույնիսկ ամառային փուլին անցնելուց հետո էլ կաթը մթերվում է անցյալ տարվա համեմատ 25-30%, կամ 30 դրամով բարձր գնով:

«Մի կարևոր նկատառում ևս. անկախ այն բանից, թե ինչ արժեքով է գնվում կաթը, վերամշակողները վճարում են նաև 20% ԱԱՀ, մինչդեռ ֆերմերային տնտեսությունները ազատված են ԱԱՀ-ից: Արդյունքում վերամշակողի վրա կաթի գինը 20%-ով ավելի բարձր է նստում: Կաթնամթերքի գների հետ կապված՝ պետք է հաշվի առնել նշված հանգամանքները ևս»,-պատասխանեցին ընկերությունից:

Հարցին, թե ինչպես է մթերման գնի նվազումն անդրադարձել ընկերության արտադրած կաթնամթերքի գնագոյացման վրա, Ընկերությունից, նշեցին, թե արտադրատեսականու գնային քաղաքականությունը պայմանավորված չէ միայն այս տարվա կաթի գների հետ, այլ վերջին երեք տարիներին հումքի, արտադրության համար անհրաժեշտ նյութերի, էներգակիրների գների բարձրացմամբ, որտեղ ընդգրկված չէ այս տարվա ընթացքում էներգակիրների գնաճը:

«Կաթնամթերք արտադրող ընկերությունները երեք տարի շարունակ արտադրատեսականու գները կարողացել են համեմատաբար հաստատուն պահել իրենց ներքին ռեսուրսների և վարկերի հաշվին: Վերջին անգամ մեր արտադրատեսականու գները վերանայվել են այս տարվա մայիս ամսին և ներկայումս որևէ նոր փոփոխության չեն ենթարկվել»,-ասացին ընկերությունից:

Նախորդող հրապարակում`

Հերթական թանկացումը. 10-12%-ով կաթնամթերքի գները բարձրացել են

Գյուղացին դժգոհ է կաթի մթերման գնից