Ի՞նչ է կատարվում «Կիլիկիա» առևտրի կենտրոնի շուրջ. «Դատարանի նկատմամբ ճնշումներ գործադրելու անհաջող փորձեր են կատարում»
«Կիլիկա» առևտրի կենտրոնի շուրջ առաջացած խնդրին Panorama.am-ն անդրադարձել էր օրեր առաջ: Կենտրոնում տաղավարներ վարձակալած մարդկանց ապրանքի վրա արգելանք է դրվել, մարդիկ չեն կարողանում պարտքով ձեռք բերած հագուստեղենն ու կոշկեղենը վաճառել: Իսկ պատճառը առևտրի կենտրոնի սեփականտեր հանդիսացող «ԼԱՆ» ընկերության ու ՊԵԿ-ի միջև առաջացած խնդիրներն են:
Ինչպես նշել են անհատ ձեռներեցները Վճռաբեկ դատարանի նախագահ Արմեն Մկրտումյանին ուղղված նամակում, Երևանի Կենտրոնի դատարանի նախագահ Ռուբեն Վարդազարյանի ինչ-որ գրության հիման վրա ՊԵԿ քննչական վարչությունում նյութեր են նախապատրաստել և 01.06.2013թ. նշված վարչության ողջ անձնակազմն ու օպերատիվ վարչության աշխատակիցները զննության պատրվակով մտել են տոնավաճառի տարածք և սկսել են կնքել տաղավարները:
ՊԵԿ մամուլի ծառայությունից ավելի վաղ Panorama.am-ին հայտնել էին, որ ՊԵԿ քննչական վարչությունում նյութերը սկսել են նախապատրաստել ՊԵԿ Օպերատիվ հետախուզության վարչությունից ստացված հաղորդման հիման վրա:
Դատական դեպարտամենտի տեղեկատվական կենտրոնի ղեկավար Արսեն Բաբայանը Panorama.am-ին հայտնեց, որ թիվ ԵԿԴ/0079/04/09 սնանկության գործով պարտապան «ԼԱՆ» ՍՊԸ-ի կողմից մամուլի միջոցներին տրամադրած տեղեկություններում տեղ են գտել բազմաթիվ տեղեկություններ, որոնք իրականության հետ չունեն որևէ առնչություն:
«Մասնավորապես, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի նախագահ Ռուբեն Վարդազարյանը որևէ առնչություն չունի վերոհիշյալ գործի հետ: Յուրաքանչյուր անձ «Դատալեքս» տեղեկատվական համակարգում որոնելով թիվ ԵԿԴ/0079/04/09 սնանկության գործը կհամոզվի, որ հիշյալ քաղաքացիական գործը գտնվում է այլ դատավորի վարույթում: Փաստորեն, դատարանի նախագահ Ռուբեն Վարդազարյանի դեմ ներկայացված տեղեկությունները մտացածին են: Լավագույն դեպքում, այդ կեղծ տեղեկություններ հրապարակողն այնքան անտեղյակ է գործի ընթացքից, որ անգամ չգիտե, թե որ դատավորի վարույթում է գտնվել թիվ ԵԿԴ/0079/04/09 սնանկության գործը»,-ասաց Ա. Բաբայանը, ավելացնելով, որ վատագույն դեպքում, առևտրային կենտրոնի աշխատակիցները դարձել են իրավաբան «հմուտ» խորհրդատուների արկածախնդիր մեքենայությունների զոհ:
Նրա խոսքով, եթե այդպես է, ապա նշանակում է, որ այդ խորհրդատուները դատարանի նկատմամբ ճնշումներ գործադրելու անհաջող փորձեր են կատարում և այնքան են կուրացել իրենց ապօրինի ցանկություններում, որ անհաջող փորձերն ուղղում են անգամ դատարանի նախագահ Ռուբեն Վարդազարյանի կողմ:
«Գաղտնիք չէ, որ նման փորձերը մշտապես դատապարտված են անհաջողության»,-ասաց Ա. Բաբայանը:
Հիշեցնենք, որ հարկային մարմնի, դատարանի ու «ԼԱՆ» ՍՊԸ-ի-ի միջև առկա խնդիրներից տուժած ձեռներեցները նամակ էին հղել Վճռաբեկ դատարանի նախագահ Արման Մկրտումյանին, որտեղ քաղաքացիները խնդիրը ներկայացնելուց հետո նաև պահանջ են ձևակերպում.
«Մենք պահանջում ենք, որպեսզի թողեն մենք մեր երկրում աշխատենք, հակառակ դեպքում, թող մեզ համար տոմս առնեն, մենք թողնենք անվերադարձ գնանք: Մենք այժմ գնալու հնարավորություն էլ չունենք»:
Անդրադառնալով այս նամակին Դատական դեպարտամնետի տեղեկատվական կենտրոնի ղեկավար Արսեն Բաբայանը նշեց, որ Դատական օրենսգրքի 11-րդ հոդվածի համաձայն արդարադատություն և օրենքով նախատեսված այլ լիազորություններ իրականացնելիս դատավորն անկախ է, հաշվետու չէ որևէ մեկին, այդ թվում՝ պարտավոր չէ որևէ բացատրություն տալ, բացառությամբ օրենքով նախատեսված դեպքերի:
«Ավելին, դատավորի գործունեությանը օրենքով չնախատեսված յուրաքանչյուրի, այդ թվում՝ Վճռաբեկ դատարանի նախագահի միջամտությունն արգելվում է: Ասվածից պարզ է դառնում, որ Վճռաբեկ դատարանի նախագահը չի կարող միջամտել դատական գործերին այլ կերպ, քան նախատեսված է օրենսդրությամբ: Իսկ օրենսդրությամբ նախատեսված է դատական ակտերի բողոքարկման հստակ կանոններ, առանց որոնց պահպանման յուրաքանչյուր նամակագրություն, որը դուրս է օրենսդրությամբ սահմանված դատավարական կանոններից, չի կարող առաջացնել իրավական հետևանք»,-ասաց Ա. Բաբայանը:
Հետաքրքրվեցինք, թե ինչ հիմքով է դատարանը մերժել ընկերության կողմից ներկայացրած առողջացման ծրագիրը: Բաբայանն ասաց, որ հարցին պատասխան կտրվի ավելի ուշ:
«Ինչ վերաբերում է առողջացման գործընթացին և մյուս հարցերին, ապա դրանք դեռևս գտնվում են դատաքննության փուլում, որոնց պատասխանները կտրվեն վերջնական դատական ակտով»,-ասաց Ա. Բաբայանը:
Նախորդող հրապարակում`
Ի՞նչ է կատարվում «Կիլիկիա» առևտրի կենտրոնի շուրջ. Անհատ ձեռներեցները շարունակում են բողոքել
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
