Ձեր վստահելի աղբյուրը

«Հայաստան ժամանելուց առաջ կարծում էի, որ սա զուտ բազմաթիվ հուշարձաններով հարուստ մի տարածք է, բայց լինելով այստեղ մի քանի օր` տեսա բարձր մշակույթ, սոցիալական ոլորտներում որոշ առաջընթաց, արդի զարգացումներին համահունչ ընթացք ունեցող մի պետություն, որի մասին Եվրոպայում այդքան էլ տեղյալ չեն», - Հայաստանի մասին առաջին տպավորություններով կիսվեց մեր երկրում 5 օրով որպես զբոսաշրջիկ ժամանած իտալացի լրագրող Լուչիա Կոչչին:

Նրա խոսքով` իրենց երկրում Հայաստանի մասին շատ քիչ են տեղյակ, հիմնականում որպես դարավոր պատմություն ունեցող, առաջինը քրիստոնեությունը պետական կրոն հռչկած մի երկիր, ինչպես նաև մի քանի խոսքով գիտեն Հայոց ցեղասպանության մասին:

Զրույցը տարբեր ոլորտներ ներկայացնող իտալացի մեր հյուրերի հետ բազմաբովանդակ էր, յուրաքանչյուրը կիսվեց իրեն մոտիկ ոլորտից ստացած տպավորություններով:

«Գալով Հայաստան, ես տեսա մի ուրիշ երկիր: Ինձ ցնցեց ձեր առողջապահական ոլորտը, հասարակության համախմբվածությունն ու փոխօգնությունը: Իմ համար անակնկալ էր, որ ձեզ մոտ յուրաքանչյուր համայնքում կան բուժկետեր: Երբ ես հետաքրքրվեցի, թե ինչ կլինի աղքատ մի մարդու հետ, եթե նա սրտի կատված ստանա, ինձ ասեցին, որ նրան կտրամադրվի առաջին բուժօգնություն, այն էլ` անվճար: Մեզ մոտ հաճախ նման մարդիկ մահանում են առանց որևէ օգնության», - ասաց մասնագիտությամբ բժիշկ Մանուելա Պոլվերարին:

Անդո Լիպիին հետաքրքրեց Հայաստանում արհեստակցական միությունների վիճակը: «Ցավոք, որքան ես հասկացա, ձեզ մոտ արհմիություններն այնքան էլ չեն զբաղվում աշխատողների շահերի պաշտպանությամբ: Միգուցե դա որպես սովետական ժառանգության ընկալկման արդյու՞նքն է: Մեզ մոտ ամբողջությամբ այլ է. արհմիությունները մշտապես պահանջատեր են` համապատասխան օրենսդրության, իրավունքների պաշտպանության տեսանկյունից», - ասաց նա:

Իր հերթին ֆինանսիստ Ալեսիո Պիզեչիին հետաքրքրեց, թե որքանով է Հայաստանում ազատականացված շուկան: «Փաստացի, ձեր տնտեսությունը, իրոք, բավական ազատականացված է, թեև , որքան հասկացա, այստեղ կան մոնոպոլիաներ, օլիգարխներ: Դրականն այն է, որ դրանք նման չեն ռուսական օլիգարխների: Բացի այդ, անակնկալ էր իմանալ, որ ձեր ազգային արժույթը ազատականացված է: Նույնիսկ մեր երկրում երբեմն կենտրոնական բանկը պրոտեկցիա է անում», - ասաց նա:

Գրող Պաոլո Տոնինան իր զարմանքը հայտնեց, իմանալով, որ Հայաստանի ամբողջ բնակչությունը տառաճանաչ է, մեծագույն մասը ունի միջնակարգ կրթություն, զգալի մասը` նաև բարձրագույն: «Տեսնելով իրարից այդքան հեռու գտնվող գյուղերը, ես կարծում էի, որ ձեր երկրում տեղում կրթական հաստատություններ չկան, բայց սխալ եղավ ոչ միայն այդ կարծիքը: Հաճելի անակնկալ էր, որ միջնակարգ կրթությունը ձեզ մոտ գրեթե ամբողջությամբ անվճար է», - ասաց նա:

Իտալացի զբոսաշրջիկների հետ հանդիպման ժամանակ վերջիններս նույնպես ուղղեցին փոխադարձ հարցեր: Նրանց հետաքրքրում էր, թե որքանով և ինչպես է Հայաստանի վրա ազդել խորհրդայնացումը, որոնք են հայկական օլիգարխիայի ձևավորման պատճառները, ինչով է պայմանավորված տնտեսական աճն այն դեպքում, որ մեր երկիրը գտնվում է շրջափակման պայմամներում, թե որքան է կենսաթոշակը և ինչպես են ապրում մեր թոշակառուները: Նրանք խոստովանեցին, որ Իտալիայում շատ քիչ գիտեն մեր երկրի մասին, և նրանց այս այցելությունը Հայաստանի բացահայտումն էր:

Նշեմ, որ հանդիպումը տեղի էր ունեցել Դիլիջանի հյուրանոցներից մեկում: Իտալացիները գոհ էին նաև մեր հուրանոցային սպասարկումից, բայց դժգոհ` ճանապարհներից: