Ձեր վստահելի աղբյուրը

Տնտեսագետ Վագահն Խաչատրյանի համար նորություն չեն «Հայռուսգազարդ» ընկերության կառավարությանը պատկանող 20 տոկոս բաժնեմասը «Գազպրոմ» ընկերությանը հանձնելու մասին տեղեկությունները: Panorama.am-ի հետ զրույցում տնտեսագետը համոզմունք հայտնեց, որ խնդրի շուրջ ընկերության ու Հայաստանի կառավարության միջև բանակցությունները սկսել են դեռ անցած տարվա հոկտեմբեր-նոյեմբեր ամիսներից, իսկ հայրենի կառավարությունը դա թաքցրել է:
«Սա հերթական խաբեությունն է»,-ասաց նա:

Ավելին, Խաչատրյանը համոզված է, որ ռուսական կողմի հետ բանակցություններում սա սեղանին դրված միակ հարցն է:
Հիշեցնենք, որ էներգետիկայի նախարար Արմեն Մովսիսյանը լրագրողների հետ զրույցում նշել էր, որ դա բանակցությունների սեղանին դրված միակ հարցը չէ, քննարկվում են այլ տարբերակներ ևս:

«Ոչ մի ուրիշ հարց չկա, դուք այսքանից հետո հավատո՞ւմ եք»,-ասաց նա:

Խոսելով գործարքի կայանալու դեպքում հնարավոր հետևանքների մասին, Վ. Խաչատրյանը նշեց, որ ՀՀ կառավարությունը կզրկվի որոշումներ կայացնելու գործընթացին մասնակցելու հնարավորությունից, բացի այդ զրկվում է այլընտրանքային էներգիա ունենալու հնարավորությունից:

«Սա կարելի է որակել հնարավորություններից զրկում»,-նման գնահատական տվեց նա:

Տնտեսագետը ցավում է, որ կառավարությունն իր բաժնեմասը վաճառում է հենց ռուսական ընկերությանը, գոնե կարելի էր վաճառել ասենք իրանական ընկերության, «եթե կարող էին…»:

«Եվ այս ամենի գինը ընտրություններն են: Ինչպես գազի գնի բարձրացման համար նախապես գիտեինք, բայց դրա մասին բարձրաձայնվեց Երևանի ավագանու ընտրություններից անմիջապես հետո: Որևէ ակնկալիք չունենաք, որ Հայաստանի գործող իշխանությունն իր գործունեության ընթացքում այնպիսի քայլեր կանի, որից պետությունը, առավել ևս քաղաքացին կշահեն»,-կարծիք հայտնեց ընդդիմադիր քաղաքական ուժին հարող տնտեսագետ գործիչը:

Խաչատրյանը մտավախություն ունի, որ կառավարությունը հաջորդ քայլով արդեն Որոտանի ՀԷԿ-ը կվաճառի ռուսներին, ասում է, վաղուց լսել է նման խոսակցություններ:
«Այնպես որ դա է վաճառվելու ու վերջ, 100 տոկոս էներգետիկան կլինի ռուսական: Հաջորդ քայլով արդեն հիմնը կփոխեն, դրոշակը, պետական լեզուն կփոխեն, իրական վիճակն է այդպես, կներեք երևի լուրջ չեք ընդունում: Հարցն այն է, որ պետականություն ենք կորցնում»,-հնարավոր վաճառքի հետևանքները մատնանշեց նա:

Նշենք, որ ավելի վաղ` հունիսի 17-ին ռուսական կողմը հայտարարել էր,  որ «Գազպրոմ» ընկերության վարչության նախագահ Ալեքսեյ Միլլերը և Հայաստանի Հանրապետության էներգետիկայի և բնական պաշարների նախարար Արմեն Մովսիսյանը Մոսկվայում քննարկել են «Գազպրոմ»-ի մասնաբաժինը «ՀայՌուսգազարդ» ընկերությունում ավելացնելու մասին՝ 80%-ից հասցնելով 100%-ի։ 20%-ը պատկանում է Հայաստանի կառավարությանը։

Նախորդիվ` Վահագն Խաչատրյան. Գազասպառողների թիվը կնվազի 35-40 տոկոսով

Վ. Խաչատրյան. Այսօր «Գազպրոմը» չի կարողանում մրցակցել աշխարհում

Վ. Խաչատրյան. Ներկայացումներին արդեն ծանոթ ենք, կոմեդիա չկա, արդեն տրագեդիա է