Ձեր վստահելի աղբյուրը

Պահպանակների և սեռական անվտանգության այլ միջոցների թանկացումը կարող է անդրադառնալ ազգաբնակչության շրջանում ոչ միայն սեռավարակների, այլ նաև ՄԻԱՎ/ՁԻԱՀ տարածման ռիսկայնության վրա: Նման գնահատական են տալիս սեքսապաթոլոգները և սեռական պաշտպանության մասնագետները, միաժամանակ նշելով, որ պետք է հետևել առողջ ապրելակերպին և զերծ մնալ  ռիսկայնությունից:

«Սեքսուալ Առողջության Պաշտպանության» ՀԿ նախագահ, բ.գ. դոկտոր, սեքսոպաթոլոգ Արամ Հակոբյանը նշեց, որ առողջության պահպանության համար շատ կարևոր է, թե որքան արժեն պահպանակները, սեռական անվտանգության այլ միջոցները, սակայն խնդիրը միայն դրանց մեջ չէ:

«Ցանկալի կլիներ, որ այդ միջոցներն ազգաբնակչության համար լինեին հասանելի, չեմ ասում` անվճար տրամադրվեն: Սեռավարակների և այլ հիվանդությունների տարածվածության ռիսկայնությունը, բնականաբար ցածր կլինի, եթե ավելի հասանելի լինեն այդ միջոցները: Իսկ թանկացման պայմաններում խորհուրդ կտամ խուսափել տարաբնույթ ոչ կանոնավորված սեռական կապերից», - ասաց սեքսապաթոլոգը:

Նրա խոսքով` անկախ պաշտպանիչ միջոցների առկայության և հասանելիությանը, հանրությունը, մանավանդ երիտասարդները պետք է ունենան համապատասխան գիտելիքներ` սեքսուալ առողջության պաշտպանության վերաբերյալ: «Պետք է կատարվի համապատասխան լուսավորչական աշխատանք, որի ընթացքում  շեշտվի, որ կանոնավոր սեռական հարաբերությունները, մշտական զուգընկեր ունենալը կնվազեցնի սեռավարակներով հիվանդանալու ռիսկայնությունը: Ճիշտ է, պահպանակները, կանխարգելիչ այլ միջոցները նվազեցնում են այդ ռիսկերը, բայց նման դեպքում հարկավոր է ավելի գրագետ մոտեցում սեռական կյանքին», - ասաց Արամ Հակոբյանը:

 Նրա խոսքով` անթույլատրելի է մտածել, թե սեռավարակները և ՄԻԱՎ-ՁԻԱՀ-ի տարածումը կարող է կապված լինել միայն արտասահմանցիների հետ սեռական որևէ հարաբերությունների հետ: «Այսպիսի ռիսկ կա ընդհանրապես` ցանկացած անծանոթ մարդկանց հետ անկանոն սեռական հարաբերությունների պարագայում», - շեշտեց նա:

Իր հերթին մաշկաբան, սեռավարակաբան Կարեն Վարդանյանը կարծիք հայտնեց, որ նման թանկացման բացասական հետևանքը կարող է չնչին լինել: «Թանկացումը սեռավարակների տարածվածության վրա այնքան չի ազդելու: Որպես օրինակ` եթե մարդը ուզում է բուժվի, դրա գումարը կգտնի, իսկ ով չի ուզում ` չի գնի: Այսինքն` ճիշտ համեմատական կապ երկու երևույթների միջև գտնել դժվարանում եմ», - ասաց նա: Ըստ բանախոսի` երիտասարդների շատ չնչին տոկոսը կնախընտրի պահպանել գումարը` առողջության ապահովման հաշվին:

 Նշենք, որ  2013 թվականի 6 ամիսների ընթացքում Երևանի դեղատներում նկատվել է պահպանակների, հակաբեղմնավորիչ և սեռական անվտանգության համար այլ միջոցների գնի աճ ` մինչև 50 տոկոս: Դեղատներում նման գնաճը պարզաբանում են դեղորայքի ընդհանուր թանկացմամբ: