Ձեր վստահելի աղբյուրը

Մոսկովյան «Lotte Plaza» հյուրանոցում հայազգի գործարար Հովհաննես Մուրադյանի սպանության հեղինակին հնարավոր է գտնել հյուրանոցի անվտանգության համակարգի կողմից տեսանկարահանող սարքերի միջոցով, փոխանցում է «Lifenews»-ը: Լրատվամիջոցի տրամադրության տակ են հայտնվել կադրերը, թե ինչպես են սպանում հայազգի գործարարին:

Տեսանյութում հարվածի պահը չի ֆիքսվել, սակայն պարզ երևում է ինչպես է սև հագած մարդասպանը վազելով մոտենում հյուրանոց մտնող գործարարին, այնուհետև երևում է, թե ինչպես է արդեն հարված ստացած գործարարը կորցնում հավասարակշռությունը, անցորդների օգնությամբ նստում քարին ու պառկում:

Գործարարը տեղում մահացել է:

Հովհաննես Մուրադյանը Իրաքում Հայաստանի արտակարգ և լիազոր դեսպան Մուրադ Մուրադյանի եղբայրն էր:
Ռուսաստանի Դաշնության Ներքին գործերի նախարարության քննչական ծառայությունում Իրաքում Հայաստանի դեսպան Մուրադ Մուրադյանի եղբոր` գործարար Հովիկ Մուրադյանի սպանության փաստի կապակցությամբ քրեական գործ է հարուցվել` ՌԴ Քրեական օրենսգրքի 105 հոդվածի հատկանիշներով` «սպանությունը»:

Հայտնի է, որ Հովհաննես Մուրադյանը հյուրանոց էր գնացել բիզնեսի գծով իր գործընկերոջ հետ հանդիպելու համար: 20 տարուց ավել է, ինչ նա և իր եղբայրը, ըստ կայքի, ղեկավարում են շինարարական «ԲԱՄՕ» կոնցեռնը:

Ի դեպ, «ԲԱՄՕ» ընկերությանն է պատկանում Երևանի Կ. Դեմիրճյանի անվան մարզահամերգային համալիրը:

Նախորդող հրապարակումներ. «ԲԱՄՕ»-ի հայազգի սեփականատիրոջ սպանության վարկածներ են շրջանառվում
Իրաքում ՀՀ դեսպանի եղբոր սպանության կապակցությամբ քրգործ է հարուցվել