Ձեր վստահելի աղբյուրը

«Ամեն օր ենք մենք ականատես լինում, երբեմն նաև այս դահլիճում, երբ ինքնակայացման ճանապարհ է ընտրվում մարդկային, ստեղծարար, մասնագիտական որակներով իրենցից մի քանի գլուխ բարձր կանգնած մարդկանց անվանարկումը, երբ իրավիճակային, թվացյալ քաղաքական շահը սրբում-տանում է բոլոր սահմանները: Այնպես որ` չպետք է բացառել, որ նմանաոճ գայթակղությունը վաղը կարող է ավելի հեռուն, այս անգամ վտանգավոր տեղ գնալ, և օրենքի նախագիծն անհրաժեշտ է մեզ բոլորիս և ոչ թե կամավորական ազատամարտիկներին` ճիշտ ուղու վրա պահելու մեր արժեհամակարգը», -այսօր Ազգային ժողովում ԵԿՄ վարչության նախագահ, գեներալ Մանվել Գրիգորյանի հեղինակած «Երկրապահ կամավորականների կարգավիճակի մասին» օրենքի նախագիծը խորհրդարանի դատին ներկայացնելիս հայտարարեց օրինագծի համահեղինակ Սամվել Ֆարմանյանը:

Նշենք, որ օրինագիծը, որի հետ միասին ներկայացվել է նաև լրացում «Զինծառայողների և նրանց ընտանիքների սոցիալական պաշտպանվածության երաշխիքների մասին» օրենքում», արժանացել է կառավարության հավանությանը և ԱԺ Պաշտպանության, ներքին գործերի ու ազգային անվտանգության մշտական հանձնաժողովում դրական եզրակացություն է ստացել:

Ֆարմանյանի խոսքով, օրինագծի անվանումը` «Երկրապահ կամավորականների կարգավիճակի մասին» որևէ կապ չունի և չպետք է մտազուգորդվի Երկրապահ կամավորականների միության հետ, թեպետ օրինագծի հիմնական հեղինակներից են ԵԿՄ առանցքային դեմքերը` Մանվել Գրիգորյանը և Սեյրան Սարոյանը:

«Պարզապետ պետք է արձանագրել, որ Երկրապահ կամավորական հասկացությունը լավագույնս է արտահայտում հայրենիքի պաշտպանությանը կամավորական հիմունքներով լծված հայորդիներին», -հավելեց ԱԺ պատգամավորը` հիշեցնելով, որ մայիսի 8-ը Հայաստանում նշում են որպես Երկրապահ կամավորականների օր:

Նրա խոսքով, օրինագծի առաջնային նպատակն է օրենքով սահմանել երկրապահ և երկրապահ կամավորական հասկացությունները, ինչպես նաև այն կարգը, որի համաձայն, համապատասխան մարդկանց պետք է տրվի երկրապահ կամավորականի կարգավիճակ: ֆարմանյանը նաև ընդգծեց, որ օրենքի նախագիծը չի վերաբերում երկրապահ կամավորականների սոցիալական երաշխիքներին:

«Խնդիրն այն է, որ Արցախի գոյամարտին կամավոր կերպով միացած և հայրենիքի պաշտպանությանն անմնացորդ նվիրված մեր բազմաթիվ եղբայրներն ու քույրերը չունեն կարգավիճակ: ՀՀ գործող օրենսդրությամբ որևէ կերպ սահմանված կամ առանձնացված չեն երիտասարդ սերնմդի համար կյանքի ուղենիշ դարձած այնպիսի կարևոր հասկացություններ, ինչպիսին են` երկրապահը, երկրապահ կամավորականը կամ ազատամարտիկը: Այս կատեգորիայի մարդիկ իրենց հայրենասիրությամբ, մտածելակերպով ու անձնազոհությամբ միշտ էլ բացառիկ դեր են ունեցել մեր նորագույն պատմության մեջ», -հայտարարեց Ֆարմանյանը:

Շարունակելով ներկայացնել նախագիծը` ԱԺ պատգամավորն ասաց, որ պետությունն այս օրինագծով առաջին անգամ պետությունը ճանաչում է կամավորականությունը որպես երևույթ, սահմանում այդ հասկացությունը և հատուկ կարգավիճակ տալիս մեր կավաորականներին: «Կրկնում եմ` առաջին անգամ պետությունը, այլ ոչ թե առանձին վերցրած կազմակերպությունները: Պետության կողմից սա բարոյական պարտավորություն է այն հերոս տղաների նկատմամբ, որոնց շնորհիվ Արցախն այժմ ազատ է», -հավելեց Ֆարմանյանը:

Ի դեպ, օրինագծի ներկայացման ժամանակ Ազգային ժողովում է նաև օրինագծի հեղինակ Մանվել Գրիգորյանը: Պատգամավորների մեծ մասը կողմ է նախագծին:

Նախորդիվ`
Օրենսդրական փաթեթի վրա աշխատում եմ արդեն 7-8 ամիս. Գեներալ Մանվելը պատմել է իր հեղինակած օրենքի մասին