Ձեր վստահելի աղբյուրը

Բնական կեցվածքի խաթարում, ողնաշարի խնդիրներ, հոդացավ, երակների լայնացում, գլխացավ. սրանք այն խնդիրներն են, որոնք ի հայտ են գալիս, երբ դառնում ենք նորաձևության «զոհերը» կամ էլ ընտրում ենք այնպիսի կոշիկներ, որոնք չեն համապատասխանում որակական չափանիշներին:

Կանանց և աղջիկների մեծամասնությունը կրում է բարձրակրունկ կոշիկներ, շատ հաճախ դա անելով իրենց առողջության, հարմարավետության հաշվին: Ուստի, վերջին տարիներին մասնագետներն ավելի ու ավելի հաճախ են հորդորում` գնել այնպիսի կոշիկներ, որոնք հարմարավետ են և մարդու առողջության համար վտանգ չեն ներկայացնում: Նմանատիպ խնդիրներից զերծ մնալու համար մասնագետները խորհուրդ են տալիս հագնել հարմարավետ կոշիկներ, իսկ տափակ և բարձրակրունկ կոշիկները հագնել միայն անհրաժեշտության դեպքում:

«Անորակ կոշիկներն առաջին հերթին առաջացնում են հարթաթաթություն: Թեև այս հիվանդությունը լինում է ժառանգական, սակայն լինում է ձեռքբերովի՝ հիմնականում անորակ կոշիկների օգտագործումից: Հարթաթաթության հետևանքով առաջանում են թաթի հիվանդություններ, օրինակ` կոշտուկներ, կրունկի ճաքեր, մատների ծռում, նևրոզ, զարգանում են աթրոզները, գրիժաները: Բացի այդ, հարթաթաթության զարգացման հետ ցավեր են առաջանում նաև ազդրի և մեջքի շրջանում»,- Panorama.am-ի թղթակցի հետ զրույցում ասաց «Երևան» բժշկական կենտրոնի վնասվածքաբան-օրթոպեդ Աշոտ Ադամյանը:

Վնասվածքաբանը նշեց, որ խորհրդային տարիներին գործարանային արտադրության կոշիկները համապատասխանել են բոլոր պահանջներին, մինչդեռ այսօր լուրջ խնդրի առաջ ենք կանգնած. թե տեղական արտադրության, թե ներկրված կոշիկները անորակ են և չեն համապատասխանում անհրաժեշտ կանոններին: «Կոշիկի կրնկամասը պետք է ամուր լինի, որպեսզի չհարի ու չսեղմի կոճերը, ինչպես նաև՝ չճնշի կրունկը: Խորհուրդ է տրվում նաև կոշիկի մեջ օգտագործել հատուկ միջադիր-սուպինատորներ»,- ընդգծեց Աշոտ Ադամյանը:

Նրա խոսքերով` սխալ կոշիկներ հագնելու դեպքում առաջանում է ոտքի առաջին մասի դեֆորմացիա, որը շատ հաճախ ասում են` ոտքի բութ մատի «կոճ». դա մի հիվանդություն է, որը առաջանում է ոտնաթաթի լայնակի իջեցման հետևանքով: «Այդ հիվանդությունը կոչվում է Hallux valgus»,- նշեց բժիշկը: (Hallux-ը ոտնաթաթի բթամատի լատիներեն անվանումն է: Valgus նշանակում է ձևափոխություն, դուրսպրծում):

Բացի այդ, եթե կոշիկի կրունկը 5 սմ-ից բարձր է լինում, խախտվում են նաև ծնկային, հետագայում նաև՝ կոնքազդրային հոդերը, ինչպես նաև առաջանում է կրունկի դեֆորմացիա, հոդերի խրոնիկ բորբոքում:

Ա.Ադամյանը նկատեց, որ վերջին տարիներին ավելացել են ոտքերի ցավից գանգատվողների թիվը: Պատճառը, ըստ վնասվածքաբանի, հենց անորակ կոշիկներն են:

Նա միաժամանակ նշեց, որ ոտքի, ողնաշարի հետ կապված հիվանդությունները երիտասարդացել են: Եթե նախկինում ողնաշարի հետ կապված խնդիրներով տառապում էին 50-60 տարեկանից հետո, ապա այսօր նման խնդիրներով մասնագետներին դիմում են 25-30 տարեկան երիտասարդները, մինչդեռ 20-30 տարի առաջ նրանք նման խնդիրներ չունեին:

Ինչ վերաբերում է բարձակրունկներին, ապա Ա.Ադամյանը նշեց, որ անդադար բարձրակրունկ կոշիկներ կրելը հանգեցնում է կոնքազդրային հոդի ու ծնկների լարմանը, ինչը մեծացնում է օստեոարթրիտի, մեջքի հետ խնդիրների և ոտնաթաթի մատների պաթոլոգիաների զարգացման հավանականությունը:

«Բարձրակրունկ հագնելիս հիմնական ծանրությունն ընկնում է ոտնաթաթի առաջամասի վրա, ինչի արդյունքում տեղի է ունենում ոտնաթաթի լայնակի և երկայնակի կամարի իջեցում: Իհարկե, գեղեցկությունը զոհեր է պահանջում, բայց չի կարելի ամեն օր բարձր կրունկներով կոշիկներ հագնել, այն էլ` ամբողջ օրվա ընթացքում: Այն պետք է հագնել առիթից առիթ, այն էլ մեկ-երկու ժամով: Հակառակ դեպքում աղջիկների մոտ շատ շուտով կառաջանան և ողնաշարի խնդիրներ, և Hallux valgus»,- նշեց վնասվածքաբանը:

Ըստ բժշկի, դեռահասները ևս պետք է կրեն ազատ, հարմարավետ և, ամենակարևորը, կաշվե կոշիկներ, ու երբեք տուրք չտան գեղեցկությանը: Նա այս հարցում մեղադրում է ծնողներին, ովքեր թույլ են տալիս, որպեսզի իրենց երեխաները դեռահասության տարիքում բարձր կրունկներով կոշիկներ հագնեն: «Դեռահասության տարիքում նման կոշիկները շատ վտանգավոր են: Բարձրակրունկ կոշիկները հետագայում անդառնալի հետևանքների է հանգեցնելու՝ բութ մատի ծռություն, մատների ոսկրերի բարձրացում կամ իջեցում, ոտնաթաթի տակի կոշտացում և այլն»,- ասաց Ա.Ադամյանը:

Անդրադառնալով երեխաներին, մասնագետը նշեց, որ դեռ փոքր տարիքից անհրաժեշտ է ուշադրություն դարձնել երեխաների ոտքերի առողջությանը, քանի որ անուշադրության հետևանքով նրանք ևս հետագայում լուրջ խնդիրներ կունենան: Ըստ նրա` սխալ կոշիկների հետևանքով երեխաների մոտ շատ արագ առաջանում է հարթաթություն, քանի որ նրանց մոտ մինչև 4 տարեկանը ոտքի ոսկրային համակարգն ամբողջովին ձևավորված չէ: Ա.Ադամյանի խոսքերով` եթե մեծահասակների մոտ հարթաթությունը զարգանում է մի քանի տարվա ընթացքում, ապա երեխաների մոտ` մի քանի ամսում: Վնասվածքաբանը ծնողներին խորհուրդ է տալիս իրենց երեխաների համար գնել սուպինատորով կոշիկներ, իսկ եթե հնարավորություն չունեն, քանի որ դրանք թանկ արժեն, ապա կարող են պատվիրել օրթոպեդիկ ցանցեր և տեղադրել կոշիկներում:

Ինչ վերաբերում է առանց կրունկի, տափակ կոշիկներին, որոնք նույնպես նորաձև են համարվում, մասնագետը նշեց, որ ամբողջ օրը դրանց մեջ մնալը ևս անթույլատրելի է: Ոտնաթաթի այն հատվածը, որը պետք է բարձր լինի, օրվա ծանրաբեռնվածության տակ իջնում է, ինչը ևս հանգեցնում է ձեռքբերովի հարթաթաթության: «Կոշիկը պարտադիր պետք է ունենա 1-1,5 սմ կրունկ»,- ասաց Աշոտ Ադամյանը:

 Նախորդող` Առանց հայերեն մակնշման, առանց սուպինատորի կոշիկներ վաճառքում. Խախտումներ՝ կոշիկի վաճառքի շուկայում