Ձեր վստահելի աղբյուրը

Սպորտի և երիտասարդության հարցերի նախարարության աշխատակազմի նախկին ղեկավար Վահե Էլոյանը դիմել է ՀՀ վարչական դատարան իրեն ազատելու մասին կառավարության որոշումը չեղյալ համարելու պահանջով:

Մինչ դատարանը կընդունի և կվիճարկի Սպորտի և երիտասարդության հարցերի նախարարության աշխատակազմի նախկին ղեկավարի Էլոյանի հայցադիմումը՝ չի բացառվում, որ Վահե Էլոյանը երկրորդ անգամ կորցնի իր պաշտոնը (նախարարի օգնական) : Այս դեպքում դրա համար հիմք կծառայի վերջինիս բացակայություները, որոնք նշանակումից մինչ այս պահը որևէ կերպ չի հիմնավորել և չի պատճառաբանել Վահե Էլոյանը: Այս մասին Panorama.am-ի հետ զրույցում նշեց նույն նախարարության աշխատակազմի նորանշանակ ղեկավար Մհեր Անանյանը՝  անդրադառնալով Վահե Էլոյանի դատարան դիմելու որոշմանը, նախարարությունում վերջինիս անորոշ կարգավիճակին, և այս ընթացքում նրա դրսևորած վարքագծի մասին հնչող տեսակետներին:

-Ի՞նչ պաշտոն է այս պահին զբաղեցնում Վահե Էլոյանը նախարարությունում:
-Վահե Էլոյանն այս պահին նախարարությունում զբաղեցնում է նախարարի օգնականի պաշտոնը, որը հայեցողական պաշտոն է:

- Ի՞նչ իրավական հիմքով է նա նշանակվել հայեցողական պաշտոնում, իր դիմումի համաձայն, թե նրա հետ կնքվել է աշխատանքային պայմանագիր: Երեկ Էլոյանն իր հարցազրույցում նշել է, որ ոչ ազատման և ոչ էլ այլ պաշտոնի տեղափոխման համար ինքը որևէ մեկին դիմում չի ներկայացրել:
-Հայեցողական պաշտոնում նա նշանակվել է նախարարի համապատասխան հրամանով՝ նախարարության աշխատակազամի ղեկավարի պաշտոնից տեղափոխվելով մեկ այլ պաշտոնի:  Այսինքն՝ Էլոյանն ազատվել է աշխատանքից հայեցողական պաշտոնի նշանակվելու պատճառով և քաղծառայողի պաշտոնից ազատման հիմքերը,  որ դուք տեսնեք, էնտեղ հստակ գրված է ամեն բան, չկա որևիցե խախտում: Նրանք մինչ այդ նախարարի հետ համատեղ քննարկել են և փաստացի բանավոր նրանք եկել են փոխադարձ համաձայնության: Աշխատանքային օրենսգիրքը իմպերատիվ ձևով չի պնդում,  որ նրանց համաձայնությունը պետք է լինի գրավոր, այնտեղ հստակ ասվում է՝ կողմերը պետք է գան փոխադարձ համաձայնության:

-Վահե Էլոյանն այն կարծիքին է, որ իր ազատման մասով կայացվել է անօրինական որոշում: Նախօրեին նա դիմել է Վարչական դատարան, հայցադիմումով դատարանից պահանջում է անվավեր ճանաչել ՀՀ Կառավարության Ս/Թ հունիսի 6-ի 570-Ա որոշումը: Որն է այս ամենի վերաբերյալ նախարարության արձագանքը:
-Տեղյակ ենք մամուլից: Նախարարության արձագանքն այս պահին ես որևիցե ձևով չեմ կարող ներկայացնել, միայն այն պատճառով, որ իբրև պատասխանող կողմ՝ դատարանում հանդես է գալու Կառավարությունը, և այն իրավական ակտը, որ Կառավարությունը հրապարակեց, այսինքն որ ազատել է Էլոյանին, երևի թե ներկայացված կլինի:
Այսինքն ես չեմ համարում՝ մեծ խնդիր է առաջացել, որ Վահե Էլոյանը դիմել է վարչական դատարան, մենք էլ աշխատակազմով պիտի պատրաստվենք, փորձենք էդ հարցին լուծում տալ: Եթե Կառավարությունը ինչ-որ պահի մասնակից դարձնի մեզ ինչ-որ գործառույթ իրականացնելու մասով, բնականաբար մենք մեր մասով մեր ասելիքը կամ հիմնավորումը կունենանք դատարանում: Բոլոր իրավական ակտերը՝մեզ մոտ՝ նախարարության կառավարման բաժնում, ամրագրված են իրավական հիմքերով և այլն:

-Եվ սո՞ւտ են այն տեղեկությունները, որ Վահե էլոյանն իրականում գրել է ազատման դիմումը, սակայն ինչ-որ զրույցից հետո փոշմանել-պատռել է այն:
-Ես նման տեղեկություն չունեմ: Ասեմ ինչ խնդիր է իրականում, Վահե Էլոյանն ազատվելով իր զբաղեցրած պաշտոնից մեկ այլ պաշտոնի է նշանակվել հունիսի 5-ին, մինչդեռ ես այս պաշտոնին նշանակվել եմ որպես ժպ հունիսի 15-ին: Այնքան գործ կա անելու, որ ես նման հարցերով չեմ էլ ուզում հետաքրքրվել կամ ծանրաբեռնել ինձ:

-Այս օրերին, երբ Էլոյանը նշանակված է եղել նախարարի օգնականի պաշտոնում, ներկայացել է աշխատանքի, կատարել է ի պաշտոնե իրեն տրված որոշակի գործառույթներ ու պարտականություններ:
-Ոչ, իմ ունեցած տեղեկություններով Էլոյանը երբևէ չի ներկայացել նախարարություն և չի կատարել որևէ պարտականություն, բայց ունեմ տեղեկատվություն, որ ինքը մի քանի անգամ այս օրերին մուտք է գործել նախարարության շենք՝ ընդամենը առաջին հարկ, մի քանի անգամ ՀԱՕԿ է մտել դուրս եկել:

-Իսկ բացակայությունների համար նկատողություն չի՞ հայտարարվել պարոն Անանյան, կամ աշխատակազմի ղեկավարին ներկայացվել է որևէ հիմնավորում՝ արդյոք հարգելի պատճառով է բացակայում նախարարի օգնականը, թե` ոչ:
-Ոչ, իհարկե, Բայց մոտակա օրերին երևի թե մենք կանդրադառնանք այդ խնդրին, քանի որ չի կարող երկարատև բնույթ կրել Էլոյանի բացակայությունը: Ես արդեն հանձնարարել եմ կառավարման բաժին, որպեսզի հետամուտ լինի, փորձենք հասկանալ այդ մարդը վերջապես ինչու աշխատանքի չի գալիս, և ինչ հիմքերով է նա այդքան բացակայում, միգուցե հիվանդ է կամ կա ուրիշ խնդիր:

-Խոսվում է նաև ֆինանսական չարաշահումների մասին, որոնք եղել են Էլոյանի պաշտոնավարման ընթացքում, որոնց պատճառով էլ Էլոյանն իբր ինքնապաշտպանական քայլերի է դիմում: Իրականում կա նման բան:
-Նախարարության գույքագրման աշխատանքները նոր նոր են սկսվել, ուստի այս պահին խոսել չարաշահումների մասին՝ տրամաբանական լինել չի կարող: Բայց, նախարարության հաշվեկշռում կար մի մեքենա Մերսեդես մակնիշի, որը երկար ժամանակ գտնվել է իր մոտ՝ առանց իրավական հիմքերի ու հիմնավորումների: Գույքագրման ընթացքում, երբ այդ մասին տեղեկացա, ընդամենը ասացի ապահովեք նախարարության գույքը, բերեք-ներկայացրեք, այդքան բան:

-Դա եղել է Էլոյանի ծառայողական մենքենան և փաստորեն շահագործվել է անձնական նպատակներով:
-Ոչ, որպես ծառայողական մեքենա նրան այլ մակնիշի մեքենա է տրամադրվել, որն էստեղ կայանված էր: Իսկ մերսեդեսը նախարարությանը պատկանող մեկ այլ մեքենա է, որը գտնվել է իր մոտ: Էդ էր պատճառը ասացինք բերեք գույքը ներկայացրեք, մարդն էլ բերել ներկայացրել է, և ի զարմանս ինձ շատ ինքնատիպ ձևով՝ ինչ կա չկա մեքենայի վրա հանել է, նոր է բերել հայելիներ, մագնիտոֆոն, մարտկոց և էլի շատ ուրիշ բաներ, ինչ հնարավոր էր: 3 Օր առաջ է մարդը այդ վիճակում բերել մեքենան, ներքևում թողել է ոստիկանների մոտ և հարկ չի համարել անգամ վերև բարձրանալ:
Պարզապես զարմանում եմ ինչի է նա էդպիսի բան արել, ինչ է ուզում, ինչից է նեղված կամ ո՞ւմ դեմ է նա այդպիսի բան անում, ես չեմ կարողանում հասկանալ: Ես այդ ամենից հասկանում եմ , որ մարդու մոտ կա մեծ վիրավորանք, բայց վիրավորվելու խնդիրը ես չեմ տեսնում, մանավանդ իմանալով այս ամենի նախապատմությունը: Նրանք շատ ջերմ հարաբերություններով նախարարի հետ նստել, զրուցել են և հայտարարի են եկել: Եթե մարդը շենքից դուրս է եկել, ես չեմ հասկանում ինչ է փոխվել նրա մոտ, ինչո՞ւ է նա փոշմանել, ովքեր են փորձել փոխել նրա մոտ ինչ որ բանն..ես այդ մարդու մոտ միայն հակասական բաներ եմ տեսնում: Ես իրեն ինչ-որ տեղ նաև շատ լավ եմ հասկանում, որ ընդդիմանում է ու չգիտի, ինչի համար:

-Նրան պարտադրվե՞լ էր նախարարի օգնականի պաշտոնը:
-Չէ, ինչպես կարող էր պարտադրվել, եթե նախարարության աշխատակազմի ղեկավարի պաշտոնը քաղծառայողի պաշտոն է, իսկ նախարարի օգնականինը՝ հայեցողական:

-Ամեն դեպքում անձամբ Դուք կարծում եք որ ճիշտ հիմքերով է նա ազատվել աշխատակազմի ղեկավարի պաշտոնից, այստեղ չկա՞ իրավախախտում:
-Այո, լրիվ ճիշտ հիմքերով: Այլապես կառավարության որոշում չէր կայացվի:

- Որպես աշխատակազմի ղեկավար մինչ այս պահը հանդիպում չեք ունեցել Էլոյանի հետ, թեկուզ հանձնում- ընդունման պահին:
-Ես նրա հետ կարող էի հանդիպել միայն այստեղ նախարարությունում, բայց նա ընդամենը առաջին հարկ է մի քանի անգամ ոտք դրել: Իսկ հանձնում-ընդունումը որպես աշխատակազմի նոր ղեկավար՝ եղել է ոչ թե իր՝ այլև հանձնման ակտով ստեղծված հանձնածողովի հետ, գույքը կնիքը նրանք ընդունել և հանձնել են ինձ՝ առանց Էլոյանի ներկայության, այդքան բան:

-Կարծիք կա, որ Էլոյանի դեպքով կանխվել են նախարարությունում մի շարք աշխատակիցների ազատումներ, այսինքն այս մեկը դեռ չմարսած, նախարարը մտադիր չէ հաջորդ դիմումներին ու կադրային փոփոխություներին անդրադառնալ:
-Չեմ կարծում նման խնդիր կա, որպես աշխատակազմի ղեկավար ես այս պահին չեմ տեսնում կադրային փոփոխություների տրամադրվածություն, ընդհակառակը հաշտ համերաշխ աշխատում ենք ընդամենը աշխատանքային խորհրդակցություններ, քննարկումներ են ընթանում, չկա որևէ լարվածություն, ամեն ինչ հրաշալի է: Բոլորին եմ ասել կոկրետ ես՝ մենք բոլորիդ վստահում ենք՝ մինչև հակառակում դուք մեզ ու ձեզ չապացուցեք: Մեր անելիքներն այնքան շատ են և այստեղ այնքան լավ թիմ է ձևավորված, որ ես չեմ կարծում արժե թողնել ամեն բան ու ընկնել հիմար ինտրիգների հետևից՝ մանավանդ, որ այսօր շատերը մեծ ջանասիրությամբ փորձում են համոզել, որ իրենք պիտանի աշխատողներ են, դե դա էլ մարդկային սինդրոմ է կարելի է նաև հասկանալ իրենց, ես միայն ողջունում եմ:

-Եթե Էլոյանը շարունակի բացակայությունները՝ առանց հիմնավորումների ու պատճառաբանություների, կազատե՞ք նրան նաև այս պաշտոնից, օրենքը Ձեզ լրիվ տալիս է այդ հնարավորությունը:
-Այո, օրենքը մեզ տալիս է այդ իրավունքը, բայց միևնույն ժամանակ, եթե այդ գործընթացի ժամկետները երկարաձգվեն, պետք է նաև մենք օրենքի առաջ կրենք այդ պատասխանատվությունը, ի վերջո չի կարելի մարդուն նշանակել մի պաշտոնի և չաշխատելու դեպքում անվերջ փորձել պահել նրան այդ պաշտոնում: Արդեն 20-րդ օրն է նա այդպես էլ չի ներկայանում աշխատանքի: Կա խնդիր, և խնդիրը լուրջ է: Աշխատակազմի կառավարման բաժնի մասնագետին խնդրել եմ, կապվի հետը, հասկանա ինչ-ինչոց է: Ես չէի ուզի հեռացնել նրան աշխատանքից, որովհետև անկախ ամեն ինչից եթե այսօր մարդը դատական քաշքշուկների մեջ է փորձում իրեն գցել, կարծում եմ այդ դեպքում հեռացնելը իրեն լավագույն տարբերակը չի լինի, լավագույնը կլինի այն, որ մարդը ազատվի՝ իր դիմումի համաձայն: Որովհետև եթե այս դեպքում էլ նա հեռացվի, չեմ կարծում մարդիկ ճիշտ կընկալեն, իրավիճակը կսկսեն ներկայացնել իրենց ձեռնտու տեսանկյուններից, կկարծեն՝ դրանով այդ մարդու նկատմամբ ինչ-որ վերաբերմունք ենք ուզում արտահայտել: Մյուս կողմից կա օրենքի հստակ պահանջ, մենք չենք կարող մարդուն անվերջ պահել մեր հաստիքացուցակում: Բնականաբար, աշխատանքի չի ներկայանում և չի էլ վարձատրվելու: Բառացիորեն մինչև 3 օր առաջ չենք էլ ունեցել տեղեկատվություն նրա գտնվելու վայրի վերաբերյալ, և բացառված չէ, որ կարող է այս ընթացքում նաև մի բժշկից տեղեկանք ներկայացնել:

Հեղինակ՝ Սյուզի Բադոյան