Ձեր վստահելի աղբյուրը

Ադրբեջանական սփյուռքի հարցերով պետական հանձնաժողովի նախագահ Նազիմ Իբրահիմովը հայտնել է, որ 1915 թվականի առնչությամբ հայերի ձեռնարկած գործողություններին դիմակայելու համար իրենք սատար են կանգնելու Թուրքիային:
Վկայակոչելով թուրքական «Հաբեր վաքթի» լրատվական կայքը` «Ermenihaber.am»-ը տեղեկացնում է, որ Իբրահիմովն ադրբեջանական սփյուռքի կառույցներին արդեն համապատասխան հրահանգներ ու հանձնարարություններ է տվել թուրքական սփյուռքի հետ միասնաբար հայերի գործողությունների դեմ հանդես գալու համար:

Պետական հանձնաժողովի նախագահը մասնավորապես նշել է, որ այն վայրերում, որտեղ թուրքական սփյուռքը փոքրաթիվ է, հայկական հարցերին կմիջամտեն ադրբեջանական կառույցները և տվյալ երկրի հանրությանը կտեղեկացնեն իրողությունը:

Իբրահիմովը, հիշեցնելով Հեյդար Ալիևի հայտնի կարգախոսը. «Մեկ ազգ, երկու պետություն», ասել է. «Մեկ ազգը երկու խնդիր չի կարող ունենալ` մեր խնդիրները նույն են: Հայկական հարցերը, որոնց առաջ Թուրքիան միայնակ է մնացել, միևնույն ժամանակ մեր խնդիրներն են: Ղարաբաղի հարցում էլ թուրքական սփյուռքն է Ադրբեջանին աջակցում և համաշխարհային հանրությանն այդ հարցում տեղեկություն տալիս»:
Ըստ Իբրահիմովի` թյուրքախոս պետությունների համագործակցության խորհրդի անդամ երկրներից Ղազախստանը և Ղրղզստանը նույնպես աջակցում են Ադրբեջանին և Թուրքիային:

«Դա էլ մեր ուժին ուժ կավելացնի: Ե´վ Թուրքիայի, և´ Ադրբեջանի, և´ Ղազախստանի, և´ Ղրղզստանի և ընդհանրապես ամբողջ թյուրքական աշխարհի դեմ ուղղված որևէ անիրավության դեմ մենք միասնաբար ենք գործելու»,- եզրափակել է Իբրահիմովը: