Ձեր վստահելի աղբյուրը

«Ընդդիմության աթոռի վրա աչք չունենք», -այսօր խորհրդարանական ճեպազրույցների ժամանակ հայտարարեց ԱԺ Հանրապետական խմբակցության ղեկավար Գալուստ Սահակյանը, անդրադառնալով ՀՀԿ-ի ընդդիմություն դառնալու մասին հայտարարություններին:

Նշենք, որ ՀՀԿ-ի ընդդիմադիր դեր ստանձնելու մասին դատողություններն ի հայտ եկան այն բանից հետո, երբ ԱԺ նախագահ Հովիկ Աբրահամյանը ՎՊ հաշվետվության քննարկման ժամանակ հայտարարեց, թե կառավարության մեջ կան «թալանչիներ», որոնք «լափում» են պետական միջոցները:

«Քաղաքական խնդիրներ կան, որն իր վրա պետք է վերցնի ընդդիմությունը, բայց կան ակտիվ քաղաքական գործիչներ ընդդիմությունից, բայց ինքը զրոյական դաշտից դուրս չի եկել: Դրա համար և այն դերն ենք կատարում, և մյուս դերակատարումն ունենք: Զրոն թիվ է, սպասում եմ, թե զրոյից առաջ թվանշանը կդնեն, թե՞ հետո»,- իր ոճով հայտարարեց Գալուստ Սահակյանը:

Նրա խոսքով, ՎՊ հաշվետվության քննարկման ժամանակ պարզվեց, որ ըմբոստ, կիասաըմբոստ ու պոպուլիստ քննադատողները «Վերահսկիչ պալատի մասին» օրենքը չէին կարդացել և փորձեր էին անում դատական ատյանի վերածել Ազգային ժողովը:
«Դա պատահական չէ, որ Վերահսկիչ պալատի հաշվետվությունն ի գիտություն ենք ընդունում, ոչ թե քվերակում ենք, օրենք ենք դարձնում, այլ ի գիտություն ենք ընդունում, որովհետև դա հրապարակվում է, և եթե օրենք ես դարձնում, դա դառնում է մի տեսակ վճիռ-մեղադրական»,- ասաց Գալուստ Սահակյանը:

Խորհրադարանական մեծամասնության ներկայացուցչի կարծիքով, Վերահսկիչ պալատի հաշվետվության ներկայացումը լավ անցավ, բոլոր քաղաքական ուժերն իրենց տեսակետները հայտնեցին: Այժմ, նրա խոսքով, պետք է համբերել և տեսնել, թե կառավարության տեսակետն ինչպիսին է: Ակնհայտ է, որ որոշակի դիրքորոշումներ կլինեն քննարկումներից հետո: ՀՀԿ խմբակցության ղեկավարի խոսքով՝ ամենակարևորը քաղաքական դիրքորոշում կլինի, վարչարարական դիրքորոշում, եթե անհրաժեշտություն լինի՝ նաև քրեական դիրքորոշում:

«Չարաշահումներ, հանցագործություններ չի կարելի անձերի վրա բարդել, դա հասարակական երևույթ է, իսկ իշխանությունները, հասարակական ու քաղաքական ուժերն էլ պիտի հետամուտ լինեն, որպեսզի հասարակությունը նման հանցագործությունների համար ազատ իր միտքը, խոսքը արտահայտի: Դա ավելի պրոֆիլակտիկ երևույթ է, քան բռնենք մի տասը հոգու մորթենք, ասենք՝ խնդիրն ավարտված է»,-հավելեց նա:

Լրագրողը հետաքրքրվեց, թե ՎՊ բացահայտումների հիման վրա պե՞տք է սպասել քրեական գործերի հարուցման, թե ոչ, Գալուստ Սահակյանը պատասխանեց, որ առաջին հերթին հասարակությունը պետք է վերահսկողություն սահմանի: «Իմ խնդիրը ոչ թե նա է, որպեսզի մեղավորներ գտնեմ, դա այլ մարմինների գործն է, իմ խնդիրը նա է, որպեսզի քաղաքական այնպիսի միջոցառումներ կամ մոտեցումներ ցուցաբերվեն, որ հստակ ձևով ժողովուրդը կարողանա ճիշտ բանաձևել ամեն ինչ»,- ասաց նա:

ՀՀԿ-ն չի՞ որոշել՝ պատիժներ լինելու են, թե՞ ոչ, հարցին Գալուստ Սահակյանը արձագանքեց, որ կուսակցությունը դատական ատյան չէ, որ մարդկանց պատժի: Այնուհետև հավելեց. «Ես ասացի՝ կլինեն քաղաքական որոշումներ, այսինքն՝ եթե կգտենք, որ էս թափթփվածությունը, թերություները, փոշիացումները, անարդյունավետ օգտագործումներ են, դա քաղաքական որոշման խնդիր է: Եթե կլինեն հանցագործություններ, դա քրեական որոշման խնդիր է: Եթե կլինեն հատվածային, ոլորտային առումով խնդիրներ, որտեղ չինովնիկներ են մեղավոր, էդտեղ կլինեն նաև վարչարարական մոտեցումներ: Հուսով եմ, որ անպայման անհետևանք չեն մնա քննարկումները»:

Հարցին, թե ե՞րբ է իշխանությունը պայքարելու յուրացումներ կատարող պատգամավորների դեմ, Գալուստ Սահակյանը պատասխանեց. «Էհ, էդպես որ գնա, երևի մամուլի աշխատողներին էլ հասնենք»: