Ձեր վստահելի աղբյուրը

Նվարդ Բարսեղյանը Ապարանի ավագանիում ՏԻՄ համակարգի ձևավորման առաջին իսկ օրվանից է, իսկ մինչ այդ եղել է շրջխորհրդի պատգամավոր: Ընդ որում` անցած տարիների ընթացքում նա եղել և մնում է միակ կին ավագանին, այն էլ անկուսակցական ու ապարանցիների բնորոշմամբ` շա~տ ակտիվ: Panorama.am-ի հետ զրույցում նա պնդեց, որ ակտիվ կինը միշտ էլ, բոլոր ժամանակներում իր տեղը ունեցել է քաղաքական-հասարակական գործընթացներում… եթե, իհարկե, նման ցանկություն կինն ունեցել է:

Կոնկրետ իր օրինակում այդ ակտիվությունը պայմանավորված է նաև ընտանեկան մթնոլորտով. ասում է` ծնողներս լիդերներ են եղել, աչքը բացել է` դա է տեսել ու ընդունել: Հետո արդեն կյանքի բերումով և այլնով խորացրել է այդ լիդերությունն իր մեջ` նաև տեսնելով, որ իրենից դա սպասում են` ընտանիքում, շրջապատում, հարազատ քաղաքում…

«Ես համոզված եմ, որ երբ կինը զգում է, որ հարգված ու ընդունված է, առավել ևս, երբ խոսքը մարզերին է վերաբերում, ապա առաջադրվելու դեպքում նա միանշանակ կանցնի: Կարծում եմ, ամենքը հաշվարկը անում է և նոր ռիսկի գնում»,- նշեց Նվարդ Բարսեղյանն ու օրինակ բերեց. անցած տարի տեղի ունեցած ՏԻՄ ընտրություններին ինքը չի ցանկացել առաջադրվել` անձնական դժբախտության պատճառով, սակայն Ապարանի քաղաքապետը անգամ չի ցանկացել դա լսել ու հորդորել է առաջադրել սեփական թեկնածությունը.

«Ասացի դե լավ… բայց հասկանալի պատճառներով` ոչ դուրս եմ եկել, ոչ էլ: Ու ամենաշատ ձայներով ես այս անգամ էլ ընտրվեցի ավագանի»,- պատմեց նա:

Ապարանը միշտ հայտնի է եղել իր ավանդույթներով, որոնցում կանայք, մեղմ ասած, առաջնորդի դիրքերում քիչ են երևացել: Սակայն Ն.Բարսեղյանը նշեց, որ լինելով միակ «կին-մարդը» ավագանիում, նա երբևէ խնդիրներ չի ունեցել հակառակ սեռի ներկայացուցիչների հետ.

«Կնոջ ներկայությունը չասեմ անհրաժեշտություն է, բայց դա պետք է սովորական բան լինի, որ կինը ևս քաղաքականության մեջ լինի: Շատերն ասում են, որ կնոջ ներկայությունը սթափեցնում է տղամարդկանց, նրանք իրենց զսպում են, այդ թվում և խոսքի մեջ: Բայց դա այդպես չի. եթե տղամարդը իր լեզվին ու զգացմունքներին ազատություն տվեց, ապա հաստատ չի նայի` կողքը կին կա, թե չկա: Կնոջ միտքը սուր է, կինը շատ բաներ է տեսնում, որոնք տղամարդու համար անտեսանելի են մնում ու նա անգամ ուղեղով դա չի անցկացնի, շատ հարցերում կինը բարձրաձայնում է այն խնդիրները, որոնք տղամարդկանց համար տարրական են.. Այ այս ամենի համար է կնոջ տեղը քաղաքականությունում»,- թվարկեց մեր զրուցակիցը:

Ն.Բարսեղյանը դեմ է, երբ կնոջը քաղաքական գործընթացներ են բերում արհեստականորեն, ցույց տալու նրա ներկայությունը ու նաև դեմ է, երբ չկրթված մեկն է ստանձնում որոշումներ կայացնելու գործառույթը: Ասում է, որ մարդը պետք է կրթված լինի, տարրական «ա»-ն ու «բ»-ն իրարից տարբերի, որովհետև երբեմն տեղեկանքներ են ստանում, որ ուղղակի անգրագիտության մարմնավորում են: Իսկ նման տեղեկանքները արդյունքում դրվում են համայնքի ղեկավարի կամ էլ այլ պաշտոնյայի սեղանի վրա, «բա ամոթ չի՞».

«Խոսքս նույնիսկ ոչ այնքան բարձրագույն կրթություն ստանալու մասին է, թեև դա, հասկանալի է, ցանկալի է, այլ ընդհանուր կրթվածության մասին է: Մարդ պետք է տիրապետի իր իրավունքներին, օրենքներին, ի վերջո զուր չեն ասում, որ ինչքան մարդ տեղեկացված է, այնքան էլ ապահովագրված է: Խոսքս այս ամենի մասին է և ոչ թե գնած դիպլոմների …. դա էլ ենք տեսել»,-նկատեց նա ու մեջբերեց ժողովրդական ասացվածքը` «Գիտունին գերի եղիր, անգետին սիրելի մի եղիր».

«Անգրագիտությունը մարդուն տանում է կործանման, ես դա հաստատ եմ ասում»,- հավելեց Ն.Բարսեղյանը, ով, ի դեպ, Ապարանի ավագ դպրոցի տնօրենն է:

Նշենք, որ տիկին Բարսեղյանի հետ զրուցեցինք «Հայաստանում տեղական ինքնակառավարման համակարգում կանանց արդյունավետ մասնակցության կարողությունների հզորացում» ծրագրի շրջանակում Աշտարակում կազմակերպված սեմինարի ժամանակ, որտեղ նա իր ակտիվությամբ դարձյալ աննկատ չմնաց: Ավագանու անդամը անգամ արժանացավ «Համալսարանական կրթությամբ կանանց ասոցիացիայի» նախագահ Ջեմմա Հասրաթյանի մեկնաբանությանը, թե` «ինչպե՞ս են ձեր այդ ակտիվությունը հանդուրժում ավագանիում», ինչն էլ հարուցեց ներկաների ժպիտը: Ի դեպ, Ն.Բարսեղյանը սեմինարի ընթացքում էլ հնչեցնում էր կրթության կարևորության մասին, մասնավորապես` առաջարկում, որպեսզի ՏԻՄ ընտրությունների մասնակցությանը սահմանվի կրթական ցենզ, ինչը, սակայն, հակասում է տեղական ինքնակառավարման մասին եվրոպական Խարտիային, որը հիմնարար փաստաթուղթ է հանդիսանում նաև Հայաստանի համար ու բացառում է որևէ խտրական մոտեցում: