Ձեր վստահելի աղբյուրը

Աբովյանի հայտնի գործարար «ՄԱ-Պլազա» ժամանցային համալիրի սեփականատեր Մկրտիչ (Մերուժան) Խաչատրյանի մահվան համար մեղադրվող երեք երիտասարդների խափանման միջոցը փոխելու որոշումը և ազատ արձակելն անօրինական է: Panorama.am-ի թղթակցի հետ զրույցում այդպիսի պնդում արեց Մկրտիչ Խաչատրյանի իրավահաջորդի փաստաբան Սարգիս Խաչատրյանը: 

Աբովյանի խոշոր գործարար Մկրտիչ Խաչատրյանը մահացել էր նախորդ տարվա սեպտեմբերի 13-ին: Հանցագործությունը կատարելու համար սկզբում կալանավորվել էր ՊՆ շարքային զինծառայող Ալբերտ Քարհանյանը, սակայն Panorama.am-ի հրապարակումից հետո կալանավորվեցին ևս երկուսը` եղբայրներ Վահրամ և Վարդան Գրիգորյանները:

Միջադեպը տեղի էր ունեցել «ՄԱ-Պլազա» ժամանցային համալիրի դիմաց, երբ մի խումբ երիտասարդներ վիճաբանել էին, Մկրտիչ (Մերուժան) Խաչատրյանը այդ օրը փորձել էր խաղաղեցնել նրանց ու հորդորել էր չկռվել: Սակայն, ինչպես Panorama.am-ին էին պատմել Խաչատրյանի հարազատները, խմբից առանձնացած մի քանի երիտասարդներ մոտեցել են, քաշքշել են գործարարին, ծեծել, գցել գետնին և նորից ոտքերով խփել: Դաժան ծեծի ենթարկված Մկրտիչ Խաչատրյանն այդ օրը տեղափոխվել էր «Սուրբ Գրիգոր Լուսավորիչ» բժշկական կենտրոն, ենթարկվել վիրահատության, բայց դժբախտաբար, սեպտեմբերի 27-ին Խաչատրյանը մահացել էր:

Այս պահին շուրջ 8 ամիս տևած նախաքննությունից հետո մեղադրական եզրակացությունը զինվորական դատախազություն է փոխանցվել՝ այն հաստատելու համար: Փաստաբան Սարգիս Խաչատրյանը նախաքննական մարմնից՝ ՊՆ քննչական ծառայությունից 5 օր ժամանակ է խնդրել՝ գործի նյութերին ծանոթանալու համար: Սակայն մինչ այդ փաստաբանը միջնորդություն է ներկայացրել ՊՆ քննչական ծառայությանը՝ կասկածներ հայտնելով հանձնաժողովային փորձաքննության եզրակացության վերաբերյալ և խնդրելով օբյեկտիվ քննությունն ապահովելու համար նշանակել կրկնակի դատաբժշկական հանձնաժողովային փորձաքննություն և դրա կատարումը հանձնարարել ՀՀ ԳԱ ակադեմիայի Փորձաքննությունների ազգային բյուրոյին:

Բանն այն է, որ մինչև Խաչատրյանի մահը և մահվանից հետո կատարված դատաբժշկական փորձաքննությունները, որոնք արվել են ԱՆ Դատաբժշկական-գիտագործնական կենտրոնում, ցույց են տվել, որ Խաչատրյանի մահը հասել է «գլխուղեղի կենսական կարևոր ֆունկցիաների խանգարումից, օրգանիզմի ընդհանուր ինքնաթունավորումից, որոնք գանգուղեղային փակ, բութ վնասվածք ստանալու հետևանք են»: Քննիչի հարցին, թե հնարավո՞ր է արդյոք, որ Խաչատրյանը վնասվածքները ստանար վայր ընկնելու հետևանքով, թե ոչ, Դատաբժշկական կենտրոնի 18 տարվա աշխատանքային ստաժով փորձագետն իր եզրակացության մեջ պատասխանել է բառացիորեն հետևյալը. «Վնասվածքների առաջացումը վայր ընկնելուց հնարավոր չէ»: Բացի այդ, փորձագետը թվարկել է Խաչատրյանի ստացած բազմաթիվ վնասվածքներն ու եզրակացրել. «Վերը նշված վնասվածքները մահվան անմիջական պատճառի հետ գտնվում են ուղղակի անմիջական կապի մեջ, կենդանի անձանց մոտ սովորաբար պատճառում են առողջության ծանր վնաս»:

Սակայն գործի նախաքննությունը վարող քննիչ Գ. Հակոբյանը որոշում է լրացուցիչ փորձաքննություն նշանակել, ինչը ըստ փաստաբան Սարգիս Խաչատրյանի, ՀՀ Քրեական դատավարության օրենսգրքի 251 հոդվածի կոպիտ խախտում է, քանի որ նախկինում արված փորձաքննությունները կասկածի հիմքեր չէին տալիս: Սակայն այս անգամ ևս փորձագետը տալիս է բառացի նույն եզրակացությունը՝ պատասխանելով քննիչի նույն հարցադրումներին: «Մ. Խաչատրյանի /կենդանի անձ և դիակ/ հայտնաբերված գլխի վնասվածքներից յուրաքանչյուրի շրջանում ստացած հարվածի հետևանքով կարող էր առաջանալ գանգուղեղային վնասվածքը, ապա վնասվածքները ինչպես առանձին-առանձին, այնպես էլ իրենց համադրությամբ, պատճառվել են առողջությանը ծանր վնաս` որպես կյանքին վտանգ սպառնացող», -ասված է փորձագետի լրացուցիչ եզրակացության մեջ:

Նկատենք, որ մեղադրյալ երիտասարդները, որոնցից մեկը զինծառայող է, երկուսը՝ սպորտսմեն, իրենց ցուցմունքներում ասել են, որ հարվածը եղել է թեթև, հրել են, Խաչատրյանն ընկել է, գլուխը հարվածել քարին:

Այս եզրակացությունը փորձագետն արել է նախորդ տարվա նոյեմբերի 14-ին: Դրանից հետո, այս տարվա սկզբին, սակայն, մեղադրյալների պաշտպանական կողմը միջնորդել է, որպեսզի հանձնաժողովային փորձաքննություն իրականացվի, սակայն նախաքննական մարմինը, մասնավորապես քննիչ Հակոբյանը, մերժել է նրանց միջնորդությունները: Քննիչը իր մերժման որոշումը հիմնավորել է նրանով, որ «Խաչատրյանի կենդանության օրոք տրված դատաբժշկական եզրակացության և դիակի դատաբժշկական եզրակացության մեջ չկան էական հակասություններ»: 

Սակայն ապրիլի 5-ին, ինչպես փաստաբան Սարգիս Խաչատրյանն ասաց, անհասկանալի պատճառներով քննիչ Հակոբյանի կողմից նշանակվում է հանձնաժողովային փորձաքննություն, որի կատարումը նորից հանձնարարվում է ՀՀ ԱՆ Դատաբժշկական գիտագործնական կենտրոնի փորձագետներին: Հանձնաժողովային փորձաքննություն (երբ փորձաքննության եզրակացությունը տալիս են հանձնաժողովի անդամները-հեղ.) նշանակելու պատճառները տուժող կողմի համար անհասկանալի են, քանի որ ըստ պաշտպանի, ինչպես քննիչն էր իր մերժման որոշման մեջ գրել «նախորդ դատաբժշկական փորձաքննությունների միջև չկան էական հակասություններ»:

«Դա քրեական դատավարության նորմերի կոպիտ խախտում է, քանի որ հստակ սահմանված է, թե որ դեպքերում են նշանակվում կրկնակի կամ լրացուցիչ փորձաքննություններ, այսինքն, ըստ էության առկա լիարժեք եզրակացությունների պարագայում, անհասկանալի է, թե ինչու է նշանակվել հանձնաժողովային փորձաքննությունը, և դա այն դեպքում, երբ պատճառաբանված որոշմամբ պաշտպանական կողմի միջնորդությունը մեկ անգամ մերժվել է: Ըստ էության, նախաքննություն իրականացնող մարմինն ինքն իրեն հակասել է և ցույց տվել ոչ լիարժեք, ոչ օբյեկտիվ լինելու միտումներ», -մեզ հետ զրույցում ասաց փաստաբան Խաչատրյանը:

Նկատենք, որ այս վերջին՝ հանձնաժողովային փորձաքննության եզրակացությունը նախորդներից 180 աստիճանով տարբերվում է ու լի է հակասություններով: Մասնավորապես, հանձնաժողովային փորձաքննության եզրակացությամբ, ըստ փաստաբանի, ստացվում է, որ Խաչատրյանը մինչև միջադեպը վնասվածք ստացած է եղել, և «դրանք ստանալուց հետո կարող էր անցնել որոշակի ժամանակամիջոց, որից հետո պատճառվեր գագաթ-ծոծրակային շրջանում ազդող ուժի ներգործությամբ պայմանավորված գանգուղեղային ծանր կոտրվածք»: Մինչդեռ, ըստ փաստաբանի, փորձագետները չեն հստակեցնում «որոշակի ժամանակամիջոց»-ի տևողությունը, քանի որ մինչ դեպքի պահը Խաչատրյանը ոչ մեկի հետ չի վիճաբանել և գլխի հատվածում այլ վնասվածքներ չի ստացել:

Փաստաբան Սարգիս Խաչատրյանի խոսքով, հանձնաժողովային փորձաքննության եզրակացության հետևություններն ուղղակի կասկածի տակ են դնում Դատաբժշկական, գիտագործնական կենտրոնում աշխատող անձանց տարիների «փորձառու» ստաժը: «Ստացվում է, որ մի հիմնարկությունում աշխատող փորձագետների մի մասը մի կարծիքի է, իսկ մյուս մասը` այլ կարծիքի: Այսինքն՝ տվյալ պարագայում դուրս է գալիս, թե ում ճակատագրի հետ ինչպես կուզեն, այդպես էլ կվարվեն», -նկատեց պաշտպանը:

Ահա այս փորձաքննությունն էլ հիմք է եղել, որ երեք մեղադրյալների նկատմամբ նախկինում առաջադրված ծանր մեղադրանքը մեղմացվի ու նրանց վերագրվի միջին ծանրության հանցանք:

Զինծառայող Ալբերտ Քարհանյանի, ինչպես նաև եղբայրներ` Վարդան և Վահրամ Գրիգորյանների նկատմամբ մեղադրանքն առաջադրվել է ՀՀ քրեական օրենսգրքի 113-րդ հոդվածի 2-րդ մասի 2-րդ կետի (դիտավորությամբ առողջությանը միջին ծանրության վնաս հասցնելը): Քարհանյանի նկատմամբ կա նաև երկրորդ մեղադրանքը՝ ՀՀ քրեական օրենսգրքի 109-րդ հոդվածի 1-ին մասի` «անզգուշությամբ մահ պատճառելը» հատկանիշներով:

Նշենք, որ մինչ այդ, նրանց բոլորի նկատմամբ նախկինում առաջադրվել էր մեղադրանք ՀՀ քրեական օրենսգքրի 112-րդ հոդվածի 2-րդ մասի 6-րդ և 14-րդ կետերով (դիտավորությամբ առողջությանը ծանր վնաս հասցնելը):

Տուժող կողմը, մասնավորապես տուժողի իրավահաջորդը՝ մահացած Խաչատրյանի դուստրը, նախաքննական մարմնի այս աճպարարություններից հոգեբանական ծանր վիճակում է, և փաստաբանը օգնության խնդրանքով դիմել է Մարդու իրավունքների պաշտպանին: Բացի այդ, նրանք նամակով դիմել են նաև Հայաստանի նախագահ Սերժ Սարգսյանին, Գլխավոր դատախազ Աղվան Հովսեփյանին ու զինդատախազ Գևորգ Կոստանյանին, որտեղ նշել են, որ գործի նյութերին ծանոթանալով եզրակացրել են, որ նախաքննական մարմինը չի կատարել լրիվ, օբյեկտիվ և բազմակողմանի քննություն, ինչի արդյունքում «հանցանք կատարած անձինք, որոնց պատճառով անձը զրկվել է կյանքից, վայելում են ազատություն և նրանց մեղսագրվում է նրանց կողմից կատարված արարքին ոչ իրավաչափ արարք»: Այդ պատճառով տուժող կողմը բարձրաստիճան նշված պաշտոնյաներից խնդրում է վերահսկել քրեական գործի ընթացքը:

Նախորդող հրապարակում. Աբովյանցի հայտնի գործարարի մահվան մեջ 3 մեղադրվողներն ազատ են արձակվել