Ձեր վստահելի աղբյուրը

Դսեղում կա 7-րդ դարի մի հուշակոթող, որը տեղակայված է Մամիկոնյանների գերեզմանի վրա: Եվ ահա հենց այս հուշակոթողը նախօրեին տհաճ մի միջադեպի առիթ հանդիսացավ` Մշակույթի նախարար Հասմիկ Պողոսյանը և Դսեղի գյուղապետ պարոն Քոչարյանը, մինչ սպասում էին վարչապետի ժամանմանը, վիճեցին ու գործը նույնիսկ վիրավորանքների հասավ:

«Դուք ինձ հիմա ապացուցում եք, որ կարելի է գալ, մոտենալ այդ քարը հենց-ընենց ուղղել…. Նամակում ասված է, նամակն էլ գրված է ըստ կարգի»,- դիմելով բորբոքված գյուղապետին, ում ձեռքին իր իսկ կողմից գրված նամակն էլ, հայտարարեց Հասմիկ Պողոսյանը:
Նշենք, որ մինչ այդ երկխոսությունը ընթանում էր նրանց երկուսի միջև ու ցածր տոնայնությամբ, այդ իսկ պատճառով բառացի չենք կարող մեջբերել դրա բովանդակությունը, բայց իմաստը նա էր, որ հուշակոթողի վերականգնման և առհասարակ` պատմական ժառանգությանը տեր կանգնելու նպատակով գյուղապետը բազմիցս դիմել է Մշակույթի նախարարությանը, սակայն այնտեղից բացի ինչ-որ «խելոք» նամակներից բան չի ստացել: Ու հիմա էլ տարեց գյուղապետը վերջին նամակը ձեռքին փորձում էր պատասխան ստանալ նախարարից` արդյոք սա՞ է ճիշտը, երբ խոսքը պատմական ժառանգությունը փրկելուն է վերաբերվում:

«Ես նման կարգից եթե էսքան տարի չեմ հասկացել, հիմա էլ չեմ հասկանա»,- արձագանքեց գյուղապետը, ինչին ի պատասխան Մշակույթի նախարարը արձագանքեց` «դե հիմա: Սա է օրենքը»:

«Չեմ էլ ուզում հասկանամ: Եթե նրանք ասում են գյուղը թող, արի Երևան հասի, բեր թուղթ ճարի, բեր ինձ հետ էլ համաձայնեցրու…. Հլա տեսեք` ո՞ւր ենք հասել, ուր ենք գնում, Աստված իմ…»,- գլուխը բռնելով ու քթի տակ նաև որոշակի արտահայտություններ անելով «մարտի դաշտից» փոքր-ինչ հեռացավ պարոն Քոչարյանը: Հասմիկ Պողոսյանն էլ, որ այդ ողջ ընթացքում նստած տեղից վեր չկացավ, ասաց, թե ինքը զարմանում է գյուղապետի դաստիարակության վրա.
«Սա էլ Թումանյանի ոգով դաստիարակված… ես այլևս ինձ թույլ չեմ տա ձեզ ինչ-որ խոսք ասել, վերջ»,- հայտարարեց նախարարը:

Գյուղապետը ավելի բորբոքվեց. «Այն, ինչ ես եմ արել այս գյուղի համար, ոչ ոք չի արել: Բայց արեք դուք էլ ձեր պարտականությունը կատարեք…»: Այստեղ վրա հասավ Թումանյանի անվան տուն-թանգարանի աշխատակիցը և փորձեց հանդարտեցնել գյուղապետին` «նախարարը գնալու ա հեսա, ներվերդ ափսոս ա, մի ջղայնացի….»:

Իսկ Մշակույթի նախարարը այդպես էլ ոչ մի բառ այլևս չարտաբերեց ու հասկանալի էլ չէր, թե ինչ է մտածում քանդման ճակատագրին արժանացած հուշակոթողի մասին….

Վիճաբանությունից հետո գյուղապետը Panorama.am-ին պատմեց, որ հուշակոթողը խայտառակ վիճակում է գտնվում, գրեթե շրջվում է, տակի պատվանդանը քանդվել է և առանցքից թեքվել է 18 սմ-ով, բայց ուր դիմել է, ոչ մի աջակցություն չի ստացել. «Ուր դիմել եմ` չեն աջակցել: Դրա համար էլ ես այսօր բորբոքված դիմեցի տիկին նախարարին, որը որ շատ ցավով ընդունեց… Բայց ես չեմ զղջում, ամեն մարդ, ինչ դիրքի ու պաշտոնի էլ լինի, պետք է իր պարտականությունը մեր ժողովրդի, հասարակության առաջ կատարի»,-վիճաբանությունից հետո դեռ լիովին չհանգստացած պատմեց պարոն Քոչարյանը:

Այն հարցին, բա ինչ է անելու սրանից հետո, գյուղապետը նշեց. «Չգիտեմ… տեսաք պատասխանը: Բա կարելի ա ասել` գյուղապետ, դու վեր կաց, արի հասի Երևան, նախագիծ անել տուր, բեր իմ դռանն էլ չոքի, իմ հետ համաձայնեցրու, նոր գնա ինչ ուզում ես արա, մենակ ես տեղիցս վեր չկենամ…. Հետո ասում են, որ զայրանումեմ, բա ո՞նց չզայրանամ: Նման մարդիկ պիտի չաշխատեն, նոր մարդիկ պետք է լինեն` հոգով, կապված ժողովրդի, երկրի, իր հայրենիքի հետ և պետության հետ»,- եզրափակեց նա: