Ձեր վստահելի աղբյուրը

«Մեր տունը» կրկին աժիոտաժի մեջ է ու եռում է` այստեղ հերթական անգամ պատրաստվում են հարսանիքի: Իր գոյության վեց տարիների ընթացքում հունիսի 22-ին այստեղ կկայանա 11-րդ հարսանիքը, իսկ կազմակերպության նախագահ Տիգրանուհի Կարապետյանն էլ 11-րդ անգամ, փաստորեն, «զոքանչ-մայրիկ» կդառնա:

Ապրիլի 6-ին «Մեր տանը», որտեղ ապրում են 18-23 տարեկան մանկատան աղջիկներ, հերթական հարսանիքն էր` շուքով, հանդիսավորությամբ ամուսնացրեցին Անիին: Ընդ որում ինչպես և կազմակերպության առօրյան, այնպես էլ հարսանիքի մասին թե շատ գրվեց, թե շատ խոսվեց` «Մեր տունը» էջմիածնեցիների ուշադրության կենտրոնում միշտ է եղել: Հարսանիքից մի քանի օր անց Տիգրանուհի Կարապետյանը վերադառնում է կազմակերպություն և նկատում, որ շենքի դիմաց կանաչ գույնի «06» է կանգնած: Տ.Կարապետյանին ճանաչողները կփաստեն` խստությունը այն հիմնական դրույթն է, որ կարող էր անգամ ամրագրված էլ չլիներ կազմակերպության կանոնադրության մեջ, բայց որը գերիշխում է այստեղ.

«Ես էլ դեռ մտածեցի, թե դժվար ինչ-որ բան լինի, գուցե հարևանի մոտ են եկել ու մտա ներս»,- Panorama.am-ին պատմեց տիկին Կարապետյանը:

«Հետաքրքիրն այն է, որ ես երբեք դռան զանգին չեմ մոտենում, աղջիկներն են դուռը բացում, բայց այս անգամ, չգիտես ինչու, հենց ես էլ մոտեցա: Մոտեցա դռանը, «գլազոկով» նայեցի, տեսնեմ` մի հատ սիրուն, մատղաշ տղա, կանգնած ժպտում է… այնպես էլ նման էր «Տղամարդիկ» ֆիլմի հայտնի տեսարանին (ծիծաղում է): Դուռը բացեցի, ասում եմ` «հը՞ն, տղա ջան»: Բարևեց, ու թե` «մի բան հարցնեմ էլի, ես գիտեմ ձեր կարգուկանոնը, որ ես չեմ կարող ներս մտնել, բայց մենակ մի բան եմ ուզում իմանալ, ես ուզում եմ ամուսնանալ ու լուրջ նպատակներ ունեմ: Ձեր աղջիկներին էլ շատ եմ հավանում»: Ասում եմ` քանի՞ տարեկան ես: Բա 22, ասում եմ` Վազգեն ջան, երիտասարդ երեխա ես, ի՞նչ գործդ ա կտրել, որ ամուսնանում ես, այն էլ սենց: Ինքն էլ թե բա` ներս գամ պատմեմ, ասացի` չէ, ներս չես գա: Եթե շատ լուրջ ես, գնա մորդ ու հորդ բեր, որ ես իմանամ, որ ծնողներդ գիտեն, որ եկել ես մեր դուռը: Ինքն էլ` հա, կբերեմ ու գնաց»,- շարունակեց «Մեր տան» նախագահը:

Ամուսնության նպատակով զանգը տված երիտասարդի հետևից դուռը փակելով, Տ.Կարապետյանն անցնում է իր աշխատասենյակ, մինչ այդ զրույցի բռնվելով «Մեր տուն» «Զատիկ» մանկատնից այստեղ մի քանի տարի առաջ տեղափոխված Մարիամի հետ: Վերջինս նեղսրտում է, թե իր վախը մենակությունից այդպես էլ չանցավ ու ինքը շարունակում է կյանքում էլ մենակ մնալ` անկախ նրանից, որ «Жди меня» հաղորդաշարի միջոցով գտել է հարազատ եղբորը.

«Ես էլ հումորով ասեցի` Մարիամ, հեսա քեզ ամուսնացնելու եմ, աչքիս դու պետք է ամուսնանաս»,- պատմեց Տ.Կարապետյանն:

Որոշ ժամանակ անց դռան զանգը նորից տալիս են, ներս են մտնում Վազգենը ծնողների հետ.

«Եկան նստեցին, մայրն ասաց` ինչ անեմ, տիկին Կարապետյան ջան, իմ տղան որ որոշել է այստեղից, ես իր որոշումը հարգում եմ: Պատմեց, որ գնացել է Էջմիածնի ոստիկանություն, «Մեր տան» հասցեն իմացել ու եկել է: Հայրն էլ կողքից, թե` «ոչինչ, որ մանկատան աղջիկ է, մենք չենք նեղվում, որովհետև իմ մայրն էլ Գյումրիի մանկատանն է մեծացել»: Պարզվեց, որ տատիկի առողջությունը վատ է ու Վազգենն էլ որոշել է շուտ ամուսնանալ, որ տատին հարսանիքին ներկա լինի ու հարսին տեսնի…»:

Սակայն ամենահետաքրքիրն առջևում էր: Պարզելով, որ երիտասարդի մտադրությունները լուրջ են, ծնողներն էլ իրենց համաձայնությունը, փաստորեն, տվել են, տիկին Կարապետյանը սկսում է մտորել, թե իր աղջիկներից ո՞վ կարող է Վազգենի երջանկությունը կազմել: Նախևառաջ հարցնում է փեսացուին` ի՞նչն է գնահատում ու ինչպիսի՞ն կուզեր, որ իր ապագա կինը լիներ, բայց մտքում արդեն Մարիամի թեկնածության վրա է սևեռվել.

«Իր նկարագրածից ամեն ինչը համընկավ Մարիամի հետ, բայց նախևառաջ այն, որ Մարիամն էլ ֆուտբոլի մոլի երկրպագու է: Միայն մի խնդիր կար` Մարիամը 24 տարեկան է, ու ես մտածեցի, որ դա կարող է խնդիր լինել … Բայց որոշեցի` «была не была!»: Մարիամս եկավ, սուրճ բերեց … Վազգենը նայեց իրան, նայեց մորը, էլի Մարիամին, մեկ էլ ինձ նայեց ու` աչքով չարեց: Դե ես էլ թեթևակի տարիքի պահով մտմտացի, բայց Վազգենի մայրը շատ հանգիստ ասաց` ոչինչ, որ 25 էլ լինի խնդիր չի: Ու այդպես սկսվեց սիրո պատմություն…»,- պատմեց մեր զրուցակիցը:

Դրանից հետո արդեն ամեն ինչ, ինչպես ավանդական հայկական ամուսնությունների դեպքում է` հանդիպումներ, նվերներ, տղայի տուն գնալ ու ամենակարևորը` ծանոթություն տատիկի հետ, ով է, փաստորեն, երիտասարդների ամուսնության պատճառը հանդիսացավ…

Մեր այցելության պահին Մարիամը «Մեր տան» աշխատակիցների հետ օժիտն էր դասավորում ճամպրուկներում` ամեն մի պարագան, ամեն մի կտորը առանձին փաթեթավորելով, գեղեցիկ ու հավասար շարելով: Օժիտի մեծ մասը կազմող հագուստների և այլ իրերի վրա Paris էր գրված.

«Իմ երազանքն է` Փարիզ գնամ»,- ասաց ամաչկոտ Մարիամը, ով հարցին` երջանի՞կ ես, միայն գլուխը թոթվեց: Իսկ հաշվի առնելով այն, որ մյուս երազանքը` հարսանիքին հյուրընկալել շոումեն Aram MP3-ին կարծես իրականացել է, վստահ ենք, որ մի օր էլ Փարիզի տոմսը ձեռքին Մարիամը անպայման կուղևորվի դեպի սիրո քաղաք:

Տ.Կարապետյանը նշեց, որ Մարիամը հեռու տեղ չի գնում` Շահումյան գյուղ, ինչը ավելի կհեշտացնի իրենց հետագա շփումը, քանզի ոչ մի աղջիկ, որ այս տանից հարցս է գնացել, «Մեր տունը» այլ կերպ, քան հորական, չի անվանում ու առիթ-անառիթ գալիս այցի աղջիկներին ու անձնակազմին:

Նախորդիվ`

«Մեր տնից» սիրելիի տուն. հերթական ուրախությունը մանկատան նախկին սաների կյանքում (լուսանկարներ)