Քաղաքապետարանը պարզաբանում է, թե ինչու միկրոավտոբուսային երթուղիները ավտոբուսային չեն դարձել

Հասարակություն 10:47 28/06/2013

Քաղաքապետարանը պարզաբանում է, թե ինչու միկրոավտոբուսային երթուղիները ավտոբուսային չեն դարձել

Երևանի քաղաքապետարանում սպասում են նոր ավտոբուսների, որպեսզի կարողանան միկրոավտոբուսային երթուղիները փոխարինել ավտոբուսային երթուղիներով: Այս մասին Panorama.am-ին հայտնեցին Երևանի քաղաքապետարանի աշխատակազմի տրանսպորտի վարչությունից:

Օրեր առաջ խմբագրությունը էլեկտրոնային փոստով ստացել էր նամակ, ըստ որի. « Համաձայն այս էջում տեղակայված
փաստաթղթերի 82 համարի միկրոավտոբուսային երթուղին փոխարինվել է 42 համարի ավտոբուսային երթուղով։ Բայց երթուղում մինչև հիմա Գազելներ են։ Այն էլ ամենահին սերնդի Գազելներ։ Գազելները սարսափելի տեխնիկական
վիճակում են գտնվում և քաղաքացիների կյանքի համար պոտենցիալ վտանգ են ներկայացնում»:

Ըստ նամակագրի, տարբեր տարիներին այդ Գազելների վրա հիմնականում եղել է «Լուս Աստղ»-ի գովազդը, այնուհետև «Երևան Սիթի»-ի գովազդը։ «Ինչը թույլ է տալիս ենթադրել թե ում կարող է պատկանել այդ երթուղին և ինչու քաղաքապետարանի թափը չի հերիքել երթուղին փոխարինել»,-նշված է նամակում:

Panorama.am-ը փորձեց քաղաքապետարանից ստանալ պատճառների վերաբերյալ մեկնաբանություն.

«Ի պատասխան Երևանի քաղաքապետարանին ուղղված Ձեր հարցման`աշխատակազմի տրանսպորտի վարչությունից տեղեկացնում են, որ Երևանի հասարակական տրանսպորտի նոր երթուղային ցանցով նախատեսված է թվով 31 միկրոավտոբուսային երթուղիներ փոխարինել ավտոբուսայինով։ Թվով 16 միկրոավտոբուսային երթուղիներ արդեն փոխարինվել են ավտոբուսային երթուղիներով, մնացածը կփոխարինվեն մայրաքաղաք ավտոբուսների նոր խմբաքանակների ներկրման դեպքում»,-ասված է Երևանի քաղաքապետարանի աշխատակազմի տեղեկատվության և հասարակայնության հետ կապերի վարչության տրամադրած պատասխանում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: