Ձեր վստահելի աղբյուրը

«Այս ամառ նորաձև են վառ գույները և այդ գույների համադրությունը, սակայն պետք է զգույշ լինել դրանց համադրումից»,- Panorama.am-ի հետ զրույցում ասաց «Ատեքս» նորաձևության կենտրոնի տնօրեն Կարինե Դնոյանը: Նրա խոսքերով` այս ամառ բացի գունավոր կտորներից, շատ նորաձև են նաև ծաղկավոր նկարներով, ինչպես նաև `պուտիկավոր, վանդակավոր կտորները:

Մասնագետը նշեց, որ այս տարվա գույնը համարվում է զմրուխտե կանաչը: Սակայն ինչպես միշտ գույներից միշտ նորաձևության մեջ են սպիտակը և սևը, իսկ այս ամռանը հատկապես նորաձև են ամբողջությամբ սպիտակ և սև հագուստը, կամ էլ այդ երկուսի համադրությունը:

Այս տարվա ամռանը մի քանի ռետրո ոճեր մտել են նորաձևություն, մասնավորապես, նորաձև է 60, 70 և 80-ականների հագուստը: «Սրանք բավականին հակասող ոճեր են, քանի որ իրարից տարբեր են, դրա համար կարծում եմ, որ ընտրությունն ավելի հեշտ կլինի»,- ասաց մասնագետը:

60-ականների ոճի մեջ են մտնում թեթև, կարճ շրջազգեստները, գունային վառ համադրությունը, սակայն դետալները պետք է ավելի քիչ լինեն: 60-ականների ոճի մեջ են մտնում նաև սուր քթով կոշիկները, որոնք այս տարի շատ նորաձև են:

Այս տարի նորաձև է նաև վառ դիմահարդարումը, դա 80-ականների ոճն է: «Իհարկե դա նախընտրելի է այն մարդկանց համար, ովքեր սիրում են վառ դիմահարդարումը, դա ավելի շատ համարվում է գլամուրային ոճ»,- նշեց Կ.Դնոյանը:

Ինչ վերաբերում է 90-ականների ոճին, ապա այն զուսպ է, բայց հագուստները պետք է այնպիսի տպավորություն թողնեն, որ դրանք մի քիչ լայն երևան: Այս ոճի մեջ նորաձև են հատկապես դարչնագույն, մոխրագույն հագուստներն ու կոստյումները: 90-ականների ոճը նախընտրողները կարող են խոշոր ակնոցներ կրել, սակայն նրանց դիմահարդարումը պետք է բնականին մոտ լինի:

Կ.Դնոյանը նշեց, որ ինչպես նախորդ տարի, այս տարի ևս նորաձև են երկար փեշերով զգեստները: «Այս տարի երկրորդ պլան են մղվել պլիսե յուբկաները և հիմա ավելի շատ նորաձև է էթնո ոճը»,- ասաց նա:

Այս ամառ շատ նորաձև են նաև շորտերը, որոնք նույնիսկ գրասենյակային հագուստի մեջ են մտել, այսինքն` կոստյումների հետ կարելի է համադրել շորտերը: Դրանք կարող են լինել տարբեր չափերի և գույների:

«Ինչ վերաբերում է կոշիկներին, քանի որ այս ամռանը փեշերը երկարում են, ուստի նորաձև են կրել բալետկաները, սանդալները, տափակ կոշիկները: Այս տարի նորաձև են նաև բարձր կոշիկները`պլատֆորմաները»,- ասաց Կ.Դնոյանը:

Իսկ տաբատներ ընտրելիս մասնագետը խորհուրդ է տալիս ընտրել վառ գույներով, ինչպես նաև ծաղկավոր տաբատներ, քանի որ դրանք նույնպես մտնում են այս տարվա նորաձևության մեջ:

«Ինչպես տեսնում եք` կա ընտրության մեծ հնարավորություն և յուրաքանչյուր ոք կարող է ընտրել այն, ինչ իրեն դուր է գալիս»,- նշեց «Ատեքս» նորաձևության կենտրոնի տնօրենը:

Կ. Դնոյանը տղաներին ևս խորհուրդ տվեց հագնել վառ գույների հագուստ, բայց ճիշտ համադրելով: Ըստ նրա` այս տարի նորաձև են վառ գույներով նեղ տաբատներն ու պիջակները: Մասնագետը նկատեց, որ վերջին շրջանում տղամարդիկ, հատկապես երիտասարդները, սկսել են ավելի վառ գույներով հագուստ կրել, սակայն շատերը չեն կարողանում ճիշտ համադրել գույները:

Մասնագետը թե կանանց, թե տղամարդկանց խորհուրդ տվեց նորաձևությանը հետևելով պահպանել սեփական ոճը: «Յուրաքանչյուր մարդ պետք է տեղյակ լինի նորաձևությանը, բայց կիրառելուց պետք է հաշվի առնի իր ոճն ու այն, թե արդյոք դա իրեն կսազի, թե ոչ: Պետք է կարողանալ այդ ամենը ճիշտ համադրել»,- ասաց «Ատեքս» նորաձևության կենտրոնի տնօրենը: