Ձեր վստահելի աղբյուրը

«Որևէ արձագանք չկա, որովհետև ինչ ասեն: Ասելու բան չունեն` իրենք արհամարհել են իրենց իսկ հաստատած բյուջեն»,- Panorama.am-ի հարցին, թե արդյոք նա պատասխան ստացել է հայաստանյան որևէ բուհից իր օրերս բարձրաձայնած հարցադրմանը, ասաց Կրթության ազգային ինստիտուտի փոխտնօրեն, Երևանի ավագանիում «Բարև Երևան» դաշինքի խմբակցության ղեկավար Անահիտ Բախշյանը:

Հիշեցնենք, նախկին պատգամավորը օրերս ահազանգել էր, որ «Տարբեր բուհեր ուսման վարձերը թանկացրեցին՝ հակառակ այն բանի, որ բոլոր բուհերի կառավարման խորհուրդները 2013թ. հունվարին լսել են ռեկտորների ֆինանսական հաշվետվություններն ու հաստատել 2013 թվականի բյուջեն, որտեղ իհարկե չեն նախատեսվել այդ թանկացումները»: Նաև հետաքրքրվել` «Ելնելով ՀՀ կրթության զարգացման 2011-2015թ.թ. պետական ծրագիր ՀՀ օրենքից այն մասին, որ բարձրագույն կրթությունը մատչելի չէ սոցիալապես խոցելի որոշ խմբերի համար, «Կրթության որակ և համապատասխանություն» վարկային երկրորդ ծրագրով նախատեսվել էր ուսանողներին տրամադրել հատուկ վարկեր և այդ նպատակով 34 մլն դրամի չափով կատարվել են նախապատրաստական աշխատանքներ /վարկերի տրամադրման մեխանիզմի ձևավորում/, սակայն, ինչպես գրված է ՎՊ-ի 2012թ. հաշվետվության մեջ, հետագայում վարկերի տրամադրման գործընթացը դադարեցվել է: Այդպես էլ ՀՀ վարչապետն ու ԿԳ Ծիգը չպարզաբանեցին, թե ինչու դադարեցվեց այս գործընթացն ու ո՞ւր կորավ 34մլն դրամը: Եվ ընդհանրապես, ի վերջո այս վարկային ծրագիրը աշխատելո՞ւ է Հայաստանի Հանրապետությունում, թ՞ե՝ ոչ »:

Ա.Բախշյանը նշեց` ինքը ընդամենը ՀՀ վարչապետի ուշադրությունն էր հրավիրել այն հանգամանքի վրա, որ բուհերը, փաստորեն, իրենց իսկ կայացրած որոշումները ոտնահարում են և հակասող որոշումներ կայացնում: Բայց դեռ պատասխան չկա:

Անդրադառնալով այն հարցին, թե սոցիալական նման պայմաններում, հաշվի առնելով նաև գնաճը և այլն, արդյո՞ք կա ինչ-որ մեխանիզմ, որ կարող է ազդեցություն ունենալ բուհերի կողմից նման որոշման վերանայմանը, Անահիտ Բախշյանը ասաց, որ միակ մեխանիզմը թերևս այն է, որ պետք է գործի վարկային համակարգը.
«Համակարգը պետք է գործի, քանի որ մեր ուսանողներն ու իրենց ընտանիքները դրա կարիքը շատ ունեն: Թող մարդիկ վարկ վերցնեն ու վարկով կրթություն ստանան, ինչպես դա արվում է ամբողջ աշխարհում, հետո աշխատեն` եթե, իհարկե, աշխատանք գտնեն , վարկերը փակեն: Համենայնդեպս իրենց կրթության հարցերը իրենք այդ ձևով կարող են լուծել: Բայց պետությունը հերթական անգամ վարկային ծրագիրը տապալեց»,- նշեց տիկին Բախշյանը:

Միևնույն ժամանակ մեր զրուցակիցը նշեց, որ բուհերը իրավունք ունեն և տեղ ունեն այդ վարձավճարները բարձրացնելու, որովհետև հաշվի առնելով գազի և էլեկտրաէներգիայի սակագների թանկացումը, նրանց ծախսերը ևս ավելանալու են:
«Հունվարին, երբ հաստատվում էր տարվա բյուջեն, բուհերը չեն հաստատել վարձավճարների թանկացումը, ավելին` հաշվետվությունները քննարկել ու ներկայացրել են հաստատման բուհերի խառավարման խորհուրդի նախագահներին, որոնք բոլորը բարձրաստիճան պաշտոնյաներ են, բայց ոչ ոք այսօր չի ասում, ՀՀ նախագահից սկսած, որ, օրինակ` այ համալսարան, բա դու 2013թ-ի հաշվետվությունը ներկայացնում էին հաստատման, այնտեղ չէիր խոսում թանկացման մասին: Հետո ի՞նչ իրավունքով ես մեր կառավարաման խորհրդի որոշումը փոխում»,- նշեց Ա.Բախշյանն ու հնչեցրեց իր ամենակարևոր հարցադրումը, որին ցանկանում է ստանալ պատասխան` արդյո՞ք այդ բարձրաստիճան պաշտոնյաները իրենց արհամարհված չեն զգում:

Նշենք, որ բուհերից թերևս միակը, որտեղ ուսման վարձերի բարձրացում չի սպասվում և մի բան էլ որոշ մասնագիտությունների գծով վարձավճարների նվազում է լինելու, Խ.Աբովյանի անվան Մանկավարժական համալսարանն է: