Ձեր վստահելի աղբյուրը

Ազգային ժողովի պատգամավոր Վարդան Այվազյանը անմիջապես ուղղում է, երբ նրան անվանում են գործարար պատգամավոր. «Ես գործարար չեմ, ես պատգամավոր եմ»: Panorama.am-ի թղթակցի հարցին, թե հանքեր չունի՞ բնապահպանության նախկին նախարար ներկայիս պատգամավորը, Վարդան Այվազյանը պատասխանել է. «Ես ձեզ ասել եմ, ես ընդամենը գումարած-հանած, իմ մտածողությամբ, իմ ընտանիքի անդամներից ոմանք գտնվում են միայն մեկ գործաrույթի շրջանակներում, որը վերաբերում ա Հայաստանի Հանրապետությունում սև մետաղների արտադրությանը: Այ, էլ ոչ մի բան չունեմ»:

Մյուս հարցին, թե քիչ առաջ պատգամավորը պնդում էր, թե բիզնես չունի, Այվազյանը պատասխանել է. «Ե՞ս: Ասում եմ ընտանիքիս անդամները, տղես 26 տարեկան տղա է, 21 տարեկանից գործարանի փոխտնօրեն է աշխատում, ավարտել է տնտեսագիտականը, աղջիկս էլ ավարտել է նախնականը այստեղ, հետո էլ մրցույթով շահած գումարով ավարտել է Լոնդոնի Վեսթմինիստրի անվան համալսարանում, մաստեր կլասի կոչում ունի, երկուսն էլ չեն աշխատում պետական համակարգում»:

Ներկայացնելով որդու բիզնեսը, Այվազյանն ասաց, որ «հանքավայրի հետ կապված աշխատանք է տանում, որ մարդիկ կարողանան մեր երկրում սև մետաղ արտադրեն»: «Կա՞ մեկն ու մեկը, որ ըտենց ռիսկ կվերցնի: Հայաստանում կա ըտենց մոտավորապես 30 հանքավայր, կա՞ մեկնումեկը, որ ըտենց ռիսկ կանի», -հարցադրումներ արեց Այվազյանը:

Նրա ներկայացմամբ, Հայաստանում մետաղական հանքավայրերի և երևակումների թիվը շուրջ 90-նն են, սակայն աշխատում է 3-4 հարստացուցիչ ֆաբրիկա: Մեր դիտարկմանը, թե այդ 4-ից մեկը իր որդունն է, Վարդան Այվազյանն ասաց, որ ամբողջությամբ դեռ չէ. «Հըլը ոչ մի բան արած չի, հըլը մենակ փող ծախսելու տեղ ա, հըլը փող վերցնելու տեղ չկա»:

-Շահույթ չե՞ք ստանում: 
-Հըլը պտի շահագործում սկսենք, որ շահույթ ստանանք:

-Նո՞ր պետք է սկսեք բիզնեսը:
-Հըլը չենք սկսել, հըլը շարունակում ենք, հըլը փող ենք դնում, ծախսում ենք, ուսումնասիրում ենք:

-Ինչքա՞ն ներդրում եք արել մինչև հիմա:
-Ես չեմ ներդրում արել: Չինական կողմն ա ներդրում անում: Գնացել, համոզել եմ, որ չինացիք ներդրում անեն էս երկրում: Վա՞տ եմ արել: Կա՞ մեկնումեկը, որ էդքան բիզնես համարձակություն ունենա, գա մտնի Այվազյան Վարդանի վերագրած հանքավայրում կատարված ծախսերի 1/5-րդ մասով հավասար փայաբաժին դառնա Այվազյանի հետ:

-Ինչպե՞ս է Ձեզ հաջողվել համոզել չինացիներին:
-Քանի որ մենք հնդեվրոպական ենք, չինական հետաքրքրությունները...հասկանում ես..էդ որ Հնդկաստանից գալիս էին մերոնց հետ չինացիք խոսեցին:

«Կարմիր դիպլոմով գռուզչիկի» մասին լուրջ էի՞ք ասում:
-Իմ կենսագրությունը վերցրեք, նայեք:

-Չեք թաքցնում:
Ինչի՞ պիտի թաքցնեմ: Ի՞նչ ա գռուզչիկ աշխատելը վատ բան ա՞: Ես ինստիտուտը պարտիական եղած ժամանակ կարմիր դիպլոմով եմ ավարտել, գիտական մինիմումները չորրորդ կուրսում հանձնած: Աշխատել եմ Հրազդանի կաթի գործարանի պանրի պահեստում «գռուզչիկ». այդտեղից եմ սկսել իմ աշխատանքային առաջին գործունեությունը, հետո դարձել եմ վարպետ, հետո՝ արտադրամասի պետ, հետո՝ գլխավոր ինժեներ, հետո՝ այլ գործարանի տնօրեն, հետո՝ քաղսովետի նախագահ, հետո ընտրվել եմ քաղաքապետ, հետո ընտրվել եմ ԱԺ դեպուտատ:

Նախորդող հրապարակում. «Ես կարմիր դիպլոմով գրուզչիկ եմ աշխատել». Մանուկյանի ու Այվազյանի միջև ԱԺ-ում վեճ է տեղի ունեցել (տեսանյութ)