Ձեր վստահելի աղբյուրը

Ի՞նչ կաներ ԱԺ պատգամավոր Վարդան Այվազյանը, եթե Տիգրան Սարգսյանի տեղը լիներ և տեղեկանար մամուլից, որ իր անունով օֆշորային գոտում ընկերություն է բացվել. փաստորեն կաներ նույնը, ինչ արեց վարչապետը՝ կհայտարարեր, որ սուտ է, նման բան չկա ու կդիմեր իրավապահ մարմիններին՝ բացահայտելու ապօրինությունը: «Ես կհայտարարեի՝ սիրելիներս, այս մարդը խաղացել է իմ անվան հետ: Ինչը որ պետք է արել է էդ մարդը», -ասում է խորհրդարանական մեծամասնության ներկայացուցիչը:

Պատգամավորը ոչ մի վատ բան չի տեսնում, որ Նավասարդ արքեպիսկոպոս Կճոյանը կամ Տիգրան Սարգսյանը օֆշորային գոտում ընկերություն բացեն. «Եթե արած էլ լինեն, ի՞նչ»:

Դիտարկմանը, թե դրա հետևանքով սնանկացման է հասել գործարար Փայլակ Հայրապետյանը, Վարդան Այվազյանը համաձայն չէ. «Ես չէի ասի, թե սնանկացրել են, ես նման գանահատակն չէի տա: Ես այսքան ժամանակ չեմ տեսել, որ որևէ մեկը իմ հաշվի վրա հենց այնպես գումար փոխանցի: Բիզնեսը ռիսկ է: Ես չգիտեմ, թե էդ մարդը (նկատի ունի Փայլակ Հայրապետյանին-հեղ.) իր գործունեության, իր բիզնեսի, ֆինանսատնտեսական ճգնաժամի, ինչ-ինչ հանգամանքների բերումով է սնանկացել, թե կոնկրետ այս երկու մարդը սնանկացրել են: Թող այդ մարդը գնա-մտնի դատարան ու ասի՝ գիտեք ինչ կա, ինձ միտումնավոր սնանկացրել են»:

ԱԺ պատգամավոր Վարդան Այվազյանը հնարավոր է համարում այն, որ ինչ-որ մեկը ցանկացել է «վարչապետի հեղինակության հետ խաղալ»: «Եթե այդ օֆշորային հասցեում իմ անձրագրային տվյալներով գրանցում եք անում, կարող եք անել, անգամ ՀՀ բանկերին գնացեք հարցրեք` այդ մարդը առանց իրա ստորագրության, առանց ներկա լինելու կարող ես հաշիվ բացել: Եթե դուք հանկարծ կասկած կունենաք, հինգ րոպեից հետո ես կզանգեմ, կասեմ` այսինչ մարդու անունով հաշվեհամար բացեք, կտեսնեք: Բայց երբ որ գումար է փոխանցվելու այդ հաշվեհամարին, պետք է կամ դա իրականացնի լիազոր մարմնի ներկայացուցչի կողմից, կամ այդ անձի»,- մեխանիզմն է բացատրում պատգամավորը:

Նշենք, որ օֆշորային սկանդալի վերաբերյալ հայտնի դարձավ այն ժամանակ, երբ «Հետք»-ը գրեց, որ Կիպրոսում գրանցված «WLISPERA HOLDINGS LIMITED» օֆշորային ընկերության բաժնետերերն են ՀՀ վարչապետ Տիգրան
Սարգսյանը, Արարատյան թեմի առաջնորդ Նավասարդ արքեպիսկոպոս Կճոյանը և «ադամանդագործ» գործարար Աշոտ Սուքիասյանը: Այդ ընկերությունը ըստ լրատվամիջոցի, ուղղակի առնչություն ունի գործարար Փայլակ Հայրապետյանի ունեզրկման հետ: Այնուհետև վարչապետ Սարգսյանը դիմեց գլխավոր դատախազություն՝ բացահայտելու կատարվածը և Ազգային ժողովում բացատրեց, որ օֆշորային գոտում ցանկացածը կարող է ցանկացածի անունով ընկերություն բացել:

Նա նաև հայտարարեց, որ օֆշորային գոտում իր կողմից ընկերություն բացելու մասին այդ տեղեկությունը իրականությանը չի համապատասխանում: Այս աղմուկից հետո ոստիկանությունը հայտարարեց, որ Աշոտ Սուքիասյանի նկատմամբ խոշոր չափի խարդախության մեղադրանք է առաջադրվել և հայտարարել հետախուզում: Եվ միայն դրանից հետո Աշոտ Սուքիասյանը նամակ գրեց, որ Տիգրան Սարգսյանն ու Նավասարդ Կճոյանը տեղյակ չեն եղել, որ իրենց անունով ընկերություն է գրանցել օֆշորում, և որ ինքն այդ անուններն օգտագործել է իրեն ապահով զգալու համար: